'ஒரு நபரின் தினசரி வருமானம் 4.20 டாலர்கள்' - இந்தியாவில் வறுமை ஒழிந்துவிட்டதா? உலக வங்கி அறிக்கை

'இந்தியாவில் தீவிர வறுமை பெருமளவு குறைந்துவிட்டது' என்ற உலக வங்கியின் சமீபத்திய 'வறுமை மற்றும் சமத்துவ அறிக்கை' (Poverty and Equity Brief) தெரிவித்திருக்கிறது.

2011-13 காலகட்டத்தில் 27.1% ஆக இருந்த இந்தியாவின் தீவிர வறுமை விகிதம், 2023-26 நிதியாண்டு முடிவுகளின்படி வெறும் 2.6% ஆகச் சரிந்துள்ளது என்கிறது அந்த அறிக்கை. அதாவது, சுமார் 49.6 கோடி மக்கள் வறுமைக் கோட்டிற்கு மேலே உயர்ந்துள்ளனர் என்பது இதன் பொருள்.

வெறும் வருமானத்தை மட்டும் அளவுகோலாகக் கொள்ளாமல், சுகாதாரம், கல்வி, குடிநீர், மின்சாரம், வீடமைப்பு ஆகியவற்றை உள்ளடக்கிய 'பன்முக வறுமைக் குறியீட்டிலும்' (Multidimensional Poverty Index - MPI) இந்தியா வேகமாக முன்னேறி வருவதாகப் புள்ளிவிவரங்கள் சொல்கின்றன. கடந்த பத்தாண்டுகளில் (2013-14 முதல் 2025-26 வரை) இந்திய அரசாங்கம் செயல்படுத்திய திட்டங்களும், அணுகுமுறைகளுமே இதற்கு முக்கியக் காரணம் எனப் பொருளாதார வல்லுநர்கள் சுட்டிக்காட்டுகின்றனர்.

வறுமைக் கோட்டைத் தாண்ட உதவிய 5 முக்கியத் தூண்கள்

1. நேரடிப் பணப் பரிமாற்றம் & நிதிச் சேர்க்கை

பிரதமரின் ஜன்தன் திட்டம் (2014): வங்கி வாசலையே மிதிக்காத கோடிக்கணக்கான ஏழை மக்களுக்கு 'பூஜ்யக் கட்டண' வங்கிக் கணக்குகள் தொடங்கப்பட்டன.

ஜாம் (JAM - Jan Dhan, Aadhaar, Mobile) திட்டம்: இடைத்தரகர்களின் தலையீடு இன்றி, அரசின் நலத்திட்ட உதவிகள் நேரடியாகப் பயனாளிகளின் வங்கிக் கணக்கிற்கே சென்றடைந்தன. இதனால் போலிப் பயனாளிகள் களையப்பட்டு, நிதி கசிவு தடுக்கப்பட்டது.

2. அடிப்படை உள்கட்டமைப்பும் கண்ணியமான வாழ்வும்

பிரதமரின் ஆவாஸ் திட்டம்: 'அனைவருக்கும் பாதுகாப்பான வீடு' என்ற இலக்கோடு ஏழைக் குடும்பங்களுக்கு கான்கிரீட் வீடுகள் கட்டித் தரப்பட்டன.

தூய்மை பாரத இயக்கம்: கிராமப்புற வீடுகள்தோறும் கழிப்பறைகள் அமைக்கப்பட்டதால், சுகாதாரச் சீர்கேடுகளால் ஏற்படும் நோய்கள் தடுக்கப்பட்டு, ஏழைகளின் மருத்துவச் செலவு பெருமளவு குறைந்தது.

உஜ்வாலா திட்டம்: விறகு அடுப்புப் புகையால் சுவாச நோய்களுக்கு ஆளாகி வந்த கிராமப்புறப் பெண்களுக்கு இலவச சமையல் எரிவாயு இணைப்புகள் வழங்கப்பட்டன.

ஜல் ஜீவன் இயக்கம்: கிராமப்புற வீடுகளுக்கும் குழாய் மூலம் பாதுகாக்கப்பட்ட குடிநீர் விநியோகம் உறுதி செய்யப்பட்டது.

