Asian Games: தூக்கமில்லாத இரவு; தடுமாறிய தருணம்… கடைசி புட்டில் வரலாறு படைத்த பிரணவியின் தங்கக் கதை!

மூன்றாவது ஹோலில் முன்னிலை பறிபோனாலும் மனதை இழக்காத 23 வயது பிரணவி உர்ஸ்… ஆசிய விளையாட்டுப் போட்டிகளில் தனிநபர் கோல்ஃப் தங்கம் வென்ற முதல் இந்தியப் பெண் என்ற வரலாற்றுச் சாதனை!

ஒரு தங்கப் பதக்கத்தை வெல்வது என்பது சில மணி நேரங்களின் போராட்டம் மட்டுமல்ல. அதற்குப் பின்னால் பல ஆண்டுகளின் உழைப்பு, தோல்விகள், காத்திருப்புகள், பதற்றங்கள் என நீண்ட பயணம் இருக்கும். ஆனால், சில வெற்றிகள் அந்தப் பதக்கத்தைவிட மிகப்பெரிய கதையைச் சொல்லும். அப்படிப்பட்டதுதான் மைசூரைச் சேர்ந்த 23 வயது கோல்ஃப் வீராங்கனை பிரணவி உர்ஸின் ஆசிய விளையாட்டுப் போட்டி வெற்றி.

ஒருபுறம் நாட்டுக்காக தங்கம் வெல்ல வேண்டும் என்ற கனவு. மறுபுறம் இறுதிச் சுற்றுக்கு முன்பே தூக்கம் தொலைத்த பதற்றம். போட்டி தொடங்கிய சில நிமிடங்களிலேயே மூன்று ஸ்ட்ரோக் முன்னிலை கரைந்துவிட்ட அதிர்ச்சி. ஆனால், அந்தக் கணத்தில் தன்னம்பிக்கையை மட்டும் இழக்காமல் மீண்டும் எழுந்த பிரணவி, இறுதியில் இந்திய விளையாட்டு வரலாற்றில் தனது பெயரை அழுத்தமாகப் பதித்திருக்கிறார்.

ஒரு வீராங்கனை போட்டிக்கு முன்பு மனதளவில் எவ்வளவு அழுத்தத்தை எதிர்கொள்கிறார் என்பதற்கு அந்த இரவே சாட்சி. இறுதிப் போட்டிக்கு முந்தைய இரவு பிரணவிக்கு சாதாரணமான இரவாக இல்லை. அவருக்குத் தூக்கம் வரவில்லை. ஆனால், அடுத்த நாள் காலையில் அந்தத் தூக்கமின்மையை எல்லாம் பின்னுக்குத் தள்ளிவிட்டு, கோல்ஃப் மைதானத்தில் காலடி எடுத்து வைத்தார் பிரணவி.

அவருக்கு முன்னால் இருந்தது ஒரே இலக்கு — தங்கம்.

மூன்றாவது ஹோல்… கையில் இருந்த முன்னிலை பறிபோன தருணம்! முதல் மூன்று நாட்களில் பிரணவியின் ஆட்டம் அபாரமாக இருந்தது. முதல் நாளில் 66, இரண்டாவது நாளில் அதைவிட சிறப்பாக 63, மூன்றாவது நாளிலும் 66. 54 ஹோல்கள் முடிவில் 15-அண்டர் என்ற நிலையில் இருந்த அவர், அடுத்த வீராங்கனையை விட மூன்று ஸ்ட்ரோக் முன்னிலையில் இருந்தார்.

ஆனால், இறுதிச் சுற்றின் மூன்றாவது ஹோல் அனைத்தையும் மாற்றியது. ஒரு மோசமான டிரிபிள் போகி. ஒரே ஹோலில் ஏற்பட்ட அந்தத் தவறு, பிரணவி கட்டியிருந்த மூன்று ஸ்ட்ரோக் முன்னிலையையும் கிட்டத்தட்ட அழித்துவிட்டது. எதிரணி வீராங்கனைகள் நெருங்கினர்,பின்னர் போட்டி மீண்டும் திறந்துவிட்டது.

அந்த நேரத்தில் மனம் உடைந்துவிடுவது எளிது. “எல்லாம் முடிந்துவிட்டதா?” என்ற எண்ணம் வருவதும் இயல்புதான்.. ஆனால், பிரணவி அங்கேயே தன்னைத் திரும்பக் கட்டுப்படுத்திக்கொண்டார்.

ஒரு தவறுக்குப் பிறகு… மூன்று பேர்டிகள்!

