புதுக்கோட்டை: பசியில் போலி டோக்கன் கொடுத்த பெண் தாக்கப்பட்டாரா? சர்ச்சை வீடியோவின் பின்னணி என்ன?

புதுக்கோட்டை மாவட்டம், கோட்டைப்பட்டினத்தைச் சேர்ந்த ரஹ்மத்துல்லா என்பவரின் மனைவி ஜெரினா ( வயது: 50 ). அம்மாபட்டினத்தில் உள்ள பள்ளிவாசலில் மெகராஜ் இஸ்லாமிய விழாவிற்காக டோக்கன் கொடுத்து உணவு வழங்கப்பட்டது.

இந்நிலையில், அங்கு உணவு வாங்குவதற்குக் கொடுக்கப்பட்ட டோக்கனை ஜெரினா, ஜெராக்ஸ் எடுத்துக்கொண்டு சென்று உணவை வாங்கியதாகச் சொல்லப்படுகிறது.

அப்போது, அதைக் கண்ட நிர்வாகிகள் பசிக்காகப் போலி டோக்கன் கொடுத்து உணவு வாங்குவது தவறு என்று கூறி, அவரை நிற்க வைத்து கேள்வி கேட்பது போலவும், பர்தவைக் கழட்டச் சொல்லி மிரட்டுவது போலவும் வீடியோ ஒன்று வெளியானது.

அந்த வீடியோ சமூக வலைத்தளங்களில் வைரலான நிலையில், அது குறித்து பலரும் கருத்து தெரிவித்து வருகின்றனர்.

இதற்கிடையில், பாதிக்கப்பட்டதாகச் சொல்லப்படும் அந்தப் பெண் மணமேல்குடி அரசு மருத்துவமனையில் சிகிச்சைபெற்று வருவதாகச் சொல்லப்படுகிறது. இந்நிலையில், இந்த விவகாரம் குறித்து பேசிய சமூக ஆர்வலர்கள் சிலர்,

"தவறு செய்த ஜெரினா என்ற பெண்ணை போலீஸில் ஒப்படைத்திருக்கலாம். அல்லது அந்தக் குடும்பத்தாரிடம் சொல்லி அதனைக் கண்டித்து இருக்கலாம். ஆனால், அந்தப் பெண்ணின் பர்தாவைப் பிடித்து கிழித்து அடித்து மானபங்கப்படுத்தி இருக்கிறார்கள்.

தனது வயிற்றுப்பசியைப் போக்க ஒருவேளை உணவிற்காகத் தவறு செய்த பெண்ணைத் தண்டிக்கும் இந்த ஜமாத்தார்கள் செயலை தமிழக காவல்துறை தாமாக முன்வந்து நடவடிக்கை எடுக்க வேண்டும். அந்தப் பெண் தவறே செய்திருந்தாலும், பர்தாவைப் பிடித்து இழுத்து அவமானப்படுத்தியது கண்டிக்கத்தக்கது.

உணவுக்காக யாரையும் கையேந்த விடக்கூடாது. ஆனால், அந்த உணவைத் தானாக வந்து கேட்ட பெண்ணை இப்படி அவமானப்பாடுத்தியது, அந்தப் பெண்ணின் மனநிலையை எவ்வளவு பாதித்திருக்கும்?" என்றார்கள்.

இந்நிலையில், அம்மாபட்டினம் பகுதியைச் சேர்ந்தவர்களோ,

"அந்தப் பெண்மணியைத் தாக்கவெல்லாம் இல்லை. உணவு வழங்க வழங்கப்பட்ட டோக்கனை ஜெராக்ஸ் எடுத்து வந்ததால், போலியாக உணவு டோக்கனை யாரேனும் அச்சடித்துக் கொடுக்கிறார்களோ என்ற சந்தேகத்தில்தான் அந்தப் பெண்ணின் பர்தாவைக் கழற்றச் சொன்னார்கள்.

பர்தாவைப் பிடித்து கிழிக்கவெல்லாம் இல்லை. இங்குள்ள பா.ஜ.க-வைச் சேர்ந்த சிலர் சாதாரணமாக நடந்ததிந்த நிகழ்வு குறித்த இந்த வீடியோவை சமூக வலைத்தளங்களில் பரப்பி, தேவையில்லாத பரபரப்பை ஏற்படுத்திவிட்டார்கள்.

எல்லோருக்கும் உணவு கொடுக்க வேண்டும் என்ற அடிப்படையில் தான் அந்த விழாவையே நடத்துகிறார்கள். அப்படி இருக்கையில் உணவு கேட்டு வந்த பெண்ணை அவமானப்படுத்துவார்களா? போலி டோக்கன் என்று சந்தேகப்பட்டு கேள்வி கேட்கப் போய், இப்படி வீண் பரபரப்பாகிவிட்டது" என்றார்கள்.

ஆனாலும், சமூக வலைத்தளங்களில் இந்த வீடியோ பதிவினைப் பார்த்த பலரும், அப்பெண்ணின் ஆடையைக் கிழித்து, அவரை அடித்து துன்புறுத்தினார்களா என்று போலீஸார் விசாரணை மேற்கொண்டு நடவடிக்கை எடுக்க வேண்டுமென எதிர்பார்க்கிறார்கள்.