"ஆனாலும், படிப்புதான் முக்கியம்" - மகன் ஸ்டண்ட் யூனியனில் உறுப்பினரானது குறித்து நடிகர் முத்துக்காளை

நடிகர் முத்துக்காளை தனது மகன் வாசன் முரளியை ஸ்டண்ட் யூனியனில் உறுப்பினராகச் சேர்த்துள்ளார். சினிமாவில் நடிகராவதற்கு முன்னர் ஒரு ஃபைட்டாராக தனது கரியரைத் துவக்கியவர் முத்துக்காளை.

பின்னர் காமெடி நடிகராகி விட்டார். இப்போது தன் மகனையும் தன்னுடைய துறையிலேயே சேர்த்துவிட்டது குறித்து முத்துக்காளையிடம் பேசினோம்.

``பையன் வாசன் முரளி, இப்போ கல்லூரியில் பி.காம். ரெண்டாவது வருஷம் படிக்கறார். கடந்த ரெண்டு வருஷமாக ஸ்டண்ட் மாஸ்டர் பாண்டியன் மாஸ்டரிடம் முறைப்படி ஃபைட்ஸ் எல்லாம் கத்துக்கிட்டு வர்றார். ஸ்டண்ட் யூனியன்ல 18 வயசுக்கு மேல இருக்கறவங்களதான் சேர்க்க முடியும். அதான் விதிமுறை.

பையனுக்கு இப்போ 18 வயசுங்கறதால சங்கத்துல உறுப்பினர் கார்டு வாங்கிட்டார். சென்னைக்கு சினிமாவில் ஒரு ஸ்டன்ட் மேன் ஆகனும்னுதான் விரும்பினேன். அப்படித்தான் நானும் யூனியன்ல மெம்பர் ஆனேன். 2000ல இருந்து இப்ப வரை 26 வருஷமா நானும் உறுப்பினரா இருக்கேன். என்னுடைய தாய்வீடுன்னா அது ஸ்டண்ட் யூனியன்தான். புகுந்த வீடுதான் நடிகர் சங்கம்.

நான் நடிக்க முயற்சிக்கும் போது கிடைக்காத வாய்ப்பு, ஸ்டண்ட் யூனியன்ல சேர்ந்த பிறகு தான் எனக்கு 'பொன்மனம்' வாய்ப்பு அமைஞ்சது. என்னுடைய முயற்சிதான் என்னை இந்தளவுக்காவது கொண்டு வந்து விட்டிருக்குது. அதே மாதிரி உன்னுடைய முயற்சி, என்னை தாண்டியும் கொண்டு செல்லலாம். திறமைதான் சினிமாவுக்கான படிப்பு.

நேரமும் வொர்க் அவுட் ஆகணும். நான்தான் கஷ்டப்பட்டு சேர்ந்தேன். அவனுக்கு ஒரு வழியை ஏற்படுத்தி கொடுத்திருக்கேன். வாசன் முரளி பி.காம். படிக்கறார். அதை முடிச்சிட்டு மாஸ்டர் டிகிரி படிக்கணும்னு விரும்பினால் அதையும் படிக்கட்டும். பக்க துணையாக ஒரு வேலை. அதன்பிறகு சினிமாவுக்கு வானு சொல்லியிருக்கேன். நான் ஃபைட்டராகப் போய், நடிகரானேன்.

இந்தத் துறை தொழில்நுட்ப அளவிலும் பெரிசா வளர்ந்திருக்கு. ஒரு ஃபைட்டர் முறைப்படி கத்துக்க வேண்டியது கட்டாயம். ஆனா, நடிகர்கள் அந்தளவுக்குக் கஷ்டப்பட வேண்டியதில்ல. நடிகர்கள் ரிஸ்க் எடுக்க வேண்டியது அவசியமில்ல. அந்தளவுக்கு டெக்னிக்கல் நிறைய வந்திடுச்சு. நடிகர்கள் ஸ்டண்ட் விஷயங்களைக் கத்துக்காமல் இருந்தா கூட, அவங்க சூப்பரான ஆக்ஷன் ஹீரோவாக உயர்த்தக்கூடிய அளவுக்கு தொழில்நுட்பங்கள் முன்னேறியிருக்கு.

இதெல்லாம் சந்தோஷமா இருக்கு. சினிமா வாய்ப்புகள் யார் மூலமா, எப்படி வரும்னு யாராலேயும் கணிக்க முடியாது. அப்படி கிடைச்சதுனா கண்டிப்பா பயன்படுத்திக்கணும். ஆனாலும் படிப்புதான் மொதல்ல முக்கியம்னு சொல்லியிருக்கேன்!'' என்றார்.