லால்குடி: ஸ்டேஷனில் கத்தியைக் காட்டி போலீஸுக்குக் கொலை மிரட்டல் - இளைஞர் கைது!

திருச்சி மாவட்டம், லால்குடியை அடுத்த கல்லக்குடி அருகே உள்ள மால்வாய் சாலையில், கல்லக்குடி காவல் நிலைய சிறப்பு உதவி ஆய்வாளர் சோபியா தலைமையிலான போலீஸார் இரவு வாகனத் தணிக்கையில் ஈடுபட்டிருந்தனர். அப்போது, அவ்வழியாக சாலையில் தாறுமாறாக இருசக்கர வாகனத்தில் ஒருவர் வந்துள்ளார். வந்த நபரைப் பிடித்து விசாரணை நடத்தினர். ​விசாரணையில் அவர் கோவண்டாகுறிச்சி, செம்பிய தெருவைச் சேர்ந்த மாணிக்கம் என்பவரின் மகன் ராஜ் (வயது: 25) என்பதும், அவர் அதிகளவில் மது அருந்திவிட்டு வாகனம் ஓட்டி வந்ததும் தெரியவந்தது. இதையடுத்து, அவர் மீது வழக்கு பதிவுசெய்த போலீஸார், அவரது இருசக்கர வாகனத்தைப் பறிமுதல் செய்து காவல் நிலையத்தில் நிறுத்தினர். பின்னர், சாவியை காவல் நிலையத்தில் வைத்துவிட்டு மீண்டும் வாகனத் தணிக்கைப் பணிக்குச் சென்றனர். அச்சமயத்தில் காவல் நிலையத்தில் பெண் தலைமைக் காவலர் சிலம்புச்செல்வி மட்டுமே பாரா காவல் பணியில் இருந்துள்ளார். அப்போது, அங்கு வந்த ராஜ், பெண் காவலரிடம் தனது வாகனத்தைத் தருமாறு கேட்டுத் தகராறில் ஈடுபட்டுள்ளார். மேலும், தகாத வார்த்தைகளால் திட்டியதோடு, தான் மறைத்து வைத்திருந்த கத்தியை எடுத்து அவருக்குக் கொலை மிரட்டலும் விடுத்துள்ளார்.​

இதனால், அதிர்ச்சியடைந்த பெண் காவலர் அச்சத்தில் வெளியேறவே, ராஜ் காவல் நிலையத்தில் இருந்த சாவியை எடுத்துக்கொண்டு தனது இருசக்கர வாகனத்துடன் அங்கிருந்து தப்பிச் சென்றுள்ளார். இச்சம்பவம் குறித்து பெண் தலைமைக் காவலர் சிலம்புச்செல்வி அளித்த புகாரின் பேரில், கல்லக்குடி போலீஸார் 3 பிரிவுகளின் கீழ் வழக்கு பதிவுசெய்து ராஜைக் கைதுசெய்தனர். பின்னர், அவரை நீதிமன்றத்தில் ஆஜர்படுத்தி சிறையில் அடைத்தனர். பொதுமக்களுக்குப் பாதுகாப்பு அளிக்கும் காவல் நிலையத்திலேயே பெண் காவலருக்குப் பாதுகாப்பற்ற சூழல் ஏற்பட்டது, அப்பகுதி பொதுமக்கள் மற்றும் காவல்துறையினர் மத்தியில் பெரும் அதிர்ச்சியை ஏற்படுத்தியிருக்கிறது.