Weekly Horoscope: வார ராசி பலன் 30.11.25 முதல் 6.12.25 | Indha Vaara Rasi Palan ...
'பதவி போச்சு தலைவரே... மனசு கஷ்டமா இருக்கு' - ஸ்டாலினிடம் குமுறிய கோவை திமுக நிர்வாகி
2026 சட்டமன்ற தேர்தலை முன்னிட்டு, வாக்காளர் பட்டியலில் சிறப்பு தீவிர திருத்த பணிகள் நடைபெற்று வருகிறது. இதுகுறித்து முதலமைச்சரும், திமுக தலைவருமான மு.க. ஸ்டாலின் மாநிலம் முழுவதும் உள்ள திமுக நிர்வாகிகளிடம் செல்போனில் பேசி வருகிறார். கோவை மாவட்டம், காரமடை நகர செயலாளர் பதவியில் இருந்து சமீபத்தில் நீக்கப்பட்ட வெங்கடேஷிடம் ஸ்டாலின் செல்போனில் பேசினார். அப்போது வெங்கடேஷ் தன் புலம்பல்களை குமுறி கொட்டிவிட்டார். வெங்கடேஷ், "வணக்கம் தலைவரே. எனக்கு அழுகை வருது தலைவரே. எஸ்ஐஆர் வேலை எல்லாம் நல்லா போகுது. 70% வேலை முடிஞ்சுது. இப்ப எனக்கு பொதுக்குழு உறுப்பினர் பதவி போட்ருக்கு. எங்க நகர பொறுப்பாளரால நிறைய பிரச்னை போயிட்டு இருக்கு தலைவரே." என்றார். அப்போது ஸ்டாலின், "இது செந்தில் பாலாஜிக்கு தெரியுமா.. தெரியாதா." என்று கேட்டார்.
அதற்கு வெங்கடேஷ், "அண்ணனுக்கு எல்லாம் தெரியும். இங்க மாவட்ட செயலாளர் தான் தொந்தரவு. மற்றபடி இங்க எல்லாம் சூப்பரா இருக்கு தலைவரே. எனக்கு நீங்கதான் தலைவரே வேணும். ரொம்ப கஷ்டமா இருக்கு. 15 வருஷமா நகர செயலாளர் பதவில இருந்து நிறைய பண்ணிருக்கேன். எல்லா டீம்லயும் கேட்டு பாருங்க தலைவரே. நம்மகிட்ட கடுகளவும் குறை இல்ல. என் மேல அபாண்டமான புகார் சொல்லி மாத்திருக்காங்க தலைவரே. அடுத்து நம்மதான் தலைவரே ஆட்சிக்கு வரப்போறோம். காரமடையை மட்டும் கொஞ்சம் காப்பாத்துங்க தலைவரே.

வேலைக்கு ஆகாத பாஜக ஆதரவு பையன் ஒருத்தனை காரமடை நகர பொறுப்பாளரா போட்ருக்காங்க. எல்லாரும் நொந்து போயிருக்காங்க. எனக்கு இல்லாட்டியும் பரவாயில்ல. காலம் முழுசா உங்க காலடியில் நான் வேலை செய்வேன். அவனை மாத்திட்டு வேற யாரையாவது போடுங்க தலைவரே. நம்மதான் தலைவரே ஜெயிக்கறோம். நீங்க உடம்பை மட்டும் பாருங்க ப்ளீஸ். நீங்களும் சின்னவரும் ஆரோக்கியமா இருக்கணும்." என்றார். ஸ்டாலினிடம் வெங்கடேஷ் பேசிய வீடியோ சமூகவலைதளங்களில் வைரலாகி வருகிறது.




















