டிட்வா புயல்: தொடர் மழையால் வெள்ளக்காடான டெல்டா வயல்கள்; 1 லட்சம் ஏக்கர் நெற் பயிர் மூழ்கிய வேதனை

டெல்டா மாவட்டமான தஞ்சாவூர், திருவாரூர், நாகை, மயிலாடுதுறை மாவட்டங்களில் டிட்வா புயல் காரணமாக நேற்று பகல் முழுவதும் தொடர் மழை பெய்தது.

இரவுக்குப் பிறகு சற்று லேசாகப் பெய்த மழை பரவலாக இருந்தது. நாகப்பட்டினம் மாவட்டத்தில் வேதாரண்யம் பகுதியில் 25 செ.மீ மீட்டர் மழை பெய்திருப்பதாகச் சொல்லப்படுகிறது.

இதே போல் திருவாரூர் மாவட்டத்தில் முத்துப்பேட்டை பகுதியில் தொடர்ந்து பெய்த மழையில் குடியிருப்புகள், வயல்களில் மழை நீர் சூழ்ந்துள்ளன.

டெல்டா மாவட்டத்தில் ஒரு லட்சம் ஏக்கருக்கும் மேல் சம்பா, தாளடி நெல் பயிர் நீரில் மூழ்கியுள்ளதாகச் சொல்லப்படுகிறது. பல இடங்களில் வயல்களில் இடுப்பளவு தண்ணீர் தேங்கியுள்ளது.

கடந்த குறுவை சாகுபடியில் முன் எப்போதும் இல்லாத வகையில் கிட்டதட்ட வழக்கத்தை விட ஒரு மடங்கு அதிகமாக விளைச்சல் கண்டதால் விவசாயிகள் மகிழ்ச்சியடைந்தனர். ஆனால் நெல் கொள்முதலில் ஏற்பட்ட தேக்கத்தால் அப்போது பெய்த மழையில் நெல் மணிகள் நனைந்து பாதிப்பைச் சந்தித்தனர்.

இந்நிலையில் டிட்வா புயலைத் தொடர்ந்து பெய்த மழையில் இரண்டு லட்சம் ஏக்கருக்கு மேல் நெல் பயிர் நீரில் மூழ்கியுள்ளன.

இது குறித்து நாகப்பட்டினம் மாவட்டத்தைச் சேர்ந்த விவசாயி தமிழ் செல்வன் பேசுகையில், "நாகப்பட்டினத்தில் அதிகபட்சமாக வேதாரண்யத்தில் அதிக மழை பெய்துள்ளது. நாகையில் பாதிப்பு ஏற்படக்கூடிய பகுதிகளில் மக்கள் முகாம்களில் தங்க வைக்கப்பட்டுள்ளனர்.

வேதாரண்யத்தில் உள்ள முள்ளியாறு ஆயக்காரன்புலம், தகட்டூர் வழியாக கடலில் கலக்கிறது. கிட்டத்தட்ட 20 கிலோ மீட்டர் நீளம் கொண்ட முள்ளியாற்றில் வெங்காயத்தாமரை செடிகள் மண்டி கிடக்கின்றன. இதனை தூர் வாருவதற்கு நடவடிக்கை எடுக்கவில்லை. இதற்கு ஒதுக்கப்படும் நிதி தூர்வாருவதற்கு முறையாகப் பயன்படுத்துவதில்லை.

மீனவர்கள் மீன் பிடிக்க கடலுக்குச் செல்லாமல் வாழ்வாதாரம் இழந்துள்ளனர். உப்பளம் பாதிப்பைச் சந்தித்துள்ளன. டெல்டாவில் சுமார் 8 லட்சம் ஏக்கரில் சம்பா, தாளடி நெற்பயிர் நடவு செய்யப்பட்டிருந்தது. இதில் ஒரு லட்சம் ஏக்கருக்கு மேல் பயிர்கள் நீரில் மூழ்கி அழுகும் நிலை ஏற்பட்டுள்ளது.

தொடர்ந்து தண்ணீர் தேங்கியிருந்ததால் பல இடங்களில் பயிர் அழுகி விட்டன. பல பகுதிகளில் வயல்களில் இடுப்பளவிற்கு தண்ணீர் தேங்கி நிற்கிறது. இதனால் விவசாயிகள் கடும் வேதனைக்கு ஆளாகியுள்ளனர். அரசு பாதிப்புகள் குறித்து முறையாகக் கணக்கெடுத்து உரிய இழப்பீடு வழங்குவதற்கு காலம் தாழ்த்தாமல் நடவடிக்கை எடுக்க வேண்டும்" என்றார்.

திருவாரூர் மாவட்டத்தில் முத்துப்பேட்டை, திருத்துறைப்பூண்டி, கோட்டூர், நன்னிலம் உள்ளிட்ட பகுதிகளில் நெற்பயிர் நீரில் மூழ்கியுள்ளது.

இது குறித்து பேசிய விவசாயிகள், "கடற்கரை ஓரமான முத்துப்பேட்டை அதன் சுற்றுவட்டாரப் பகுதிகளான தில்லைவிளாகம், இடுபவனம், எடையூர், உதயமார்த்தாண்டபுரம், கோவிலூர், உப்பூர், ஆலங்காடு உள்ளிட்ட பல்வேறு பகுதிகளில் தொடர் மழை பெய்தது.

இதில் சம்பா மற்றும் தாளடி பயிர் நீரில் மூழ்கியுள்ளன. முத்துப்பேட்டையில் தாழ்வான பகுதியில் இருந்த நூற்றுக்கு மேற்பட்ட மக்கள் முகாமில் தங்க வைக்கப்பட்டுள்ளனர்.

நம்மங்குறிச்சி சாலையில் உள்ள சுமார் 40க்கும் மேற்பட்ட குடியிருப்புகளில் வசிக்கும் பழங்குடியினர் வசிக்கின்றனர். இந்தக் குடியிருப்புகளில் தண்ணீர் புகுந்ததால் சுமார் 100க்கும் மேற்பட்டோர் மீட்கப்பட்டு கோவிலூர் பெண்கள் மேல்நிலைப் பள்ளியில் பாதுகாப்பாகத் தங்க வைக்கப்பட்டுள்ளனர்.

தாழ்வான இப்பகுதியில் மழை காலங்களில் ஒவ்வொரு ஆண்டும் பாதிப்புகளைச் சந்திக்கின்றனர். இதற்கு ஒரு நிரந்தர நடவடிக்கை எடுக்க வேண்டும் என்றனர். டெல்டா மாவட்டத்தில் வயல்கள் வெள்ளக்காடாக மாறியுள்ளன.

ஒரு லட்சம் ஏக்கருக்கு மேல் நெல் பயிர் நீரில் மூழ்கியுள்ளதால் கடும் பாதிப்பைச் சந்திக்கக் கூடிய நிலைக்கு விவசாயிகள் ஆளாகியுள்ளனர்" என்றார்.