திருச்சி மேற்கு: `திக் திக் நிமிடங்கள்' - நெருக்கி வந்த TVK; தப்பித்த DMK; KN Nehru வென்றது எப்படி?

திருச்சி மேற்கு தொகுதி தேர்தல் முடிவுகள், 2026 சட்டமன்றத் தேர்தலின் மிகவும் விறுவிறுப்பான மற்றும் பரபரப்பான ஒரு அதிசயமாக மாறியுள்ளது. தி.மு.க-வின் 'நங்கூரம்' என்று அழைக்கப்படும் அமைச்சர் கே.என். நேரு, கடும் போராட்டத்திற்குப் பிறகு மீண்டும் தனது கோட்டையைத் தக்கவைத்துள்ளார்.

திருச்சி மாவட்டத்தின் அரசியல் இதயமாகக் கருதப்படும் திருச்சி மேற்கு தொகுதியில், காலையிலிருந்தே நிலவிய சூழல் தி.முக. தொண்டர்களிடையே பெரும் பதற்றத்தை ஏற்படுத்தியது. வாக்கு எண்ணிக்கை தொடங்கிய முதல் சுற்றிலிருந்தே அமைச்சர் கே.என். நேரு பின்னடைவைச் சந்தித்து வந்தார்.

ஒரு கட்டத்தில் த.வெ.க வேட்பாளரின் ஆதிக்கம் ஓங்கி நின்றதால், தி.மு.க-வின் மிக முக்கியமான விஐபி ஒருவரே தோல்வியைத் தழுவுவாரோ என்ற அச்சம் நிலவியது.

திக் திக் நிமிடங்கள்: பின்னடைவு முதல் வெற்றி வரை

தபால் வாக்குகள் மற்றும் தொடக்கச் சுற்றுகளில் கே.என். நேரு பின்தங்கியே இருந்தார். சுமார் 10 சுற்றுகள் வரை இந்த இழுபறி நீடித்தது. பிற்பகலுக்குப் பிறகு, நகர்ப்புற வாக்குகள் எண்ணப்பட்டபோது நேரு மெல்ல மெல்ல முன்னிலை பெறத் தொடங்கினார்.

அனைத்து சுற்றுகளும் முடிவடைந்த நிலையில், சுமார் 4,000-க்கும் மேற்பட்ட வாக்குகள் என்ற குறைந்த வித்தியாசத்தில் கே.என். நேரு வெற்றி பெற்றுள்ளதாக அறிவிக்கப்பட்டுள்ளது.

கே.என். நேருவின் அரசியல் வரலாறு திருச்சியின் வளர்ச்சியோடு பிணைக்கப்பட்டது. 1989-ல் முதன்முதலில் லால்குடியில் வென்றது முதல், திருச்சியை தி.மு.க-வின் அசைக்க முடியாத கோட்டையாக மாற்றியதில் இவருக்குப் பெரும் பங்கு உண்டு. குறிப்பாக, திருச்சி மேற்கு தொகுதியில் பலமுறை வென்று, அப்பகுதியின் உள்கட்டமைப்பை மாற்றியமைத்தவர்.

இருப்பினும், இந்த 2026 தேர்தலில் 4,000 வாக்குகள் என்ற சொற்ப வித்தியாசத்தில் அவர் பெற்றிருக்கும் வெற்றி, தொகுதியில் நிலவும் அரசு எதிர்ப்பு அலையை அல்லது புதிய சக்திகளின் எழுச்சியைக் கோடிட்டுக் காட்டுகிறது.

அமைச்சர் மா.சுப்பிரமணியன், சபாநாயகர் அப்பாவு போன்ற மூத்த தலைவர்கள் பின்னடைவைச் சந்தித்து வரும் வேளையில், நேருவின் இந்த மில்லிமீட்டர் அளவிலான வெற்றி தி.மு.க-விற்கு ஒரு நிம்மதிப் பெருமூச்சாக அமைந்துள்ளது.

வெற்றி வித்தியாசத்தை விட, "வெற்றி" என்பதே முக்கியம் என்ற அரசியல் இலக்கணத்தின்படி கே.என். நேரு மீண்டும் சட்டப்பேரவைக்குச் செல்கிறார். ஆனால், இந்தக் கடும் போட்டி அவருக்கு மட்டுமல்ல, ஒட்டுமொத்த தி.மு.க-வுக்கும் ஒரு எச்சரிக்கை மணியாகவே பார்க்கப்படுகிறது.