மானாமதுரை: முன்னாள் அமைச்சர் தமிழரசியை வீழ்த்தி மகுடம் சூடிய ‘போட்டோகிராபர்’ - யார் இந்த இளங்கோவன்?

காங்கிரஸின் பாரம்பரியம், திமுக - அதிமுகவின் அதிகார பலம் எனப் பலமான அடித்தளம் கொண்ட சிவகங்கை மண்ணில், இம்முறை மொத்தமாக 'ஆப்பு' வைத்திருக்கிறது தவெக.

ஜாம்பவான்களைச் சாய்த்து நான்கு தொகுதிகளையும் ஒட்டுமொத்தமாக அள்ளிய தவெக-வின் இந்த வேகம், தென்மாவட்ட அரசியலில் பெரும் அதிர்வை ஏற்படுத்தியுள்ளது.

திராவிட, தேசிய கட்சிகளுக்கு முற்றுப்புள்ளி வைத்து, சிவகங்கை மாவட்டத்தின் 4 தொகுதிகளிலும் தனது 'வெற்றிக் கோட்டையாக' மாற்றியிருக்கிறார் தளபதி விஜய்.

தி.மு.க. மற்றும் அதிமுகவின் கோட்டையாகக் கருதப்பட்ட மானாமதுரை (தனி) மண்ணில், முன்னாள் ஆதிதிராவிடர் நலத்துறை அமைச்சரும், தற்போதைய சிட்டிங் எம்.எல்.ஏ-வுமான தமிழரசியை வீழ்த்தி ‘ஜாக்பாட்’ அடித்திருக்கிறார் த.வெ.க-வின் இளங்கோவன்.

44 வயதான இளங்கோவன், தொழில் ரீதியாக ஒரு புகைப்படக் கலைஞர்.

திருப்புவனம் மேற்கு ஒன்றியச் செயலாளராகப் பணியாற்றிய அனுபவத்தை வைத்து, ஆளுங்கட்சியின் அதிகார பலத்தை அசால்ட்டாக ஓரம் கட்டியிருக்கிறார்.

இவருக்குப் பின்னால் உறுதுணையாக நின்றது இவரது குடும்பம் தான். மளிகைக்கடை நடத்தி வரும் மனைவி ஜெயலெட்சுமி ஒரு மகன் மற்றும் ஒரு மகள் என சிறிய குடும்பத்தைச் சேர்ந்த இளங்கோவன், ஒரு சராசரி மனிதனாலும் அரசியலில் சாதிக்க முடியும் என நிரூபித்துள்ளார்.

இங்கே பா.ஜ.க. சார்பில் களம் கண்ட பொன். பாலகணபதி கடும் போட்டி கொடுத்தபோதிலும் இளங்கோவனின் பிரச்சாரத்திற்கு முன்னால் ‘சிட்டிங்’ எம்.எல்.ஏ-வின் செல்வாக்கு எடுபடவில்லை.

வாக்கு எண்ணிக்கையின் இறுதியில் 1,208 வாக்குகள் திமுகவின் தமிழரசியைவிட கூடுதலாகப் பெற்று வாகை சூடினார்.

"பழைய முகங்கள் வேண்டாம், புதிய ரத்தம் பாயட்டும்" என்ற வாக்காளர்களின் மனவோட்டத்தை இளங்கோவன் சரியாகப் பிடித்துக்கொண்டார்.

விஜய்யின் ‘தளபதி’யாக மானாமதுரை மண்ணில் இளங்கோவன் நிகழ்த்தியிருக்கும் இந்த வெற்றி, தமிழக அரசியலின் ‘டாப் ஆங்கிள்’ ஷாட்!