முறுக்கு ருசி: கைச்சுற்றில் பிறக்கும் சுவை... 25 ஆண்டுகளாகத் தொடரும் தீபாவளி பாரம்பர்யம்! - வீடியோ

தீபாவளி வரப்போகுதுன்னாலே வீட்டில் என்னென்ன பலகாரம் செய்யலாம் என்ற பேச்சு ஒருபுறம் தொடங்கிவிடும். முறுக்கு, அதிரசம், ஜாங்கிரி என ஒவ்வொன்றுக்கும் தனித்தனி ரசிகர்கள் இருப்பார்கள். சிலருக்கு முறுக்கின் மொறுமொறுப்பு பிடிக்கும்; இன்னும் சிலருக்கோ பாகு இறங்கிய அதிரசம்தான் முதல் தேர்வு. இப்படி ஒவ்வொருவருக்கும் ஒவ்வொரு விருப்பம் இருந்தாலும், எல்லோரையும் ஒன்றாக இணைப்பது அந்தப் பலகாரங்களின் பாரம்பர்யச் சுவைதான்.

அந்தச் சுவையைத் தேடி வருபவர்களுக்கான ஓர் இடமாக இருக்கிறது சிவசூர்யா கைச்சுற்று முறுக்கு கடை.

கைகளில் உருவாகும் முறுக்கின் தனி ருசி ! 

இந்தக் கடையைப் பற்றிப் பேசும்போது முதலில் நினைவுக்கு வருவது இவர்களுடைய கைச்சுற்று முறுக்குதான். இன்றைக்குப் பலகாரங்கள் தயாரிக்க இயந்திரங்கள் வந்துவிட்டாலும், கைகளால் மாவைச் சுழற்றி முறுக்காக உருவாக்கும் அந்தப் பாரம்பர்ய முறையை இவர்கள் இன்னும் கைவிடவில்லை.

மாவை எடுத்து, கைகளால் லாவகமாகச் சுழற்றி, ஒரே அளவில் முறுக்குகளை உருவாக்கும் அந்தக் காட்சியே பார்ப்பதற்கு அவ்வளவு அழகு! தயாரான முறுக்குகள் எண்ணெயில் வெந்து வெளியே வரும்போது கிடைக்கும் அந்த மொறு மொறுப்பும், சுவையும் தான் இதன் ஸ்பெஷல். ஒரு முறுக்கு சாப்பிட்டால் இன்னொன்று எடுத்துச் சாப்பிடத் தோன்றும் என்பதுதான் இதன் தனி ஈர்ப்பு!

முறுக்கு மட்டுமா... இனிப்புக்கும் இங்கே தனி இடம்!

கைச்சுற்று முறுக்குதான் இந்தக் கடையின் அடையாளம் என்றாலும், இங்கே கிடைக்கும் பலகாரங்களின் பட்டியல் அதோடு முடிந்துவிடுவதில்லை. அச்சு முறுக்கு, ஜாங்கிரி, மைசூர்பாகு, அதிரசம், முந்திரி கொத்து, ரவா லட்டு, கடலை உருண்டை எனப் பல வகையான இனிப்பு மற்றும் கார வகைகள் இங்கே தயாராகின்றன.

குறிப்பாக, ஜாங்கிரி தயாராகும் விதமே தனி அழகு. மாவைச் சுழற்றி எண்ணெயில் பக்குவமாகப் பொரித்து, பின்னர் சர்க்கரைப் பாகில் முக்கி எடுக்கும்போது கிடைக்கும் அந்த நிறமும் சுவையும் தீபாவளிக் கொண்டாட்டத்துக்கே ஒரு தனி அழகு சேர்க்கும். அதேபோல் அதிரசம் தயாரிக்கும்போதும் மாவின் பதம் முதல் பக்குவமாகத் தட்டிப் பொரிப்பது வரை ஒவ்வொரு கட்டத்திலும் கவனம் தேவை.

