"அன்புமணி எல்லாத்தையும் பறித்து விட்டாய்; வயிறு எரிஞ்சு சொல்றேன்" - கொதிக்கும் ராமதாஸ்; காரணம் என்ன?

கடந்த ஏப்ரல் மாதம் முதல் பொதுவெளிக்கு வந்த பாமக தலைவருக்கும் அன்புமணி மற்றும் அக்கட்சியின் நிறுவனர் ராமதாஸ் இடையேயான மோதல் முடிவில்லாமல் தொடர்ந்து வருகிறது.

'பாமக'வைக் கைப்பற்றுவதில் ராமதாஸ், அன்புமணி இடையே நிலவும் அதிகாரப் போட்டி கட்சியையே இரண்டாகப் பிளவுபடுத்தியிருக்கிறது. 2026 சட்டமன்றத் தேர்தல் நெருங்கும் சமயத்தில் கட்சிகள் எல்லாம் மக்கள் சந்திப்பு, கூட்டணி பேச்சுவார்த்தை எனக் களமிறங்கியிருக்கின்றன. ஆனால், பாமக உட்கட்சி பிரச்னையால் சிதறிக்கொண்டிருக்கிறது.

தலைவர் பதவி யாருக்குச் சொந்தம் எனத் தலைமைத் தேர்தல் ஆணையத்தையும் இருவரும் அணுகினர்.

இந்த விவகாரம் குறித்து நேற்று அன்​புமணி தலை​மையி​லான பாமக-வை தேர்​தல் ஆணை​யம் அங்​கீகரித்​திருக்கிறது. அதோடு, 2026-ம் ஆண்டு ஆகஸ்ட் வரை கட்​சி​யின் தலை​வ​ராக அன்​புமணி தொடர்​வார். பாமக சார்​பில் தேர்​தலில் போட்​டி​யிடும் வேட்​பாளர்​களின் ‘ஏ’ மற்​றும் ‘பி’ படிவங்​களில் கையெழுத்​திடும் அதி​கார​மும் அவருக்​குத்​தான் உள்​ளது என அறி​வித்​திருக்கிறது. மாம்​பழம் சின்னத்தை அன்​புமணி தரப்​பினர் பெற்​றிருப்பது குறிப்பிடத்தக்கது.

இதனால் அதிருப்திக்கு உள்ளாகி இருக்கும் பாமக நிறுவனர் ராமதாஸ், பாட்டாளி மக்கள் கட்சி கடலூர் மாவட்ட ஒருங்கிணைந்த பொதுக்குழு கூட்டத்தில் அன்புமணி குறித்து மனவருத்தத்துடன் பேசியிருக்கிறார்.

இதுகுறித்துப் பேசியிருக்கும் ராமதாஸ், "என் உயிரைத்தான் அவர் (அன்புமணி) பறிக்கவில்லை. மீதி எல்லாவற்றையும் பறித்து விட்டார். உரிமையைப் பறித்தார். நான் சிந்திய வியர்வை வீணாகிப் போய்விட்டது. உரிமையை இனி யாரும் பறிக்க முடியாது.

சுப்ரீம் கோர்ட்டுக்குப் போனாலும் பறிக்க முடியாது. அந்த வகையில்தான் டெல்லி உச்ச நீதிமன்றத்தில் வழக்கு தொடரப்பட்டுள்ளது. சூழ்ச்சியினாலே தன்னை தலைவர் என்று சொல்லிக் கொண்டு வருகிறார். அன்புமணி எந்த கோர்ட்டுக்குச் சென்றாலும் நான் ஜெயிப்பேன். ராமதாஸைத் தோற்கடிக்க யாராலும் முடியாது.

இனி என்னிடம் எதுவுமே இல்லை எல்லாவற்றையும் பறித்துக் கொண்டாய். ஆனால் வியர்வைச் சிந்தி, 46 ஆண்டுக்காலம் 96 ஆயிரம் கிராமங்களுக்குச் சென்று என் மக்களைச் சந்தித்துப் பேசி நம் சமூகத்தின் நிலைமையைக் கூறி வளர்த்த எனது கட்சியை நீ முழுமையாகப் பறிக்க நினைக்கிறாய்.

அந்த உரிமையை என்னால் விட்டுக் கொடுக்க முடியாது. எனக்கு உதவியாக எனது மூத்த மகள் காந்தி செயல் தலைவராக நியமனம் செய்துள்ளேன். டெல்லி உயர் நீதிமன்றத்தில் வழக்கு தொடரப்பட்டுள்ளது. திருவேற்காட்டில் நடந்த பொதுக்குழுக் கூட்டத்தில் தீர்மானம் நிறைவேற்றப்பட்டது. ஆனால் தற்போது உனது தலைவர் பதவி முடிந்து விட்டது. ஆனால் ஏமாற்றி பொய் சொல்லி தேர்தல் ஆணையத்தையே விலைக்கு வாங்கி விட்டாய்.

என் கூட இருப்பவர்களை விலைக்கு வாங்க நினைக்கிறாய். தற்போது தேர்தல் ஆணையத்தையே விலைக்கு வாங்கிவிட்டாய். தேர்தல் ஆணையத்திற்கு உண்மையைக் கூறினால் புரியவில்லை. பணம் பத்தும் செய்யும் என்று கூறுவார்கள். தற்போது தேர்தல் ஆணையம் வரை சென்றுள்ளது. இனி வெல்லப்போவது ராமதாஸ்தான். நீ எல்லாவற்றிலும் தோற்றுவிட்டாய்.

தனியாக நின்று நான்கு சட்டமன்ற உறுப்பினர்களைப் பெற்றோம். ஆனால் கூட்டணி வைத்து ஐந்து சட்டமன்ற உறுப்பினர்களை மட்டுமே பெற முடிந்தது. இதற்குக் காரணம் அன்புமணியின் செயல்தான். இனி அதுபோல் நடக்காது. எனது உரிமையை விட்டுக் கொடுக்க முடியாது. எனது உழைப்பை இனி யாரும் திருட முடியாது.

அன்புமணியைப் படிக்க வைத்து, மருத்துவராக்கி, மத்திய அமைச்சராக்கி, கட்சிக்குத் தலைவராக்கியது எனப் பல தவறுகளைச் செய்துவிட்டேன். தற்போது என்னோடு மோத நினைக்கிறார். அது எப்போதும் நடக்காது. நீதிமன்றத்தில் வெற்றி கிடைக்கும். இனி அன்புமணி அரசியல் பயணம் முடிந்துவிட்டது. இதை நான் வயிறு எரிந்து சொல்கிறேன்" என்று ஆதங்கத்துடனும், மனவேதனையுடனும் பேசியிருக்கிறார் ராமதாஸ்.