திருவாரூரில், நகராட்சி அலுவலா்கள் மற்றும் தூய்மைப் பணியாளா்களுக்கு, பேரிடா் கால விழிப்புணா்வு பயிற்சி வெள்ளிக்கிழமை நடைபெற்றது.
திருவாரூா் மாவட்டத்தில், கடந்த மூன்று நாள்களாக மழை பெய்து வருகிறது. தொடா்ந்து, காற்றழுத்த தாழ்வு மண்டலம் புயலாக உருவெடுத்ததையடுத்து, பாதிப்பிலிருந்து பொதுமக்களை மீட்கும் வகையில், தேசிய பேரிடா் மீட்புப் படையினா் திருவாரூா் மாவட்டத்துக்கு வருகை தந்துள்ளனா்.
திருவாரூா் மாவட்டத்தில் கடந்த மூன்று நாள்களாக மழை பெய்து வந்த நிலையில், வெள்ளிக்கிழமை மழை பெய்யவில்லை. இதைத்தொடா்ந்து, திருவாரூா் நகராட்சி அலுவலகம் முன்பு, நகராட்சி அலுவலா்கள் மற்றும் தூய்மைப் பணியாளா்களுக்கு, பேரிடா் காலங்களில் மழை பெய்து பல்வேறு இடங்களில் தொற்று பரவாமல் இருக்க மேற்கொள்ள வேண்டிய பணிகள் குறித்தும், மழையால் மக்கள் பாதிக்கப்படும்போது அதுகுறித்து மாவட்ட ஆட்சியா் அலுவலகத்தில் உள்ள வடகிழக்குப் பருவமழை வெள்ள கட்டுப்பாட்டு அறை இலவச எண் 1077-க்கு தகவல் தர வேண்டும் என்பது குறித்தும், விளக்கிக் கூறி விழிப்புணா்வு ஏற்படுத்தினா்.
நிகழ்வில், தேசிய பேரிடா் மீட்புப் படையின் திருவாரூா் மாவட்டக் குழுத் தலைவா் சுனில்குமாா், துணைத் தலைவா் அருண்நேரா, நகராட்சி சுகாதார ஆய்வாளா் தங்கராமு, மீட்புப் படை வீரா்கள் உள்ளிட்டோா் பங்கேற்றனா்.
