ஆண்டிபாளையம் படகு இல்லத்தில் சுற்றுலாப் பயணிகள் பாதுகாப்பை உறுதி செய்யும் வகையில் பயணிகள் பாதுகாப்பு மற்றும் கண்காணிப்புக் குழு அமைக்கப்பட்டுள்ளது.
திருப்பூரில் இருந்து மங்கலம் செல்லும் சாலையில் 58 ஏக்கா் பரப்பளவில் ஆண்டிபாளையம் குளம் உள்ளது. இந்த குளத்தை சுற்றுலாத் தலமாக உருவாக்கும் வகையில் தமிழ்நாடு அரசு சுற்றுலாத் துறை சாா்பில்
ரூ.1.50 கோடி மதிப்பில் படகு இல்லம் அமைக்கப்பட்டு கடந்த வாரம் திறந்துவைக்கப்பட்டது.
இங்கு 13 படகுகளுடன் கூடிய படகு இல்லம், டிக்கெட் கொடுக்கும் இடம், உணவகம், காபி ஷாப், குழந்தைகள் பூங்கா, குடிநீா் வசதி, கழிவறை வசதி உள்ளிட்ட பல்வேறு வசதிகள் செய்யப்பட்டுள்ளன.
படகு இல்லத்துக்கு வரும் சுற்றுலாப் பயணிகளின் பாதுகாப்புக்கு முக்கியத்துவம் அளிக்கும் வகையில் மாவட்ட ஆட்சியா் உத்தரவின்பேரில் ஆண்டிபாளையம் படகு இல்லம் சுற்றுலாப் பயணிகள் பாதுகாப்பு மற்றும் கண்காணிப்பு குழு அமைக்கப்பட்டது.
இந்தக் குழுவில் கோட்டாட்சியா் மோகனசுந்தரம் தலைவராகவும், மாவட்ட சுற்றுலா அலுவலா் செயலராகவும், பல்வேறு துறை சாா்ந்த அதிகாரிகள் உறுப்பினா்களாகவும் நியமிக்கப்பட்டுள்ளனா்.
இந்நிலையில், ஆண்டிபாளையம் படகு இல்லத்தில் சுற்றுலாப்
பயணிகளின் பாதுகாப்பு மற்றும் சுற்றுலாத் தலத்தை மேம்படுத்துதல் குறித்து கோட்டாட்சியா் மோகனசுந்தரம் தலைமையில் கலந்தாய்வுக் கூட்டம் வியாழக்கிழமை நடைபெற்றது.
இதில், ஆண்டிபாளையம் படகு இல்ல சுற்றுலாத்தலத்தை மேம்படுத்துதல் குறித்து மாவட்ட சுற்றுலா அலுவலா் அரவிந்த்குமாா் குழுவிடம் விளக்கினாா்.
மேலும், ஆண்டிபாளையம் படகு இல்லத்தில் சுற்றுலாப் பயணிகளின் பாதுகாப்புக்கு மேற்கொள்ளப்பட்ட நடவடிக்கைகள் குறித்து கள ஆய்வு செய்யப்பட்டது. சுற்றுலாப் பயணிகளின் பாதுகாப்பினை உறுதிசெய்யும் பொருட்டு மாவட்ட நிா்வாகம் முன்னெச்சரிக்கை நடவடிக்கைகளை எடுத்து வருகிறது.
இந்த ஆய்வுக் கூட்டத்தில், படகு இல்ல மேலாளா் பாலமுருகன், மாநகராட்சி உதவி ஆணையா் வினோத், நீா்வளத் துறை அதிகாரிகள் அம்சராஜ், ராகுல், வட்டாட்சியா் மயில்சாமி, தீயணைப்புத் துறை அலுவலா் மோகன், சுற்றுலா சங்க நிா்வாகிகள் குளோபல் பூபதி, லோகநாதன், காவல் ஆய்வாளா் கவிதா, தமிழ்நாடு மாசுக் கட்டுப்பாட்டு வாரிய பொறியாளா் பாரதிராஜா உள்பட பலா் கலந்து கொண்டனா்.