3. உணவுப் பாதுகாப்பும் பெருந்தொற்றுக் கால நிவாரணமும்

தேசிய உணவுப் பாதுகாப்புச் சட்டம்

கோவிட்-19 பெருந்தொற்றுக் காலத்திலும், அதற்குப் பின்னரும் ஏழைக் குடும்பங்களுக்குத் தங்கு தடையின்றி இலவச மற்றும் மானிய விலையில் உணவு தானியங்கள் வழங்கப்பட்டன. இது பசி, பட்டினி மற்றும் ஊட்டச்சத்துக் குறைபாட்டைப் பெருமளவு கட்டுப்படுத்தியது.

4. வாழ்வாதாரம் மற்றும் கிராமப்புற வேலைவாய்ப்பு

கிராமப்புற வேலைவாய்ப்பு உறுதித் திட்டம்: வறட்சி மற்றும் நெருக்கடியான காலங்களில் கிராமப்புற மக்களுக்குக் குறைந்தபட்ச வேலைவாய்ப்பையும், நிலையான வருமானத்தையும் இத்திட்டம் உறுதி செய்தது.

தேசிய கிராமப்புற வாழ்வாதார இயக்கம்: கிராமப்புறப் பெண்களை சுயஉதவிக் குழுக்கள் (SHGs) மூலம் ஒருங்கிணைத்து, சுயதொழில் தொடங்கக் கடன்களும் பயிற்சிகளும் வழங்கப்பட்டன. இது பெண்களின் பொருளாதாரத் தற்சார்பை அதிகரித்தது.

5. விவசாயிகள் மற்றும் சிறு வணிகர்களுக்கான பாதுகாப்பு

பிரதமரின் கிசான் திட்டம்: சிறு மற்றும் குறு விவசாயிகளுக்கு ஆண்டுக்கு ₹6,000 நேரடி நிதியுதவி அளிக்கப்பட்டதால், அவர்களின் அடிப்படை விவசாய முதலீட்டுத் தேவைகள் பூர்த்தியாகின.

பிரதமரின் ஸ்வநிதி திட்டம்: சாலையோர வியாபாரிகள் மற்றும் சிறு வணிகர்களுக்கு எளிய முறையில் கடன்கள் வழங்கப்பட்டு, அவர்களின் வாழ்வாதாரம் மீட்டெடுக்கப்பட்டது.

எதன் அடிப்படையில் வறுமை கணக்கிடப்படுகிறது?

உலக வங்கி வாங்கும் திறன் சமநிலை (Purchasing Power Parity - PPP) அடிப்படையிலேயே வறுமையைக் கணக்கிடுகிறது. அதாவது, அத்தியாவசியப் பொருள்களை வாங்குவதற்கு மக்களிடம் போதிய வருமானம் உள்ளதா என்பதே இதன் அளவுகோல். ஒரு நாட்டின் மொத்த உள்நாட்டு உற்பத்தியும் இதன் அடிப்படையிலேயே கணக்கிடப்படுகிறது.

தற்போதைய உலக வங்கி அளவுகோலின்படி, நமது நாட்டிற்கான வறுமைக் கோடு என்பது ஒரு நபரின் தினசரி வருமானம் 4.20 டாலர்கள் என்பதாகும்.

நாம் கவனிக்க வேண்டியது என்ன?

புள்ளிவிவரங்களின்படி இந்தியா தீவிர வறுமையிலிருந்து மீண்டு வருகிறது என்பது வரவேற்கத்தக்க மாற்றம்தான். ஆனால், வறுமைக் கோட்டைத் தாண்டிய கோடிக்கணக்கான மக்கள், மீண்டும் ஒரு பொருளாதார நெருக்கடியோ அல்லது மருத்துவச் செலவோ வந்தால் வறுமைக்குள்ளேயே தள்ளப்படும் நிலையில்தான் உள்ளனர்.

எனவே, வறுமை ஒழிப்பு என்பது வெறும் புள்ளிவிவரங்களோடு நின்றுவிடாமல், தரமான கல்வி, உயர்தர மருத்துவம் மற்றும் நிலையான வேலைவாய்ப்பு ஆகியவற்றை அனைவருக்கும் உறுதி செய்வதில்தான் முழுமையடையும்!