``ஒற்றுமையாக இருந்தோம்; பிரச்னைக்கு பணமே காரணம்; தங்கம் அவர் வீக்னஸ்"- ராதா புகார் குறித்து அம்பிகா

பிரபல நடிகை அம்பிகா மீது அவரது சகோதரியும் பிரபல நடிகையுமான ராதா செக் மோசடி புகார் ஒன்றை சில முன்புகளுக்கு முன்பு கொடுத்திருந்தார்.

அந்தப் புகாரில் 46 கோடி ரூபாய் காசோலை மோசடி செய்ததாக அம்பிகா மீது குற்றச்சாட்டை முன்வைத்திருந்தார்.

இந்நிலையில் நடிகை அம்பிகா இந்தக் குற்றச்சாட்டிற்கு விளக்கம் அளித்திருக்கிறார்.

செய்தியாளர்களைச் சந்தித்த பேசிய அம்பிகா, "என்னுடைய சகோதரி சில தினங்களுக்கு முன்பு என் மீது புகார் கொடுத்திருக்கிறார்.

எனக்கு கொடுக்க வேண்டிய பணத்துக்கு ராதா கொடுத்த 3 காசோலைகள் பவுன்ஸ் ஆகிவிட்டன.

சொத்து தகராறை தீர்க்க காசோலை தந்தது ராதாதான்; அதை நிறுத்தியதும் அவர்தான்; காசோலை மோசடி செய்ததற்காக ராதா மீது நான்தான் புகார் கொடுத்திருக்க வேண்டும்.

தங்கம் என்றால் என் சகோதரிக்கு வீக்னெஸ். என்னுடைய தங்கம் அவரிடம் நிறைய உள்ளது.

ஏ.ஆர்.எஸ் கார்டன் எம்.ஜி.ஆர் கொடுத்தது என்பது தவறானது. அது உழைப்பில் வாங்கியது.

அந்த ஏ.ஆர்.எஸ். கார்டனின் மெயின் ஃபவுன்டேஷன் நான் தான். நான் ஏ.ஆர்.எஸ்.கார்டனை விற்க மாட்டேன், விற்பனை செய்யவும் விட மாட்டேன்.

என் மீதானப் புகார் வேடிக்கையாக இருக்கிறது. புகார் அளித்திருப்பது அதிர்ச்சியாகவும் உள்ளது.

மனிதனுக்கு எவ்வளவு கிடைத்தாலும் போதும் என நினைக்காத ஒரு விஷயம் பணம் தான்.

நானும் என் சகோதரியும் ஒரே மாதிரி தான் உடை அணிவோம். ஒற்றுமையாக இருந்த சகோதரிகள் இடையே பிரச்சனை வர பணம் தான் காரணம்.

எனக்கு கடவுள் நம்பிக்கை அதிகம். கடவுள் உதவி செய்வார்" என்று பேசியிருக்கிறார்.