சென்னை: பிரபல ரௌடியை துப்பாக்கியால் சுட்டுப் பிடித்த போலீஸ்; காட்டுப்பகுதியில் என்ன நடந்தது?

சென்னை தாம்பரத்தை அடுத்த மாடம்பாக்கம் வள்ளலார் நகரைச் சேர்ந்தவர் முகமது சதாம் (29). ஏ பிளஸ் ரௌடியான இவர் மீது 20-க்கும் மேற்பட்ட குற்ற வழக்குகள் நிலுவையில் உள்ளன.

கஞ்சா விற்பனையிலும் இவர் ஈடுபட்டு வந்தார். மேலும் வழக்கு விசாரணைக்கு நீதிமன்றங்களில் சரிவர ஆஜராகமல் இருந்து வந்த முகமது சதாமைப் பிடிக்க உத்தரவும் பிறப்பிக்கப்பட்டிருந்தது. அதனால் போலீஸார் முகமது சதாமைத் தேடி வந்தனர்.

இந்தநிலையில் மணிமங்கலம் காவல் நிலையத்துக்குட்பட்ட கரசங்கால் காட்டுப்பகுதியில் முகமது சதாம் பதுங்கியிருப்பதாக போலீஸாருக்கு தகவல் கிடைத்தது. உடனடியாக போலீஸ் டீம் இன்று அதிகாலை அங்குச் சென்று முகமது சதாமைப் பிடிக்க சுற்றி வளைத்தது.

அப்போது மறைத்து வைத்திருந்த பட்டாகத்தியால் காவலர் ஒருவரை ரௌடி முகமது சதாம் தாக்கினார் .

அதனால் சுதாரித்துக் கொண்ட போலீஸ் டீம், முகமது சதாமைச் சரண் அடையும்படி எச்சரித்து. ஆனால் அவரோ தப்பி ஓட முயற்சி செய்தார். இதையடுத்து தற்காப்பு நடவடிக்கையாக போலீஸார், முகமது சதாமின் காலில் துப்பாக்கியால் சுட்டனர். இதில் துப்பாக்கி குண்டு காலில் பாய்ந்து அவர் சுருண்டு கீழே விழுந்தார்.

உடனடியாக அவரை மீட்ட போலீஸார், அரசு மருத்துவமனைக்குக் கொண்டு சென்று சிகிச்சை அளித்தனர். மேலும் ரௌடி முகமது சதாமிடமிருந்து 4 நாட்டு வெடிகுண்டுகள், 3 பட்டாக் கத்திகள், 20 கிலோ கஞ்சா உள்ளிட்டவற்றை போலீஸார் பறிமுதல் செய்தனர்.

இதுதொடர்பாக மணிமங்கலம் போலீஸார் விசாரணை நடத்தி வருகின்றனர். இந்தச் சம்பவம் குறித்து தகவலறிந்த போலீஸ் கமிஷனர் பிரேமானந்த் சின்கா, துப்பாக்கிச் சூட்டில் ஈடுபட்ட போலீஸாரிடமும் காயமடைந்தவரிடமும் விசாரணை நடத்தினார்.

தாம்பரம் பகுதியில் அதிகாலையில் நடந்த இந்தச் சம்பவம் ரௌடிகள் வட்டாரத்தில் பரபரப்பை ஏற்படுத்தியிருக்கிறது.