"நான் பைபிள் படித்திருக்கிறேன்; இப்படித்தான் பேசுவேன்!"- எம்எல்ஏ ராஜேந்திரனுக்கு மரிய வில்சன் பதில்

பட்டஜெட் விவாதக் கூட்டத்தொடரின் நான்காவது நாள் இன்று (ஆகஸ்ட்.10) சட்டமன்றத்தில் நடைபெற்று வருகிறது.

இந்நிலையில் விவாதத்தின்போது, "சொற்பொழிவாளன் மற்றும் தமிழ் ஆர்வலர் என்ற முறையில் சொல்கிறேன். நிதியமைச்சர் (மரிய வில்சன்) ஆங்கிலத்தில் புலமை பெற்றவராக இருப்பார் என்று நினைக்கிறேன்.

அவரது ஆங்கிலம் மிகவும் நேர்த்தியாக இருந்தது. ஆனால் அவர் பட்ஜெட்டை வாசிக்கும்போது தமிழில் சில சொற்றொடர்களை அவர் பேசமால் விட்டுவிட்டார். வரும் காலங்களில் நிதியமைச்சர் பிழையின்றி தமிழில் பேச வேண்டும் என்று பணிவுடன் கேட்டுக்கொள்கிறேன்" என எம்.எல்.ஏ ராஜேந்திரன் கூறினார்.

அதற்கு சபாநாயகர், ``எம்.எல்.ஏ ராஜேந்திரன் பேசும்போது பட்ஜெட் என்று சொல்கிறார். தமிழில் நிதிநிலை அறிக்கை என்று சொன்னால் நன்றாக இருக்கும்" என்றார்.

தொடர்ந்து எம்.எல்.ஏ ராஜேந்திரன் கருத்துக்கு பதில் கொடுக்கும் வகையில் பேசிய நிதியமைச்சர் மரிய வில்சன், ``25 ஆண்டுகளாக கல்வித்துறையில் இருந்திருக்கிறேன். என்னுடைய கம்யூனிகேஷன் எல்லாம் ஆங்கிலத்தில்தான் இருந்திருக்கின்றன.

இந்த மாமன்றத்தில் கொஞ்ச நாளாகவே உருவ கேலி, சாதி மற்றும் பெண்களைக் கேலி செய்தவர்கள், இப்போது மொழி கேலிக்கு வந்துவிட்டார்கள்.

கிறிஸ்தவம் எனக்கு ஒரு மொழி கற்றுக்கொடுத்திருக்கிறது. அன்பு மொழி, அமைதி மொழி, இரக்கத்தின் மொழி. எவ்வளவு தமிழ் படித்தாலும், பாதி பேருக்கு இது தெரியாது.

நான் பைபிள் படித்திருக்கிறேன். நான் இப்படித்தான் பேசுவேன், என்னுடைய ஸ்டைல் இதுதான். எம்.எல்.ஏ ராஜேந்திரனுக்காக என்னை மாற்றிக்கொள்ள முடியாது" என்று மரிய வில்சன் தெரிவித்திருக்கிறார்.