மதுரை மீனாட்சி அம்மன் கோயிலில் குடியரசுத் துணைத் தலைவர் பேட்டியின்போது மின்தடை! - நிர்மல் விளக்கம்

நேற்று (அக்டோபர் 30), மதுரை மீனாட்சி அம்மன் கோயில் தரிசனம் மேற்கொண்டார் குடியரசுத் துணைத் தலைவர் சி.பி. ராதாகிருஷ்ணன்.

தரிசனத்திற்குப் பிறகு, அவர் செய்தியாளர்களைச் சந்திக்கையில் இரண்டு முறை அடுத்தடுத்து மின்சாரம் தடைப்பட்டது.

இந்தச் சம்பவத்திற்குத் தன்னுடைய எக்ஸ் பக்கத்தில் விளக்கமளித்துள்ளார் தமிழ்நாடு மின்சாரத் துறை அமைச்சர் நிர்மல் குமார்.

நிர்மல் குமார், “மாண்புமிகு குடியரசுத் துணைத் தலைவர் இன்று மீனாட்சி அம்மன் கோயிலுக்குள் மாலை 5:35 மணிக்கு வருகை தந்தார்.

தரிசனம் முடிந்த பிறகு மாலை 6:25 மணிக்கு வெளியேறினார்.

குடியரசுத் துணைத் தலைவரின் வருகையையொட்டி, பிற்பகல் 3:30 மணி முதல் கோயில் முழுவதும் ஜெனரேட்டர் மின்சாரம் மூலமே இயங்கியது.

ஏன் மின்வெட்டு?

இதற்கான மின்சாரப் பராமரிப்புப் பணிகள் முழுமையாக ஏற்பாடு செய்யப்பட்டு, தமிழ்நாடு மின்சார வாரியத்தின் உதவிச் செயற்பொறியாளர் உதவிக்காகக் கோயில் மின் கட்டுப்பாட்டு அறையில் இருந்தார்.

தரிசனம் முடிந்த பிறகு, குடியரசுத் துணைத் தலைவர் கிழக்குக் கோபுர வாசலுக்கு எதிரே செய்தியாளர்களைச் சந்தித்துப் பேசினார்.

அந்தச் சமயத்தில், கோயில் மின் கட்டுப்பாட்டு அறையில் ஏற்பட்ட உள்சுற்று மின்கோளாறு (internal fault trip) காரணமாகக் கோயிலுக்குள் சிறிது நேரம் மின் விநியோகம் தடைபட்டது.

உடனடியாகச் செயல்பட்டு, அடுத்த 2 நிமிடங்களுக்குள் ஜெனரேட்டர் மின்சாரத்திலிருந்து மின்சார வாரிய மின்சாரத்திற்குத் தொடர்பு மாற்றப்பட்டு மின் விநியோகம் சீரமைக்கப்பட்டது” என்று பதிவிட்டுள்ளார்.

மீண்டும்... மீண்டும்!

ஏற்கெனவே தமிழ்நாட்டில் மின்வெட்டுப் பிரச்சினை பரவலாக இருந்து வருகிறது. இதுவரை தமிழ்நாடு அமைச்சர்கள் கலந்துகொண்ட நிகழ்வுகளில் மின்வெட்டு ஏற்பட்டது.

இப்போது இன்னும் ஒரு படி மேலே சென்று, குடியரசுத் துணைத் தலைவர் கலந்துகொண்ட நிகழ்வில் மின்தடை ஏற்பட்டுள்ளது.