நாத்தனார்களின் திருமணம் மீறிய தொடர்பு; கர்ப்பிணி கொடூரக் கொலை - மாமியார் உட்பட சிக்கிய 6 பேர்

புதுக்கோட்டை மாவட்டம் மேட்டுப்பட்டி இந்திரா நகரைச் சேர்ந்தவர் பாண்டித்துரை (35). நெடுஞ்சாலை ஒப்பந்தப் பணிகளை மேற்கொண்டுவரும் இவருக்கு, 21 வயதான சந்தியா என்பவருடன் ஓராண்டுக்கு முன்பு திருமணம் நடந்து முடிந்தது. தற்போது சந்தியா 6 மாத கர்ப்பிணியாக, வயிற்றில் வளரும் பச்சிளங் குழந்தையின் வருகைக்காகக் காத்திருந்தார். ஆனால், அவருக்கு விதி வேறு வடிவத்தில் வந்துவிட்டது.

இது குறித்து புதுக்கோட்டை கணேஷ் நகர் காவல்துறை வட்டாரத்தில் நாம் விசாரித்தபோது, அவர்கள் நம்மிடம் பகிர்ந்த தகவல்கள் திடுக்கிட வைப்பதாக இருந்தன...

"பாண்டித்துரையின் சகோதரிகளான பாண்டி மீனா (33), பொற்கொடி (29) ஆகிய இருவரும் கணவர்களுடன் ஏற்பட்ட மனக்கசப்பால் பிரிந்து வந்து, சகோதரன் பாண்டித்துரையின் வீட்டிலேயே தங்கியிருந்துள்ளனர். அங்கே தங்கியிருந்த நாட்களில், இருவருக்கும் சில வாலிபர்களுடன் தொடர்பு ஏற்பட்டிருக்கிறது.

அதேபோல, வரதட்சணை கேட்டும் வீட்டாருடன் அடிக்கடி தகராறு நடந்து வந்த நிலையில், நாத்தனார்கள் பாண்டி மீனா, பொற்கொடி மற்றும் உறவினர் கனிமொழி ஆகியோரின் இந்த திருமணம் மீறிய உறவுகள் குறித்து சந்தியாவுக்குத் தெரியவந்துள்ளது. அதை சந்தியா தனது கணவர் பாண்டித்துரையிடம் போட்டுடைக்கவே, குடும்பத்தில் பெரும் புயல் வெடித்திருக்கிறது. இதனால் ஆத்திரமடைந்த நாத்தனார்கள், சந்தியாவைத் தீர்த்துக்கட்ட நள்ளிரவுச் சதித்திட்டம் தீட்டியுள்ளனர்" என்றனர்.

காவல்துறை வட்டாரத்தில் மேலும் நம்மிடம் பேசுகையில், "கடந்த செப்டம்பர் 29-ம் தேதி பாண்டித்துரை பணி நிமித்தமாக ஈரோட்டுக்குக் கிளம்பிச் சென்றுவிட்டார். வீட்டின் பாதுகாப்பற்ற இந்தச் சூழலையே தங்களுக்குச் சாதகமாகப் பயன்படுத்திக் கொண்டனர் நாத்தனார்கள்.

கடந்த செப்டம்பர் 30-ம் தேதி அதிகாலை, வீட்டில் சந்தியா ஆழ்ந்த உறக்கத்தில் இருந்தபோது, நாத்தனார்கள் பாண்டி மீனா, பொற்கொடி, மாமியார் பானுமதி (50) மற்றும் உறவினர்களான கனிமொழி (27), செல்வி (38), கார்த்தி (24) ஆகிய 6 பேரும் சந்தியாவின் அறைக்குள் சத்தமில்லாம் நுழைந்துள்ளனர்.

