'தாய்மாமன் தங்க மோதிரத் திட்டத்தில் எங்கள் பங்களிப்பு லாபத்திற்காக அல்ல!' - ஜாய் ஆலுக்காஸ்

வருகிற செப்டம்பர் 15-ஆம் தேதியிலிருந்து தமிழ்நாட்டில் ‘தாய்மாமன் தங்க மோதிரம் திட்டம்’ அமலுக்கு வர இருக்கிறது.

இந்தத் திட்டத்தில் கடந்த ஜூன் 22-ஆம் தேதி முதல் தமிழ்நாட்டில் உள்ள அரசு மருத்துவமனைகளில் பிறந்த அனைத்துக் குழந்தைகளும் பயன்பெறலாம்.

இந்தத் திட்டத்திற்கான டெண்டரை ஜாய் ஆலுக்காஸ் நகைக் கடையும், கல்யாண் ஜுவல்லர்ஸும் பெற்றுள்ளன.

ஜாய் ஆலுக்காஸும், கல்யாண் ஜுவல்லர்ஸும்

இதில் ஒரு கிராம் தங்கத்தின் விலையைத் தவிர்த்துச் செய்கூலி, காப்பீடு, போக்குவரத்து, BIS-தரமுத்திரை போன்ற அனைத்துக் கூடுதல் கட்டணங்களுக்கும் சேர்த்து ரூ.0.01 என ஜாய் ஆலுக்காஸ் என்ற நிறுவனம் குறைந்த விலைப்புள்ளியை அளித்திருந்தது.

அடுத்ததாக, ஒப்பந்தப்புள்ளியில் பங்கேற்ற 10 நிறுவனங்களிடம் குறைந்த விலைப்புள்ளி அளித்த நிறுவனத்தின் விலையை ஒப்பிட்டு இசைவு தெரிவிக்கக் கோரியதில் கல்யாண் ஜுவல்லர்ஸ் மட்டுமே இசைவு தெரிவித்திருந்தது.

ஆகையால், இந்த இரு நிறுவனங்களுக்கும் தாய்மாமன் தங்க மோதிரம் திட்டத்திற்கான டெண்டர் சென்றுள்ளது.

எழும் விமர்சனங்கள்

2010 காலக்கட்டங்களில் ஜோஸ் ஆலுக்காஸ் நிறுவனத்தின் தூதராகத் தமிழ்நாட்டின் தற்போதைய முதலமைச்சர் விஜய் இருந்தார். ஜோஸ் ஆலுக்காஸ் மற்றும் ஜாய் ஆலுக்காஸ் இணை நிறுவனங்கள் ஆகும்.

இதனால், தமிழ்நாடு அரசின் திட்டம் ஜாய் ஆலுக்காஸிற்குக் கிடைத்திருப்பது விமர்சனத்தைக் கிளப்பியுள்ளது.

ஜாய் ஆலுக்காஸ் பதிவு

இந்த நிலையில், இந்தத் திட்டத்திற்கான டெண்டர் கிடைத்திருப்பது குறித்து, ஜாய் ஆலுக்காஸ் நிறுவனத்தின் நிறுவனர் மற்றும் தலைவர் ஜாய் ஆலுக்காஸ் தனது எக்ஸ் பக்கத்தில் பதிவிட்டிருப்பதாவது…

“தமிழ்நாட்டின் ‘தாய்மாமன் தங்க மோதிரம் திட்டத்தில்’ நாங்களும் ஒரு அங்கமாக இருப்பதில் பெருமையடைகிறோம்.

எங்கள் பங்களிப்பு லாபத்திற்காக அல்ல; சமூகத்திற்குத் திரும்பக் கொடுக்கும் எண்ணத்தில் மட்டுமே நடத்தப்படுகிறது.

மாண்புமிகு முதலமைச்சர் சி. ஜோசப் விஜய் அவர்களுக்கு எங்களது மனமார்ந்த நன்றிகள்.

எங்கள் சார்பில் வழங்கப்படும் ஒவ்வொரு மோதிரமும் அதன் தூய்மை, ஹால்மார்க் முத்திரை மற்றும் நேர்த்தியான கைவினைத்திறன் ஆகியவற்றுக்கான எங்கள் நம்பிக்கையைத் தக்கவைக்கும்.” எனத் தெரிவிக்கப்பட்டுள்ளது.