`கொலைக்காக வருந்தவில்லை'ரூ.40 லட்சம் கடனால் பணக்கார தந்தையை கொன்றுவிட்டு மனைவி மீது பழியை போட்ட மகன்

உத்தரப்பிரதேச மாநிலம் கான்பூரில் உள்ள இந்திரா நகரில் தொழிலதிபர் வினீத் கடந்த 5ம் தேதி இரவு வீட்டில் அடையாளம் தெரியாத மர்ம நபர்களால் குத்திக்கொலை செய்யப்பட்டார். இக்கொலை தொடர்பாக வினீத் மருமகள் ஷெலு, முன்னாள் வீட்டு வேலைக்காரர் விஷால் மற்றும் அவரது கூட்டாளி ராஜ்கிஷோர் ஆகியோர் கைது செய்யப்பட்டுள்ளனர். அவர்களிடம் போலீஸார் நடத்திய விசாரணையில் பல திடுக்கிடும் தகவல்கள் தெரிய வந்துள்ளது.

கைது செய்யப்பட்ட நபர்களிடம் நடத்திய விசாரணையில் விஷால் தான் புதிதாக வாங்கிய சிம்கார்டு மூலம் கொலை செய்யப்பட்ட வினீத் மகன் சுப்ரத்திற்கு 6 முறை போன் செய்திருந்தது தெரிய வந்தது.

பல பெண்களுடன் தொடர்பு

இதையடுத்து சுப்ரத் கடந்த 23ம் தேதி கைது செய்யப்பட்டார். அவரிடம் நடத்திய விசாரணையில், தனது தந்தைக்கு பல பெண்களுடன் தொடர்பு இருப்பதால், அவர் வேறு பெண்ணுடன் வாழ ஆரம்பித்து, தனது சொத்துக்கள் அனைத்தையும் அவள் பெயருக்கு மாற்றிவிடுவார் என்று பயந்து கொலைக்கு சதி செய்ததாக போலீசாரிடம் கூறினார்.

அதோடு தந்தையின் இச்செயலால் தனது தாயார் மிகுந்த மன உளைச்சலுக்கு ஆளானதாகவும் சுப்ரத் தெரிவித்துள்ளார். மேலும் கொலையை தற்கொலையாக மாற்ற திட்டமிட்டு இருந்ததாகவும், ஆனால் கடைசி நேரத்தில் திட்டத்தில் மாற்றம் ஏற்பட்டதாகவும் போலீஸில் தெரிவித்துள்ளார்.

சுப்ரத்தின் தந்தை ஒவ்வொரு மாதமும் அவரது செலவுகளுக்காக சுமார் 40,000 ரூபாய் கொடுத்ததாகவும், அதே நேரத்தில் சுப்ரத் ஒரு மாதத்திற்கு சுமார் 55,000 ரூபாய் கடன் தவணை செலுத்தினார் என்று போலீஸில் தெரிவித்துள்ளார்.

சூதாட்டத்தால் 40 லட்சம் கடன்

இது குறித்து போலீஸ் அதிகாரி ஒருவர் கூறுகையில்,''சுப்ரத்திற்கு சூதாடும் பழக்கம் இருந்துள்ளது. இதனால் அவருக்கு ரூ.40 லட்சம் வரை கடன் ஏற்பட்டுள்ளது. இக்கடனை அடைக்க முடியாமல் இருந்துள்ளார். மற்றொரு பக்கம் சுப்ரத் மற்றும் அவரது மனைவிக்கு வினீத் கடுமையான நிதி கட்டுப்பாடுகளை விதித்து இருந்தார். இதனால்தான் சுப்ரத் தனது தந்தையை கொலை செய்ய முடிவு செய்து முன்னாள் வீட்டு வேலைக்காரர்களை அழைத்து ரூ.6 லட்சம் கொடுப்பதாக கூறி தனது தந்தையை கொலை செய்யும்படி தெரிவித்துள்ளார்.

அதோடு கொலை செய்துவிட்டு பிடிபட்டுக்கொண்டால் தனது மனைவியின் பெயரை சொல்லி அவரை சிக்க வைத்துவிடும்படி கூறி இருந்தார். ஷெலுவிடம் விசாரித்தபோது தனது கணவரைப் பாதுகாப்பதற்காக தான் சிக்கிக்கொண்டதாக போலீஸிடம் கூறினார்.

`கொலை செய்ததற்காக வருந்தவில்லை'

சுப்ரத்திடம் போலீஸார் விசாரித்தபோது தனது தந்தையை கொலை செய்ததற்காக தான் வருத்தப்படவில்லை என்றும், அதேசமயம் கத்தியால் குத்திக்கொலை செய்ததுதான் வருத்தமாக இருப்பதாகவும் தெரிவித்துள்ளார். மேலும் இதில் தனது மனைவியை தேவையில்லாமல் சிக்க வைத்துவிட்டதாகவும் சுப்ரத் போலீஸாரிடம் தெரிவித்துள்ளார்.

கான்பூர் போலீஸ் கமிஷனர் ரகுபீர் லால் இது குறித்து கூறுகையில், அழைப்பு விவர பதிவுகள், சிசிடிவி காட்சிகள், சாட்டிங் பதிவுகள் மற்றும் பிற அறிவியல் ஆதாரங்களின் அடிப்படையில் விசாரணையில், சுப்ரத் தனது தந்தையை கொலை செய்ய விஷால் மற்றும் ராஜ் கிஷோர் ஆகியோருடன் சதி செய்ததது தெரிய வந்தது. மேலும் விசாரணையில் ஷெலுவுக்கு எதிராக எந்த ஆதாரமும் இல்லை. அவரை விடுவிக்க நீதிமன்றத்திற்கு செல்லும் முன் அவருக்கு இதில் இருக்கும் பங்கு குறித்து மீண்டும் விசாரிக்க முடிவு செய்துள்ளதாகவும் அவர் குறிப்பிட்டார்.

நிதி நெருக்கடியால் சுப்ரத், சொந்த கடையில் இருந்து மருந்துகளை எடுத்து விஷால் மூலம் விற்று பணம் திரட்டத் தொடங்கினார். வினீத் அவரைப் பலமுறை பிடித்து, அடிக்கடி ஊழியர்கள் முன்னிலையில் திட்டினார்," என்றும் அவர் கூறினார்.