இப்படிப் பலகாரங்கள் ஒவ்வொன்றையும் அவர்களுக்கே உரிய கைப்பக்குவத்தில் தயாரிப்பதுதான் இந்தக் கடையின் சிறப்பு. இயந்திரங்களை நம்பாமல், பாரம்பர்யமான முறையில் வீட்டிலேயே தயாரிப்பது போன்ற அணுகுமுறையில் இவற்றைச் செய்து வருகிறார்கள்.

சுவைக்கு ஏற்ற விலை... பாக்கெட்டுக்கும் ஏற்ற பலகாரம்!

பலகாரங்களின் வகைகள் ஒருபுறம் இருக்க, அவற்றின் விலையும் பலரைக் கவரும் விதத்தில் இருக்கிறது. முறுக்கு, கடலை உருண்டை, எள்ளு உருண்டை, நெய் உருண்டை, அச்சு முறுக்கு, முந்திரி கொத்து, அதிரசம், சோமாசு , தேன் குழல் எனப் பல வகைகள் கிடைக்கின்றன. சில பலகாரங்கள் வெறும் 5 ரூபாயிலிருந்தே கிடைக்கின்றன. அதுமட்டுமல்லாமல், இனிப்பு மற்றும் கார வகைகள் கிலோ கணக்கிலும் விற்பனை செய்யப்படுகின்றன. பாரம்பர்யச் சுவையோடு, நம்முடைய பட்ஜெட்டுக்கும் ஏற்ற வகையில் பலகாரங்களை வாங்க முடிவது கூடுதல் சிறப்பு.

25 ஆண்டுகளாகத் தொடரும் வாடிக்கையாளர் உறவு!

ஒரு கடை 25 ஆண்டுகளைக் கடந்து தொடர்ந்து இயங்குகிறது என்றால், அதற்குப் பின்னால் நிச்சயம் ஒரு நல்ல சுவையும், வாடிக்கையாளர்களின் நம்பிக்கையும் இருக்கும். சிவசூர்யா கைச்சுற்று முறுக்கு கடைக்கும் அப்படியொரு தனி வாடிக்கையாளர் வட்டம் இருக்கிறது.

இவர்களுடைய பலகாரங்களை விரும்பி வாங்குவதற்காகவே தொடர்ந்து கடைக்கு வருபவர்கள் பலர் இருக்கிறார்கள். குறிப்பாகத் தீபாவளி போன்ற பண்டிகைக் காலங்களில், ஒவ்வோர் ஆண்டும் தங்களுக்குப் பிடித்தமான பலகாரங்களை வாங்குவதற்காக வாடிக்கையாளர்கள் இங்கே வருகிறார்கள்.

வெளியிடங்களுக்கு விநியோகம் செய்வதைவிட, தங்களை நம்பி நேரடியாகக் கடைக்கு வரும் வாடிக்கையாளர்களுக்காகவே பலகாரங்களைத் தயாரித்து வழங்கி வருகிறார்கள். அந்த நம்பிக்கையும், தொடர்ந்து கிடைக்கும் வரவேற்பும்தான் இவர்களுடைய 25 ஆண்டுக்காலப் பயணத்தின் முக்கியமான பலம்.

மாறாத கைப்பக்குவம்... தொடரும் தீபாவளிச் சுவை!

இன்றைக்கு கடைகளில் விதவிதமான பலகாரங்கள் கிடைக்கின்றன. புதுப்புது சுவைகளும், தயாரிப்பு முறைகளும் வந்துகொண்டே இருக்கின்றன. ஆனாலும், கைகளால் சுத்தப்பட்ட ஒரு முறுக்கையும், பாரம்பர்ய முறையில் செய்யப்பட்ட ஓர் அதிரசத்தையும் சாப்பிடும்போது கிடைக்கும் திருப்தி தனிதான்.

அந்தத் திருப்தியைத்தான் 25 ஆண்டுகளாகத் தங்களுடைய பலகாரங்கள் வழியாகக் கொடுத்துக் கொண்டிருக்கிறது சிவசூர்யா கைச்சுற்று முறுக்கு கடை.