அலறக்கூட முடியாதபடி சந்தியாவின் முகத்தில் தலையணையை வைத்து பலமாக அமுக்கியுள்ளனர். மாமியாரும் உறவினர்களும் பிடித்துக்கொள்ள, நாத்தனார்கள் இருவரும் சந்தியாவின் கழுத்தைத் துப்பட்டாவால் இறுக்கி முறுக்கிக் கொடூரமாகக் கொலை செய்துள்ளனர்" என்று விவரித்தனர்.

போலீஸ் வட்டாரம் மேலும் தொடர்ந்தபோது, "கொலை செய்து முடித்ததும், அதனை இயற்கை மரணமாக மாற்ற ஒரு நாடகத்தை அரங்கேற்றியுள்ளனர். சந்தியாவின் வாயிலும் மூக்கிலும் பிரெட்டைக் குத்தித் திணித்து, தொண்டையில் பாலை ஊற்றியுள்ளனர்.

அதன் பின், 'பிரெட்டைப் பாலில் நனைத்து சாப்பிட்டபோது விக்கல் ஏற்பட்டு மூச்சுத்திணறி மயங்கி விழுந்துவிட்டாள்' என மாமியார் பானுமதி நாடகமாடியுள்ளார். உடனடியாகச் சந்தியாவை சிகிச்சைக்காகப் புதுக்கோட்டை அரசு மருத்துவக் கல்லூரி மருத்துவமனைக்குக் கொண்டு சென்றுள்ளனர். ஆனால், வழியிலேயே சந்தியாவின் உயிர் பிரிந்துவிட்டது" என்று தெரிவித்தனர்.

கணேஷ் நகர் காவல் நிலையப் போலீசார் சந்தேக மரணம் என வழக்குப் பதிவு செய்து விசாரித்து வந்த நிலையில், சந்தியாவின் உடற்கூறாய்வு அறிக்கை வந்த பின்னரே உண்மைகள் வெளிச்சத்திற்கு வந்துள்ளன.

"உடற்கூறாய்வு அறிக்கையில், சந்தியா பிரெட் சாப்பிட்டு மூச்சுத்திணறி இறக்கவில்லை... அவரது கழுத்து துப்பட்டாவால் நெரிக்கப்பட்டு, முகத்தில் தலையணையை அமுக்கிக் கொடூரமாகக் கொலை செய்யப்பட்டுள்ளார் என்பது உறுதியானது.

இதையடுத்து சந்தேக மரண வழக்கைக் கொலை வழக்காக மாற்றி, பாண்டித்துரையின் வீட்டாரைப் பிடித்து எங்கள் பாணியில் கிடுக்கிப்பிடி விசாரணை நடத்தினோம். விசாரணையில், திருமணம் மீறிய உறவு விவகாரத்தைத் தட்டிக்கேட்டதால் ஆத்திரமடைந்து, திட்டமிட்டுச் சந்தியாவைக் கொலை செய்ததை 6 பேரும் ஒப்புகொண்டனர்.

இதனையடுத்து:

பாண்டி மீனா (33) - நாத்தனார்

பொற்கொடி (29) - நாத்தனார்

பானுமதி (50) - மாமியார்

கனிமொழி (27) - உறவினர்

செல்வி (38) - உறவினர்

கார்த்தி (24) - உறவினர்

ஆகிய 6 பேரையும் உடனடியாகக் கைது செய்தோம். கார்த்தியை புதுக்கோட்டை மாவட்டச் சிறையிலும், மாமியார் மற்றும் நாத்தனார்கள் உட்பட 5 பெண்களைத் திருச்சி பெண்கள் தனிச்சிறையிலும் அடைத்துள்ளோம்" என்று காவல் துறை வட்டாரத்தில் தெரிவிக்கப்பட்டுள்ளது.

நாத்தனார்களின் திருமணம் மீறிய தொடர்பை அம்பலப்படுத்திய ஒரே காரணத்திற்காக, 6 மாதக் கர்ப்பிணியின் உயிரைப் பறித்த இந்தச் சம்பவம் புதுக்கோட்டை வட்டாரத்தையே உலுக்கியுள்ளது!