சமூகத்தின் தேவை வெறும் பட்டதாரி அல்ல! - சான்றிதழ்களைத் தாண்டிய ஒரு தேடல்

வாசகர்களை, எழுத்தாளர்களாக, பங்களிப்பாளர்களாக மாற்றும் விகடனின் ‘My Vikatan’ முன்னெடுப்பு இது. இந்தக் கட்டுரையில் இடம்பெற்றுள்ள கருத்துகள் அனைத்தும், கட்டுரையாளரின் தனிப்பட்ட கருத்துகள். விகடன் தளத்தின் கருத்துகள் அல்ல - ஆசிரியர்

இன்றைய சூழலில் பெரும்பாலான தவறுகள் நடந்தேறுவதில் "படித்தவர்களின் பங்கு” அதிகம் உள்ளதாக கூறுவது என்பது கசப்பான உண்மை. மேலும் இது ஒரு விவாதப் பொருளாகியுள்ளது என்பது குறிப்பிடத்தக்கது.

இதற்கு படித்துவிட்டாலே “எல்லாம் எமக்குத் தெரியும்” என்கிற மமதையே முக்கிய காரணமாக விளங்குகிறது என்பதில் மாற்றுக்கருத்து ஏதுமில்லை. இதனை ஆழமாக சிந்திக்கும் போது திருக்குறள் போன்று 7 சீர்கொண்ட வரிகள் கொண்டு கிடைத்த என் மனதின் குரல்.

                              “சான்றிதழ் பெற்றோரெல்லாம் சான்றோர் அல்லர்

 சாதித்தவர்களே சான்றோர் ஆவர்”

கல்விக்கும் பண்பிற்கும் உள்ள இடைவெளி

உண்மையான சான்றாண்மை என்பது அறிவை (Knowledge) விவேகமாக (Wisdom) மாற்றுவதில் உள்ளது. வெறும் பட்டயங்கள் ஒருவருக்குப் பெருமை சேர்க்கலாம். ஆனால் பன்முக அறிவும் (General Knowledge), சமூக அக்கறையும், ஒரு துறையில் நிகழ்த்தும் குறிப்பிடத்தக்க மாற்றமுமே ஒருவரை உயர்ந்த இடத்தில் வைக்கும்.

அதனால்தான், பாடப்புத்தகங்களுக்கு அப்பாற்பட்ட வாசிப்பும், "ஏன், எதற்கு, எப்படி?" என்ற தேடலும் ஒரு மனிதனை வெறும் 'பட்டதாரி' என்ற நிலையிலிருந்து 'சான்றோன்' என்ற நிலைக்கு உயர்த்துகிறது.

 சான்றிதழ் (Certificate): இது ஒரு நபர் ஒரு குறிப்பிட்ட பாடத்திட்டத்தைப் படித்து முடித்தார் என்பதற்கான அத்தாட்சி மட்டுமே.

சான்றோன் (Noble Person): கற்ற கல்வியைத் தன் வாழ்க்கையில் ஒழுக்கமாகவும், சமூகத்திற்குப் பயனுள்ளதாகவும் மாற்றுபவரே சான்றோர். 

சான்றோன் vs  சாதனையாளர்

மேற்கூறியவற்றில் தெளிவு பெற இதனை வேறுபடுத்தி பார்ப்பது மிக முக்கியமானது:

சாதனையாளர் (Achiever): தான் கற்ற ஒரு குறிப்பிட்ட துறையில் புதிய கண்டுபிடிப்புகளை நிகழ்த்துபவர் அல்லது அந்தத் துறையில் உச்சம் தொடுபவர் "சாதித்தவர்" ஆகிறார். இது அவருடைய தனிப்பட்ட திறமை மற்றும் உழைப்பைக் குறிக்கிறது.

சான்றோன் (Polymath/Noble Person): சான்றோன் என்பவர் பன்முகத்தன்மை கொண்டவர். தான் கற்ற கல்விக்கும் மேலாக, உலகியல் அறிவையும், அறநெறிகளையும் உணர்ந்து, சமூகத்தோடு இணைந்து வாழ்பவர்.

