நாகர்கோவில் யூடியூப்பர் வீட்டில் கொள்ளை; "வீடியோ பார்த்து ஸ்கெட்ச் போட்டனர்" - போலீஸ் சொல்வது என்ன?

கன்னியாகுமரி மாவட்டம் நாகர்கோவில் வி.ஐ.பி கார்டனில் வசித்துவரும் யூடியூப்பர் மதுமிதா வீட்டில் கடந்த 24-ம் தேதி இரவு வீட்டின் பின் கதவை கட்டர் மெஷின் மூலம் உடைத்து சுமார் 118 சவரன் தங்க நகைகள் கொள்ளையடிக்கப்பட்டன.

இந்த வழக்கில் 4 பேர் கைது செய்யப்பட்டுள்ளனர். 98 சவரன் நகைகள் மீட்பக்கட்டுள்ளன. இது சம்பந்தமாக மாவட்ட காவல் கண்காணிப்பாளர் அன்ஷுல் நாகர் உத்தரவின்பேரில் கன்னியாகுமரி உட்கோட்ட துணைக் காவல் கண்காணிப்பாளர் பிரகாஷ் தலைமையில் ராஜாக்கமங்கலம் காவல் ஆய்வாளர் ஜெயலட்சுமி மேற்பார்வையில் உதவி ஆய்வாளர்கள் நேசமணிகண்டன், அனுஜன், வினீஷ்பாபு, தனிஷ் லியோன், பிரிய ராஜ்குமார் ஆகியோர் அடங்கிய 7 தனிப்படைகள் அமைக்கப்பட்டன.​

தனிப்படை போலீசார் சம்பவ இடத்திற்கு விரைந்து சென்று சம்பவ இடத்தை மற்றும் அதனைச் சுற்றியுள்ள பகுதியில் சிசிடிவி கேமராக்களை ஆய்வு செய்தனர். இதில் மொத்தமாக சம்பவ இடத்திலிருந்து ஸ்ரீவைகுண்டம் வரை 160 சிசிடிவி கேமராக்கள் மற்றும் 35 செல்போன் டவர் லொக்கேசன்கள் ஆய்வு செய்யப்பட்டு, ஸ்ரீவைகுண்டம் பகுதியைச் சேர்ந்த சின்னத்துரை என்பவரின் மகன் இசக்கி பாண்டி (30), மற்றும் முக்கூடலைச் சேர்ந்த இசக்கிமுத்து என்பவரின் மகன் முருகன் (28) ஆகியோரை அடையாளம் கண்டனர்.

அவர்கள் இருவரும் ஸ்ரீவைகுண்டத்தில் இருந்து கன்னியாகுமரி நோக்கி பைக்கில் சென்று கொண்டிருந்தது தெரியவந்தது. இந்நிலையில் அவர்களைப் பின்தொடர்ந்து எறும்புகாட்டில் வைத்து வாகன சோதனை மேற்கொண்டு இருவரையும் கைதுசெய்தனர்.

அவர்களிடம் விசாரணை நடத்தி, பெற்ற வாக்குமூலம் மூலம் ஆலங்குளம் பகுதியைச் சேர்ந்த முப்பிடாதி என்பவரின் மகன் முருகேசன் (30) மற்றும் திம்மராஜபுரம் பகுதியைச் சேர்ந்த பரமசிவன் என்பவரின் மகன் தங்கப்பாண்டி (39) ஆகியோரைக் கைது செய்து அவர்களிடமிருந்து 98 சவரன் நகைகள் பறிமுதல் செய்யப்பட்டுள்ளன.

​மேலும் கைது செய்யப்பட்ட நபர்களிடம் விசாரணை நடத்தப்பட்டு வருவதுடன், இக்குற்றச்சம்பவத்தில் வேறு யாருக்கேனும் தொடர்பு உள்ளதா என்பது குறித்தும் விசாரணை நடைபெற்று வருகிறது.

இதுகுறித்து ராஜாக்கமங்கலம் காவல் நிலையத்தில் குமரி மாவட்ட எஸ்.பி.அன்ஷுல் நாகர் செய்தியாளர்களிடம் கூறுகையில், "ராஜாக்கமங்கலம் காவல் நிலைய எல்லைக்குட்பட்ட பகுதியில் 24.09.2026 ஆம் தேதி தம்பத்துகோணம் வி.ஐ.பி கார்டனில் வசித்து வரும் செல்வராஜ் என்பவரின் மகன் வினோத் குமார் மற்றும் அவரது மனைவி இருவரும் மாலை 6 மணி அளவில் திருநெல்வேலிக்குச் சென்று இரவு 12 மணி அளவில் வீடு திரும்பியவர்கள் வீட்டின் பின்புறக் கதவு உடைக்கப்பட்டிருப்பதைக் கண்டு மாடியில் உள்ள அறையில் சென்று பார்த்த பொழுது வீட்டில் இருந்த நகைகள் திருடு போனது தெரியவந்துள்ளது. ​

உடனே இது சம்பந்தமாக ராஜாக்கமங்கலம் காவல் நிலையத்தில் தகவல் தெரிவித்தனர். புகாரைப் பெற்றுக் கொண்டு ராஜாக்கமங்கலம் காவல் நிலையத்தில் வழக்குப்பதிவு செய்யப்பட்டது. ஏழு தனிப்படையினர் அமைக்கப்பட்டு அவர்கள் கைது செய்யப்பட்டுள்ளனர்.

மதுமிதா வெளியிட்ட வீடியோக்களை கடந்த ஆறு மாதங்களாக பார்த்து இந்தக் கொள்ளை திட்டம்போட்டுள்ளனர். கார் இல்லாமல் இருந்தால் வீட்டில் ஆள் இல்லை என்பதை உறுதிசெய்து கொள்ளையை அரங்கேற்றியுள்ளனர்" என்றார்.