துருக்கியின் தானியக் களஞ்சியத்தை விழுங்கும் ராட்சத புதைகுழிகள்! - கோன்யா சமவெளியின் பகீர் பின்னணி?

துருக்கியின் மத்திய அனடோலியாவில் அமைந்துள்ள கோன்யா சமவெளி (Konya Plain) அந்நாட்டின் 'தானியக் களஞ்சியம்' என்று அழைக்கப்படுகிறது. இங்குதான் கோதுமை, சோளம் மற்றும் சர்க்கரை வள்ளிக்கிழங்கு (Sugar beet) போன்ற முக்கியப் பயிர்கள் அதிகளவில் விளைகின்றன.

ஆனால், கடந்த சில ஆண்டுகளாக இந்த செழிப்பான நிலம் மர்மமான முறையில் பாதாளத்திற்குள் மறைந்து வருகிறது. இதுவரை சுமார் 700-க்கும் மேற்பட்ட ராட்சத மண்குழிவுகள் (Sinkholes) திடீரெனத் தோன்றி, விவசாய நிலங்களை விழுங்கி வருகின்றன. இந்தக் குழிகள் சில சமயங்களில் 100 அடிக்கும் மேல் அகலமாகவும், 160 அடிக்கும் மேல் ஆழமாகவும் இருப்பதுடன், வயல்களையும், சாலைகளையும் அச்சுறுத்துகின்றன.

இந்த அதிர்ச்சியூட்டும் நிகழ்வுக்கான முதன்மைக் காரணம், கோன்யா சமவெளியின் தனித்துவமான புவியியல்தான். இந்தப் பகுதி சுண்ணாம்புக்கல் மற்றும் ஜிப்சம் போன்ற எளிதில் கரையக்கூடிய பாறைகளால் ஆன "கார்ஸ்ட் நிலப்பரப்பு" (Karst Terrain) ஆகும். பல்லாயிரம் ஆண்டுகளாக, நிலத்தடி நீர் இந்த பாறைகளைக் கரைத்து, பூமிக்கு அடியில் பெரிய குகைகளையும், வெற்றிடங்களையும் உருவாக்கியுள்ளது.

முன்பு, இந்த நிகழ்வுகள் அரிதாகவே நிகழ்ந்தன. ஆனால், கடந்த இரண்டு தசாப்தங்களாக, காலநிலை மாற்றம் மற்றும் மனித நடவடிக்கைகளின் கலவையே இந்தச் சரிவுகளைத் தீவிரப்படுத்தியுள்ளதாக நிபுணர்கள் கூறுகின்றனர்.

இந்தப் புதைகுழிகள் வேகமாகப் பெருகுவதற்கு முக்கியக் காரணம், மனிதர்களால் தூண்டப்பட்ட நிலத்தடி நீர் பற்றாக்குறைதான். கோன்யாவில் உள்ள விவசாயிகள், அதிக நீர் தேவைப்படும் சோளம் மற்றும் சர்க்கரை வள்ளிக்கிழங்கு போன்ற பயிர்களுக்காக, நிலத்தடி நீரை அதன் இயற்கை மறுசீரமைப்பு வீதத்தை விடப் பல மடங்கு அதிகமாக உறிஞ்சி எடுத்துள்ளனர்.

1970கள் முதல், நிலத்தடி நீரின் மட்டம் சில பகுதிகளில் 60 மீட்டருக்கும் (197 அடி) அதிகமாகக் குறைந்துள்ளதாக ஆய்வுகள் தெரிவிக்கின்றன. மேலும், ஆண்டுதோறும் சுமார் 2 மீட்டர் அளவில் நீர்மட்டம் குறைவதாக கோன்யா தொழில்நுட்பப் பல்கலைக்கழகப் ஆராய்ச்சியாளர்கள் எச்சரிக்கின்றனர்.

நிலத்தடி நீர் வற்றிப்போகும் போது, குகைகளின் கூரையைத் தாங்கிக் கொண்டிருந்த ஆதரவு குறைகிறது. இதனால் திடீரென பூமி சரிந்து, பயங்கரமான புதைகுழிகளை உருவாக்குகிறது. சட்டப்பூர்வமான மற்றும் சட்டவிரோதமான கிணறுகள் மூலம் தொடர்ந்து நீர் உறிஞ்சப்படுவது இந்த அபாயத்தை மேலும் அதிகரித்துள்ளது.

இந்த திடீர் குழிகள் விவசாயிகளுக்கு பெரும் கவலையை அளித்துள்ளன. இரவில் தூங்கிக் காலையில் கண் விழித்தால், தங்கள் பண்ணை முழுவதும் புதிய பள்ளம் உருவாகியிருப்பதைக் கண்டு பல விவசாயிகள் அதிர்ச்சியடைந்துள்ளனர். ஒரு சில புதைகுழிகள் உருவாவதற்கு முன், நிலத்தின் அடியில் இருந்து ஒரு பெரிய பாரம் தண்ணீரில் விழுவது போன்ற விசித்திரமான சத்தத்தைக் கேட்டதாக உள்ளூர் மக்கள் சிலர் தெரிவித்துள்ளனர்.

இது நிலத்தடி குகையின் கூரை சரிவதையே குறிக்கிறது. இந்த அபாயம் காரணமாக, பல விவசாயிகள் தங்கள் நிலங்களை விட்டுச் செல்ல நிர்பந்திக்கப்பட்டுள்ளனர். நிலத்தடி நீரைப் பயன்படுத்துவதைக் கட்டுப்படுத்துவதும், குறைவான நீர் தேவைப்படும் பயிர்களுக்கு மாறுவதும் மட்டுமே, துருக்கியின் தானியக் களஞ்சியத்தைக் காப்பாற்றுவதற்கான ஒரே வழி என்று நிபுணர்கள் வலியுறுத்துகின்றனர்.