சான்றாண்மை என்பது ஒரு வாழ்வியல் நெறி

சான்றிதழ் என்பது ஒரு குறிப்பிட்ட காலத்தில் பெற்று முடிப்பது. ஆனால், 'சான்றோன்' என்பது ஒரு வாழ்நாள் முழுவதும் கடைப்பிடிக்க வேண்டிய பண்பு.

குடும்பத்திற்காக: ஒரு பொறுப்பான தலைவனாக, நல்வழிகாட்டியாகத் தன் குடும்பத்தைச் செதுக்குபவன் முதல் சான்றோன்.

சமூக மாற்றத்திற்காக: தான் கற்ற கல்வியோ அல்லது அனுபவமோ, அது தன்னோடு முடிந்துவிடாமல் சமூகத்தின் முன்னேற்றத்திற்காகப் பயன்பட வேண்டும்.

சாதனை: சான்றிதழ்களைத் தாண்டிய பயணம்:

சாதனையாளர்களை உற்றுநோக்கினால், அவர்கள் பட்டங்களை விடத் தேடல்களுக்கே முக்கியத்துவம் அளித்துள்ளனர். இதை இருவழிகளில் காணலாம்.

1. ஒருங்கிணைந்த கல்வி: நெல்சன் மண்டேலா, காந்தியடிகள், டாக்டர் அப்துல் கலாம் போன்றோர் பாடத்திட்டத்தைத் தாண்டி, தத்துவங்களையும் இலக்கியங்களையும் வாசித்ததால்தான் "நாம் யார்?" என்ற தெளிவைப் பெற்றனர்.

2. அனுபவக் கல்வி: காமராஜர், ஜி.டி. பிர்லா, ஜி.டி. நாயுடு போன்ற தலைவர்கள் மற்றும் பல வெற்றிகரமான தொழில்முனைவோர் முறையான உயர்கல்விச் சான்றிதழ்கள் இல்லாவிட்டாலும், வரலாற்றையும் முன்னோர் வாழ்வியலையும் ஆழ்ந்து வாசித்தவர்கள்.

அறிவெனும் பொக்கிஷமும் தகுதியெனும் சாவியும்

வாழ்வில் வெற்றி என்பது ஒரு பொக்கிஷ அறை போன்றது. அந்த அறையைத் திறக்க உதவும் சாவிதான் 'சான்றிதழ்'.  அந்த சாவி (சான்றிதழ்) கதவைத் திறக்க மட்டுமே உதவும். ஆனால், பொக்கிஷ அறைக்குள் இருக்கும் பொருட்களைச் சமைத்து உண்ணத் தெரிந்திருக்க வேண்டும். அதாவது, பெற்ற பட்டங்களை (திறன் கல்வி) அறநெறிகளோடும் (மதிப்புக் கல்வி), சமூக அக்கறையோடும் பயன்படுத்தத் தெரிந்திருக்க வேண்டும். 

பொக்கிஷ அறையினைத் திறந்த பிறகு சாவி (சான்றிதழ்) –க்கு எந்த வேலையும் கிடையாது. ஆதலால், அவை ஒரு மூலையில் வைக்கப்படும் என்பது குறிப்பிடத்தக்கது. அதே நேரத்தில்,  எல்லாப் பூட்டுகளையும் ஒரே சாவியால் திறந்துவிட முடியாது. பொக்கிஷத்தின் மதிப்பு கூடக் கூட, அதைப் பாதுகாக்கும் பூட்டுகளும் வலிமையானதாக மாறும்.

பூட்டுக்கு ஏற்ற சாவி (திறனை மேம்படுத்துதல்):

நாம் அனைவரும் ஒன்றை ஆழமாகப் புரிந்துகொள்ள வேண்டும். நாம் அடைய விரும்பும் இலக்கு (பொக்கிஷம்) எவ்வளவு பெரியதோ, அந்த அளவிற்கு உங்களின் தகுதியும் (சாவி) நுட்பமானதாக இருக்க வேண்டும்.

