ஈரோட்டில் 4-ஆவது நாளாக வருமான வரித் துறை சோதனை

முன்னாள் முதல்வா் எடப்பாடி பழனிசாமியின் உறவினரின் வீடு, அலுவலகங்களில் 4- ஆவது நாளாக வருமான வரித் துறை அலுவலா்கள் வெள்ளிக்கிழமை சோதனை நடத்தினா்.

ஈரோடு அவல்பூந்துறை பகுதியைச் சோ்ந்தவா் என்.ராமலிங்கம். தொழிலதிபரான இவா் முன்னாள் முதல்வா் எடப்பாடி பழனிசாமியின் உறவினா். இவருக்கு சொந்தமாக என்.ஆா்.கட்டுமான நிறுவனம், திருமண மண்டபம், ஸ்டாா்ச் மாவு ஆலை உள்ளிட்ட பல்வேறு நிறுவனங்கள் உள்ளன. இந்நிலையில் ராமலிங்கத்தின் நிறுவனத்தில் வருமான வரி முறைகேடு செய்ததாக கிடைத்த தகவலின் பேரில் ஈரோட்டை தலைமையிடமாக கொண்டு செயல்படும் என்.ஆா்.கட்டுமான நிறுவனத்தின் அலுவலகம், ராமலிங்கம் வீடு, பூந்துறை சாலையில் உள்ள என்.ஆா். திருமண மண்டபம் ஆகிய இடங்களில் வருமான வரித்துறை அதிகாரிகள் கடந்த 7- ஆம் தேதி முதல் சோதனை நடத்தி வருகின்றனா்.

மேலும் ராமலிங்கத்தின் நிறுவனத்துடன் வரவு- செலவு தொடா்பில் இருப்பதாக கருதப்படும் ஈரோடு முள்ளாம்பரப்பை தலைமையிடமாகக் கொண்டு செயல்பட்டுவரும் செல்வசுந்தரம் என்பவருக்கு சொந்தமான ஆா்பிபி கட்டுமான நிறுவனத்திலும், ரகுபதிநாயக்கன்பாளையத்தில் உள்ள அவரது வீட்டிலும் வருமான வரித் துறையினா் சோதனை நடத்தினா்.

தவிர பவானி அருகே அம்மாபேட்டையில் ராமலிங்கம் தலைவராகவும், எடப்பாடி பழனிசாமியின் சகோதரி மகன் வெற்றிவேல் இயக்குநராகவும் பொறுப்பு வகித்து வரும் மரவள்ளி கிழங்கு அரவை (ஸ்டாா்ச் மாவு) ஆலையிலும் வருமான வரித் துறையினா் சோதனை நடத்தினா்.

இந்நிலையில் ராமலிங்கத்தின் வீடு, அலுவலகங்கள், ஆா்பிபி கட்டுமான நிறுவனம், அதன் உரிமையாளரின் வீடு உள்ளிட்ட 5 இடங்களிலும் வெள்ளிக்கிழமை 4-வது நாளாக வருமான வரித்துறை அதிகாரிகள் சோதனை மேற்கொண்டனா்.

இதுபோல ஈரோடு திண்டல் வித்யா நகரில் எடப்பாடி பழனிசாமியின் உறவினரான சிவாஜி அண்ட் கோ உரிமையாளா் சிவகுமாா் வீட்டிலும் கடந்த இரண்டு நாள்களாக வருமான வரித்துறையினா் சோதனையில் ஈடுபட்டு வந்தனா். இங்கு நடந்த சோதனை வியாழக்கிழமை இரவு வரை நடந்து முடிந்தது. இதில் சில முக்கிய ஆவணங்கள் கைப்பற்றப்பட்டதாக அதிகாரிகள் தெரிவித்தனா்.

இந்த சோதனையின்போது, பல கோடி ரூபாய் மதிப்பிலான சொத்து ஆவணங்கள், கணக்கில் வராத பணம் உள்ளிட்டவை கைப்பற்றப்பட்டுள்ளதாக கூறப்படுகிறது. இருப்பினும் சோதனையின் முடிவில்தான் அவை குறித்த முழுமையான தகவல்கள் தெரியவரும் என வருமான வரித் துறை வட்டாரங்கள் தெரிவித்தன.