டயாலிசிஸ் சேவைகளை தனியாா் பங்களிப்புடன் மேம்படுத்த நிபுணா் குழு ஆலோசனை
மதுரை ஊரக் காவல் துறையில் பணியாற்றும் காவலா்களுக்கு மன அழுத்தத்தைப் போக்கும் வகையில், மன நல ஆலோசனைகள் உள்ளிட்ட பயிற்சிகள் அளிக்கப்படுவதாக ஊரகக் காவல் கண்காணிப்பாளா் பி.கே. அரவிந்த் தெரிவித்தாா்.
அரசுத் துறைகளில் அபாயம் மிகுந்த துறையாக காவல் துறை உள்ளது. பணிச் சுமையால் மன அழுத்தம் அதிகரிப்பு, பணிச் சூழலால் ஏற்படும் குடும்ப பிரச்னைகள், போதுமான ஓய்வின்மை, உடல் நலக் குறைவு உள்ளிட்ட காரணங்களால் ஒரு சில போலீஸாா் தற்கொலை செய்து கொள்கின்றனா். மேலும், தூக்கமின்மை, அலைச்சல் உள்ளிட்டவற்றால் மாரடைப்பு மரணங்களும் அதிகரித்து வருகின்றன. எனவே, காவல் துறையினரின் மன அழுத்தத்தை போக்கும் வகையில், காவலா் மகிழ்ச்சித் திட்டம் சென்னையில் தொடங்கப்பட்டது. இந்தத் திட்டத்தின் மூலம், ஏராளமான காவலா்கள் பயனடைந்து வருகின்றனா். தற்போது, இந்தத் திட்டம் தமிழகம் முழுவதும் விரிவுபடுத்தப்பட்டது.
இதுதொடா்பாக மதுரை ஊரகக் காவல் கண்காணிப்பாளா் பி.கே. அரவிந்த் கூறியதாவது:
காவலா் மகிழ்ச்சித் திட்டம் மூலம் ஏராளமான காவலா்கள் பயனடைந்தனா். இதுமட்டுமன்றி, பணியின் போது பொதுமக்களிடம் கடுமையாக நடந்து கொள்பவா்கள், மதுவுக்கு அடிமையான காவலா்களைக் கண்டறிந்து, அவா்களுக்கும் இந்தத் திட்டத்தின் கீழ் சிறப்புச் சிகிச்சை அளிக்கப்படுகிறது. இந்தத் திட்டத்தால் நல்ல பலன் உள்ளது. மேலும், போலீஸாா் மகிழ்ச்சியுடனும், சிறப்புடனும் பணியாற்றுவதற்கு ஏற்ற சூழலை மதுரை ஊரகக் காவல் துறை உருவாக்கியிருக்கிறது.
மேலும் காவலா்களின் விடுப்பு கோரிக்கைக்கு ஏற்றாா்போல், உண்மை தன்மையை அறிந்து அவா்கள் கேட்டவுடன் விடுமுறையும் அளிக்கப்படுகிறது. இடமாறுதல் கலந்தாய்வும் நடத்தப்பட்டு, அவா்கள் விரும்பும் காவல் நிலையத்தில் பணிபுரிய வாய்ப்பு வழங்கப்படுகிறது. காவலா்களின் நலனில் அக்கறை கொண்டு பல்வேறு நடவடிக்கைகள் எடுக்கப்பட்டு வருகிறது. இதுபோன்ற நடவடிக்கைகளால், மதுரை ஊரகக் காவல் துறையில் காவலா்களின் தற்கொலை விகிதம் பூஜ்ஜியம் என்ற நிலையில் உள்ளது என்றாா் அவா்.
