3 ஆண்டுகள் கோமா... 47 வயதில் காலமானார் தாய்லாந்து பட்டத்து இளவரசி பஜ்ரகிதியாபா!

தாய்லாந்து நாட்டின் பட்டத்து இளவரசி பஜ்ரகிதியாபா, கடந்த மூன்று ஆண்டுகளுக்கும் மேலாகக் கோமா நிலையில் சிகிச்சை பெற்று வந்தவர், தனது 47-வது வயதில் காலமானார் என்ற அதிர்ச்சியூட்டும் செய்தி உலகளவில் பெரும் சோகத்தை ஏற்படுத்தியுள்ளது.

தாய்லாந்து அரச குடும்பத்தின் மிக முக்கியத் தூணாகவும், அந்நாட்டு மக்களின் பேராதரவைப் பெற்ற ஒரு மக்கள் தலைவராகவும் விளங்கிய இவரது மறைவு, தாய்லாந்து வரலாற்றில் ஒரு பேரிழப்பாகக் கருதப்படுகிறது.

கடந்த 2022-ஆம் ஆண்டு டிசம்பர் மாதம், பக் சோங் மாவட்டத்தில் தனது செல்லப் பிராணிகளுக்கான நாய் பயிற்சிப் போட்டி ஒன்றில் கலந்துகொண்டிருந்த போது, இளவரசி பஜ்ரகிதியாபா திடீரென நெஞ்சு வலி ஏற்பட்டு மயங்கி விழுந்தார். உடனடியாக ஹெலிகாப்டர் மூலம் பாங்காக் நகரில் உள்ள மருத்துவமனைக்குக் கொண்டு செல்லப்பட்ட அவருக்கு, இதயத்தில் ஏற்பட்ட கடுமையான பாதிப்பு காரணமாக மூளைக்குச் செல்லும் இரத்த ஓட்டம் தடைபட்டது கண்டறியப்பட்டது.

அன்றிலிருந்து இன்று வரை சுமார் மூன்று ஆண்டுகளுக்கும் மேலாக அவர் அதிநவீன மருத்துவ உபகரணங்களின் உதவியுடனும், தீவிர மருத்துவக் கண்காணிப்பிலும் கோமா நிலையிலேயே வைக்கப்பட்டிருந்தார். மருத்துவர்கள் தங்களின் முழு முயற்சியையும் செலுத்திய போதிலும், அவரது உடல்நிலை தேறாமல் சிகிச்சை பலனின்றி தற்போது அவர் உயிரிழந்துள்ளார்.

தாய்லாந்து மன்னர் மகா வஜிரலோங்கோர்னின் மூத்த மகளான இளவரசி பஜ்ரகிதியாபா, வெறும் அரச குடும்பத்து வாரிசாக மட்டுமல்லாமல், மிகச்சிறந்த வழக்கறிஞராகவும், ராஜதந்திரியாகவும் சர்வதேச அளவில் முத்திரை பதித்தவர் ஆவார்.

அமெரிக்காவின் கார்னெல் பல்கலைக்கழகத்தில் சட்டத்துறையில் முனைவர் பட்டம் பெற்ற அவர், தாய்லாந்திற்கான ஆஸ்திரிய தூதராகவும், ஐக்கிய நாடுகள் சபையின் பல்வேறு அமைப்புகளிலும் மிக முக்கியப் பொறுப்புகளை வகித்துள்ளார். குறிப்பாக, சிறைகளில் உள்ள பெண் கைதிகளின் உரிமைகள் மற்றும் அவர்களின் நலன்களுக்காக அவர் மேற்கொண்ட சர்வதேச அளவிலான சீர்திருத்தங்கள் உலக நாடுகளின் பாராட்டுகளைப் பெற்றன.

அந்நாட்டு அரசு, அரசு அலுவலகங்கள் மற்றும் முக்கிய நிறுவனங்களில் தேசியக் கொடியை அரைக்கம்பத்தில் பறக்கவிட உத்தரவிட்டுள்ளது. தாய்லாந்தின் அடுத்த அரச வாரிசாக முடிசூட்டப்படுவார் என்று மக்களால் பெரிதும் எதிர்பார்க்கப்பட்ட ஒரு திறமையான இளவரசியின் மரணம், ஒட்டுமொத்த தாய்லாந்து மக்களையும் ஆழமான சோகத்தில் ஆழ்த்தியுள்ளது.