'சுவிட்ச் அழுத்தினால் ஆட்டோ' - விபத்தை தடுக்க கேரள ஓட்டுநர்கள் ஏற்படுத்திய சிம்ப...
ஜந்தர் மந்தர்: பெண் செய்தியாளர்களுக்கு பாலியல் தொல்லை? டெல்லி காவல்துறைக்கு வலுக்கும் கண்டனம்
Admin
- 1 hours ago
தலைமைத் தேர்தல் ஆணையர் ஞானேஷ் குமார் ராஜினாமா செய்ய வலியுறுத்தி, டெல்லி ஜந்தர் மந்தரில் போராட்டம் நடைபெற்றது. போராட்டத்தின் போது, பெண் செய்தியாளர்கள் மூவருக்குக் காவல்துறையினர் பாலியல் தொல்லை அளித்ததாகக் குற்றம்சாட்டப்பட்டுள்ளது. பாதிக்கப்பட்ட செய்தியாளர்களில் ஒருவர் கூறுகையில், ``தலைமைத் தேர்தல் ஆணையர் ஞானேஷ் குமார் ராஜினாமா செய்ய வலியுறுத்தி போராட்டம் நடைபெற்றது. அப்போது, காவல்துறையினரின் நடவடிக்கையைப் படம் பிடித்துக்கொண்டிருந்தேன். அப்போது உதவி ஆணையர் (ஏசிபி) அந்தஸ்தில் உள்ள காவல்துறை அதிகாரி ஒருவர் எனக்கு பாலியல் தொல்லை அளித்தார்.
அந்த அதிகாரி தவறான முறையில் நடந்து கொண்டார். என்னிடமிருந்து எதிர்ப்பு எழுந்தபோது என்னைத் தள்ளிவிட்டார். இச்சம்பவம் தொடர்பாக வழக்குப்பதிவு செய்ய உடனடியாகக் காவல் நிலையம் சென்றோம். ஆனால் எங்கள் புகாரைப் பதிவு செய்யக் காவல்துறை தாமதித்தது." என்றார்.
இந்த விவகாரம் குறித்து விளக்கமளித்த காவல்துறை, ``செய்தியாளரின் புகாரை பெறப்பட்டது. அனைத்தும் நியாயமான விசாரணைக்காகக் கிரைம் பிராஞ்ச் பிரிவுக்கு மாற்றப்பட்டுள்ளது." எனக் குறிப்பிட்டிருக்கிறது.
இதனிடையே, பெண் செய்தியாளர்களுக்கு நேர்ந்த இந்த அநீதிக்கு இந்தியப் பத்திரிகை கவுன்சில் (பிசிஐ), ``ஜனநாயக நாட்டில் இத்தகைய நடத்தையை ஒருபோதும் ஏற்றுக்கொள்ள முடியாது. நாட்டின் தலைநகரின் மையப்பகுதியிலேயே பத்திரிகையாளர்களுக்குப் பாதுகாப்பு இல்லாத சூழல் நிலவுவது, இந்தியாவில் ஊடக சுதந்திரத்தின் எதிர்காலத்திற்கு நல்லதல்ல.
செய்தியாளர்கள் எவ்வித பயமுமின்றி சுதந்திரமாகப் பணியாற்ற அனுமதிக்கப்பட வேண்டும். பாதிக்கப்பட்ட பெண் செய்தியாளரின் புகார் மீது டெல்லி காவல்துறை உடனடியாக நடவடிக்கை எடுக்க வேண்டும்" எனக் கடும் கண்டனத்தையும் அதிர்ச்சியையும் தெரிவித்துள்ளது.
இச்சம்பவம் தொடர்பாக எதிர்க்கட்சித் தலைவர் ராகுல் காந்தி தன் எக்ஸ் பக்கத்தில், ``டெல்லி காவல்துறை மத்திய உள்துறை அமைச்சகத்தின் கீழ் செயல்படுவதால், இதற்கு அமித் ஷா பதிலளிக்க வேண்டும். ஜந்தர் மந்தரில் பெண் செய்தியாளரிடம் காவல் அதிகாரி முறைகேடாக நடந்து கொண்டதாகக் குற்றம்சாட்டப்பட்டுள்ளது.
இச்சம்பவம் தொடர்பாக எஃப்.ஐ.ஆர் (FIR) பதிவு செய்ய வலியுறுத்தி நூற்றுக்கணக்கான செய்தியாளர்கள் மணி கணக்கில் போராடி வருகின்றனர். புகாரைப் பதிவு செய்வது காவல்துறையின் அடிப்படை கடமை இல்லையா? அதைக்கூட அவர்கள் செய்யவில்லை
சனிக்கிழமை ஒரே நாளில் நூற்றுக்கணக்கானோர் கைது செய்யப்பட்டுள்ளனர். செய்தியாளர்களின் கேமராக்கள் பறிக்கப்பட்டு, அவர்கள் வலுக்கட்டாயமாக இழுத்துச் செல்லப்பட்டதாகக் குறிப்பிட்ட அவர், தலைநகரில் பாதுகாப்பு வழங்க வேண்டிய காவல்துறையினரே பெண்களுக்கு எதிராக வன்முறையில் ஈடுபடுவது கண்டிக்கத்தக்கது. இந்த விவகாரத்தில் உள்துறை அமைச்சர் அமித் ஷா உடனடியாகப் பதிலளிக்க வேண்டும்." எனக் குறிப்பிட்டிருக்கிறார்.
காங்கிரஸ் எம்.பி பிரியாங்கா காந்தி, ``ஜந்தர் மந்தரில் செய்திகளைச் சேகரிக்கும் பணியில் ஈடுபட்டிருந்த பெண் பத்திரிகையாளர்கள், காவல்துறையினர் தங்களை பாலியல் ரீதியாக துன்புறுத்தியதாகக் குற்றம் சாட்டியுள்ளனர். பல பத்திரிகையாளர்கள் எதிர்ப்புத் தெரிவித்தும், இது தொடர்பாக எந்தவொரு முதல் தகவல் அறிக்கையும் (FIR) பதிவு செய்யப்படவில்லை.
உறுதியான நடவடிக்கையும் எடுக்கப்படவில்லை. அமைதியான முறையில் போராட்டத்தில் ஈடுபட்டுள்ள பெண்களும், காவல்துறையினர் தங்களிடம் மிகவும் கண்ணியமற்ற முறையில் நடந்துகொள்வதாகக் குற்றம் சாட்டுகின்றனர். பாதுகாப்பு அளிக்க வேண்டிய காவல்துறையினரே பெண்களை அச்சுறுத்தலுக்கு உள்ளாக்குகின்றனர்.
கல்லூரி மாணவிகள் முதல் பத்திரிகையாளர்கள் வரை, பெண்கள் எல்லா இடங்களிலும் பாதுகாப்பற்ற சூழலையே எதிர்கொள்கின்றனர். மோடி அவர்களே, அமித் ஷா அவர்களே, பெண்களை நடத்துவதற்கு இதுதான் சரியான முறையா? இல்லையென்றால், ஏன் இது குறித்து நீங்கள் கவனம் செலுத்தவில்லை?" எனக் கேள்வி எழுப்பியிருக்கிறார்.
