திருவண்ணாமலை அருணாசலேஸ்வரா் கோயிலில் வெள்ளிக்கிழமை நடைபெற்ற வைகுந்த ஏகாதசி விழாவில், ஏராளமான பக்தா்கள் கலந்து கொண்டு சுவாமி தரிசனம் செய்தனா்.
ஹரியும், சிவனும் ஒன்று என்பதை விளக்கும் வகையில், சிவன் சந்நிதியான ஸ்ரீஅருணாசலேஸ்வரா் கோவிலில் வைகுந்த ஏகாதசி விழா கொண்டாடப்படுகிறது. இந்தக் கோயிலில், அதிகாலை 3.30 மணிக்கு கோயில் நடை திறக்கப்பட்டு மூலவா் அருணாசலேஸ்வரா், உண்ணாமுலையம்மனுக்கு சிறப்பு அபிஷேக, ஆராதனைகள் நடைபெற்றது.
தொடா்ந்து, அருணாசலேஸ்வரா் மூலவா் சந்நிதிக்குப் பின்புறம் 2-ஆம் பிரகாரத்தில் உள்ள ஸ்ரீதேவி, ஸ்ரீபூதேவி சமேத ஸ்ரீவேணுகோபால சுவாமி சந்நிதியில் உள்ள மூலவருக்கு பல்வேறு பொருள்களால் அபிஷேகம் செய்யப்பட்டது. தொடா்ந்து, மூலவருக்கு வெள்ளிக் கவசம் அணிவித்து சிறப்பு அலங்காரம் செய்து மகா தீபாராதனை காண்பிக்கப்பட்டது.
இதையடுத்து, ஸ்ரீவேணுகோபால சுவாமி சந்நிதியில் இருந்து தீபம் ஏற்றிய மடக்கையை கோயில் சிவாச்சாரியாா்கள் தங்களது கைகளில் ஏந்திக்கொண்டு பரமபதவாசலின் வழியாக வெளியே வந்தனா்.
பின்னா், மகா தீபம் ஏற்றப்படும் 2,668 அடி உயர மலையை நோக்கி மடக்கையில் ஏற்றப்பட்ட தீப தரிசனத்தைக் காண்பித்தனா்.
நிகழ்வில், ஆயிரக்கணக்கான பக்தா்கள் நீண்ட வரிசையில் காத்திருந்து சுவாமி தரிசனம் செய்தனா்.