ஒரு சாதாரண வேலை என்பது ஒரு சிறிய பூட்டு; அதற்கு ஒரு அடிப்படைச் சான்றிதழ் போதும். ஆனால் 'சான்றோன்' ஆவதும், வரலாற்றில் இடம்பெறும் வகையில் 'சாதிப்பதும்' ஒரு மிகப்பெரிய பொக்கிஷம். அதைத் திறக்க வெறும் பாடப்புத்தகச் சான்றிதழ் எனும் சாவி மட்டும் போதாது.

திறமை எனும் தச்சர்:

பூட்டின் அளவிற்கு ஏற்பச் சாவியைச் செதுக்குவது ஒரு பொறுப்பான செயல். அந்தச் சாவியைச் செதுக்கும் கருவிகள்தான்:

பன்முக வாசிப்பு: தன் துறை மட்டுமன்றி பிற துறைகளையும் அறிதல்.

மதிப்புக் கல்வி: அறநெறிகளுடன் வாழ்தல்.

சுய தேடல்: "நாம் யார்?" என்ற புரிதலை வளர்த்தல்.

கல்லாதது உலகளவு (The Vast Unknown)

சான்றிதழ் பெற்றவர்கள்"கற்றது கையளவு" என்ற வட்டத்திற்குள்ளேயே சுருங்கிவிடுகிறார்கள். இவர்களுக்கு சமூக நீதி போன்ற பிற துறைகளைப் பற்றிய அறிவு மிகக் குறைவாகவே இருக்கிறது என்பது கவலைக்குரியது.

ஒரு துறை சார்ந்த படிப்பு ஒருவருக்குத் தன்னம்பிக்கையைத் தரலாம், ஆனால் அதுவே ஒருவரை முழுமையான மனிதனாக்காது. தன்னைச் சுற்றியுள்ள மற்ற துறைகளைப் பற்றி அறியாத போது, ஒருவரால் சரியான சமூக முடிவுகளை எடுக்க முடிவதில்லை.

"ஒரு துறையில் மட்டும் அறிஞராக இருப்பது, 

அந்தத் துறையின் சிறைக்குள் கைதியாக இருப்பதற்குச் சமம்."

சான்றிதழ் அல்ல... சாதனையே அடையாளம்!

சான்றிதழ் என்பது கல்வி நிறுவனங்களால் வழங்கப்படும் ஒரு அங்கீகாரம் மட்டுமே. ஆனால், சான்றாண்மை என்பது ஒரு மனிதன் தனக்குத் தானே வழங்கிக்கொள்ளும் உயரிய பண்பு.

பொறுப்புணர்வு: "இந்தச் சமூகம் என் கையில்" என்று எண்ணும் ஒரு மாணவன், பாடப்புத்தகத்தைத் தாண்டி சமூகத்தைப் படிக்கத் தொடங்குவான்.

பார்வை: குறுகிய நோக்கம் கொண்ட கல்வி ஒருவரை வேலைக்காரனாக மாற்றும்; ஆனால் அகலப்பார்வை கொண்ட கல்வி ஒருவரைத் தலைவனாக (Leader) மாற்றும்.

சாதனை: தன்னலம் கடந்து சமுதாய நலனுக்காகத் தன் அறிவைப் பயன்படுத்துபவனுக்கு எந்தச் சான்றிதழும் தேவையில்லை. வரலாறு அவனையே ஒரு பாடமாகப் போற்றும்.

நோக்கம், நேர்மை, நேர்கொண்ட அகலப்பார்வை

நாளைய நற்சமுதாயம் என் கையில் என நோ்கொண்ட அகலப்பார்வையுடன் செயல்பட்டால் சாதிக்கலாம்... சான்றோனாக வலம் வரலாம்...

