`நான் தற்கொலை செய்யாமல் இருந்ததற்கு காரணம் அவள் மட்டும் தான்!' - ஸ்ரீசாந்த் பகிரும் காதல்

இரண்டு உலகக் கோப்பைகளை வென்ற அணியில் இடம்பிடித்த வீரர் ஸ்ரீசாந்த், அணியின் வேகப்பந்து வீச்சு துறையில் நட்சத்திரமாக வலம் வந்தவர். ஆனால், ஒரே ஒரு குற்றச்சாட்டு அவரது கிரிக்கெட் வாழ்வையே புரட்டிப் போட்டது. இந்திய அணியின் முன்னாள் வேகப்பந்து வீச்சாளர் ஸ்ரீசாந்த், 2013-ம் ஆண்டு ஐபிஎல் தொடரில் ஸ்பாட் ஃபிக்சிங் புகாரில் சிக்கி, திகார் சிறையில் கழித்த அந்த இருண்ட நாட்கள் குறித்தும், அதிலிருந்து தன்னை மீட்டெடுத்த காதல் குறித்தும் சமீபத்திய பேட்டி ஒன்றில் உருக்கமாகப் பகிர்ந்துள்ளார்.

திகார் சிறையும்... தற்கொலை எண்ணமும்!

2013 ஐபிஎல் தொடரில் ராஜஸ்தான் ராயல்ஸ் அணிக்காக விளையாடியபோது, ஸ்ரீசாந்த் ஸ்பாட் ஃபிக்சிங் புகாரில் கைது செய்யப்பட்டார். இது இந்திய கிரிக்கெட் வட்டாரத்தில் பெரும் அதிர்வலைகளை ஏற்படுத்தியது. இந்தச் சம்பவம் குறித்துப் பேசிய ஸ்ரீசாந்த், "டெல்லி போலீஸ் காவலில் 12 நாட்களும், திகார் சிறையில் 27 நாட்களும் இருந்தேன். அந்த அனுபவம் என்னை முற்றிலும் மாற்றிவிட்டது. சாதாரண வாழ்வில் நாம் எதிர்கொள்ளும் பிரச்னைகள் எல்லாம் ஒன்றுமே இல்லை என்பதை அங்குதான் உணர்ந்தேன். ஒரு விசாரணைக்காகப் பல ஆண்டுகள் ஆகும் என்று கேள்விப்பட்டிருக்கிறேன். அந்தச் சூழல் என்னை மேலும் வலிமையாக்கியது" என்றார்.

தொடர்ந்து பேசிய அவர், "அந்த நாட்களில் என் அம்மா, அப்பா மற்றும் என் அக்கா மகளைப் பற்றித்தான் சிந்தித்துக்கொண்டிருந்தேன். புகார்கள் எழுந்தபோது, அவர்களைப் பள்ளிக்குக்கூட அனுப்ப வேண்டாம் என்று கூறிவிட்டேன். சுமார் ஒரு மாத காலம், ஒட்டுமொத்த தேசத்தின் கவனமும் என் மீது மட்டுமே இருந்தது. அந்த அழுத்தமான சூழலில், நான் தற்கொலை செய்துகொள்ளாமல் இருந்ததற்கு முக்கியக் காரணம் என் மனைவி புவனேஸ்வரிதான்" என்று நெகிழ்ச்சியுடன் குறிப்பிட்டார்.

காதல் தந்த நம்பிக்கை!

ஸ்ரீசாந்த் தனது மனைவி புவனேஸ்வரியுடனான காதல் கதையையும் அந்தப் பேட்டியில் பகிர்ந்துகொண்டார். ஜெய்ப்பூரைச் சேர்ந்த சேகாவத் அரச குடும்பத்தைச் சேர்ந்தவரான புவனேஸ்வரியை, 2007-ம் ஆண்டு ஒரு பள்ளி விழாவில் விருந்தினராகச் சென்றபோது முதன்முதலில் சந்தித்துள்ளார். அப்போது புவனேஸ்வரி 10-ம் வகுப்பு படித்துக்கொண்டிருந்தார். "முதல் சந்திப்பு பள்ளியில், அடுத்த நாள் மைதானத்தில் இரண்டாவது சந்திப்பு, மூன்று ஆண்டுகளுக்குப் பிறகு ஒரு நீச்சல் குளம் அருகே மூன்றாவது சந்திப்பு, பின்னர் இந்தூரில் நான்காவது சந்திப்பு. ஐந்தாவது சந்திப்பில், நான் ஜாமீனில் வெளியே வந்தபோது, எங்களுக்குத் திருமண நிச்சயதார்த்தம் நடந்தது" என்று ஸ்ரீசாந்த் நினைவுகூர்ந்தார்.

"2011 உலகக் கோப்பையை வென்றால், உன்னைத் திருமணம் செய்துகொள்வேன் என்று 2010-லேயே அவரிடம் வாக்குறுதி அளித்திருந்தேன். என் மீது குற்றச்சாட்டுகள் சுமத்தப்பட்டபோது, வழக்கறிஞர்களுடன் பேசுவதில் அவர்தான் முக்கியப் பங்காற்றினார். ஒட்டுமொத்த நாடும் என்னை ஒரு வில்லனைப் போலப் பார்த்தபோது, அவரும் அவரது குடும்பத்தினரும் எனக்குப் பாறை போல உறுதுணையாக நின்றார்கள். அவர் என் வாழ்க்கையில் இருந்ததால்தான், எனக்கு ஜாமீன் கிடைத்தது" என்று உருக்கமாகத் தெரிவித்தார்.

இந்திய அணிக்காக 27 டெஸ்ட், 53 ஒருநாள் மற்றும் 10 டி20 போட்டிகளில் விளையாடியுள்ள ஸ்ரீசாந்த், 2007 டி20 உலகக் கோப்பை மற்றும் 2011 ஒருநாள் உலகக் கோப்பை வென்ற அணிகளில் இடம்பெற்றவர். ஸ்பாட் ஃபிக்சிங் புகாரில் சிக்கிய ஸ்ரீசாந்த் மற்றும் மற்ற வீரர்கள் 2015-ம் ஆண்டு குற்றச்சாட்டுகளிலிருந்து விடுவிக்கப்பட்டனர். ஸ்ரீசாந்த் - புவனேஸ்வரி தம்பதியினர் 2013-ம் ஆண்டு திருமணம் செய்துகொண்டனர்.