"நாளைய நற்சமுதாயம் என் கையில்" என்ற அந்தப் பொறுப்புணர்வு ஒருவருக்கு வந்துவிட்டால், அவர் தன்னை ஒரு குறுகிய வட்டத்திற்குள் (சான்றிதழ்) சுருக்கிக்கொள்ள மாட்டார். அவருடைய பார்வை 'நேர்கொண்ட அகலப்பார்வையாக' மாறும். அப்படிப்பட்ட ஒருவருக்குத் தடையாய் இருக்கும் பூட்டுகள் தானாகவே உடையும்.

இதன் மூலம் கல்வி என்பது ஒரு ஏணி போன்றது  அது உங்களை உயரங்களுக்கு அழைத்துச் செல்லும். ஆனால், அந்த உயரத்தில் நீங்கள் எப்படிச் செயல்படுகிறீர்கள் என்பது உங்கள் வாசிப்பிலும், பண்பிலுமே உள்ளது.

எனவே, பெற்றோர்கள் அனைவரும் தம் பிள்ளைகளைப் பாடப்புத்தகங்களைத் தாண்டிய உலகளாவிய அறிவைத் தேடிப் பெற தாங்களும் பல்வேறு புத்தகங்களை வாசித்து உதவிப்புரிய முன்வரவேண்டும். அப்போதுதான் சான்றிதழ் பெற்றவர்கள் அனைவரும் சான்றோராகவும் பரிணமிக்க முடியும். 

சிந்தனைச் சுருக்கம்

அர்த்தமற்ற பட்டங்கள்: சமூகப் பொறுப்புணர்வோ அல்லது அறமோ இல்லாத ஒருவரிடம் இருக்கும் எத்தனை உயரிய பட்டங்களும் வெறும் காகிதங்களே. அவை ஒருவரைச் 'சான்றோன்' என்ற நிலைக்கு உயர்த்தாது. இதனை கல்வி  நிறுவனங்கள் தங்களுடைய ஆசிரியப் பெருமக்கள் மூலம் மாணவர்களுக்கு உணரத்த முன்வர வேண்டும். 

சான்றாண்மைக்கான தகுதி: பட்டம் பெற்றிருப்பது ஒரு கூடுதல் தகுதியாக இருக்கலாம், ஆனால் அதுவே அடிப்படைத் தகுதியல்ல. பட்டம் பெறாத ஒருவராலும் சமூகத்தில் மிகப்பெரிய மாற்றங்களை நிகழ்த்த முடியும்.

சாதனையே சாட்சி: "மக்களின் நல்வாழ்வு" என்ற இலக்கோடு செயல்பட்டு, அதில் ஒரு சிறு மாற்றத்தையேனும் நிகழ்த்துபவரே உண்மையான சாதனையாளர். அந்தச் சாதனையே அவருக்குச் 'சான்றோன்' என்ற மகுடத்தைச் சூட்டுகிறது.

விகடனில் உங்களுக்கென ஒரு பக்கம்...

உங்கள் படைப்புகளைச் சமர்ப்பிக்க - my@vikatan.com என்ற மின்னஞ்சலுக்கு அனுப்புங்கள்!

ஏதோ ஓர் ஊரில், எங்கோ ஒரு தெருவில் நடந்த ஒரு விஷயம்தான் உலகம் முழுக்க வைரலாகிறது. உங்களைச் சுற்றியும் அப்படியொரு வைரல் சம்பவம் நடந்திருக்கலாம்... நடந்துகொண்டிருக்கலாம்... நடக்கலாம்..! அதை உலகுக்குச் சொல்வதற்காகக் களம் அமைத்துக் கொடுக்கிறது #MyVikatan. இந்த எல்லையற்ற இணையவெளியில் நீங்கள் செய்தி, படம், வீடியோ, கட்டுரை, கதை, கவிதை என என்ன வேண்டுமானாலும் எழுதலாம். ஃமீம்ஸ், ஓவியம் என எல்லாத் திறமைகளையும் வெளிப்படுத்தலாம்.