மூன்றாவது ஹோலில் ஏற்பட்ட தவறுக்குப் பிறகு பிரணவி செய்தது ஒரு சாம்பியனின் பதில். அடுத்தடுத்த ஹோல்களில் பேர்டிகளைப் பதிவு செய்து, தான் இன்னும் போட்டியில் இருப்பதை நிரூபித்தார். ஆறாவது ஹோலில் கிடைத்த பேர்டி அவருக்கு சற்றே மூச்சுவிடும் இடத்தைக் கொடுத்தது. பத்தாவது ஹோலில் கிடைத்த பேர்டி, மீண்டும் முன்னணி வீராங்கனையான சீனாவின் யின் ருவோனிங்குடன் அவரை சமநிலைக்கு கொண்டு வந்தது. ஆனால், போட்டியின் திருப்புமுனை 13வது ஹோல்.

பந்து விளிம்பைச் சுற்றி வந்து ஹோலுக்குள் விழுந்த அந்த நொடியில், பிரணவியின் முகத்தில் மீண்டும் நம்பிக்கை மலர்ந்தது. அந்த பேர்டி அவரை மீண்டும் 15-அண்டர் நிலைக்குக் கொண்டு சென்றது. அதன்பிறகு அவர் அந்த முன்னிலையை விட்டுக்கொடுக்கவே இல்லை.

கடைசி புட்… சில நொடிகள் நீண்ட நித்தியக் காத்திருப்பு!

கடைசி ஹோல்,கையில் இருந்த புட்டர் முன்னிலையில் இருந்தாலும், அந்த ஒரு ஷாட் போட்டியின் முடிவை தீர்மானிக்கக்கூடியது. பந்து ஹோலை நோக்கிச் சென்று உள்ளே விழுந்தது. ஆனால், வெற்றி பெற்றுவிட்டோம் என்ற உணர்வு பிரணவிக்கு உடனடியாக வரவில்லை.

அவருடைய எதிரணி வீராங்கனையான ஷானன் டான் “நன்றாகச் செய்தாய்” என்று கூறிய பிறகுதான், உண்மையில் தங்கம் தன்னுடையது என்பதை அவர் உணர்ந்தார். அந்தச் சில நொடிகள் அவருடைய வாழ்க்கையின் மிக நீண்ட நொடிகளாக இருந்திருக்கலாம்.

நான்கு நாட்கள், 72 ஹோல்கள், 265 ஸ்ட்ரோக்குகள், 15-அண்டர் : இறுதியில் — தங்கம்.

பிரணவியின் வெற்றி ஒரு தனிப்பட்ட சாதனை மட்டுமல்ல. ஆசிய விளையாட்டுப் போட்டிகளில் தனிநபர் கோல்ஃப் தங்கப் பதக்கம் வென்ற முதல் இந்தியப் பெண் என்ற வரலாற்றை அவர் படைத்துள்ளார்.

மேலும், 2002ஆம் ஆண்டு ஷிவ் கபூர் ஆடவர் தனிநபர் பிரிவில் தங்கம் வென்ற பிறகு, ஆசிய விளையாட்டுப் போட்டிகளில் இந்தியாவுக்கான தனிநபர் கோல்ஃப் தங்கத்துக்காக நீண்ட 24 ஆண்டுகள் காத்திருந்த நிலைக்கும் இந்த வெற்றி முற்றுப்புள்ளி வைத்துள்ளது.

1982ஆம் ஆண்டு லட்சுமண் சிங் ஆடவர் தனிநபர் பிரிவில் தங்கம் வென்றிருந்தார். தற்போது, பல தசாப்தங்களுக்குப் பிறகு இந்திய மகளிர் கோல்ஃப் வரலாற்றில் பிரணவி ஒரு புதிய அத்தியாயத்தைத் திறந்திருக்கிறார்.

பிரணவியின் தனிநபர் தங்கத்துடன் இந்திய மகளிர் கோல்ஃப் அணிக்கும் இந்த ஆசிய விளையாட்டுப் போட்டி மறக்க முடியாததாக மாறியது. பிரணவி உர்ஸ், அதிதி அசோக், தீக்ஷா டகர் ஆகியோர் இணைந்த இந்திய அணி மகளிர் அணிப் பிரிவில் வெள்ளிப் பதக்கத்தை வென்றது. இறுதிச் சுற்றில் அதிதி அசோக்கின் 67 ஸ்ட்ரோக் ஆட்டமும் இந்தியாவின் பதக்க வேட்டைக்கு வலு சேர்த்தது. குறிப்பாக கடைசி ஒன்பது ஹோல்களில் அவர் தொடர்ச்சியாக ஆறு பேர்டிகளைப் பதிவு செய்தது குறிப்பிடத்தக்கது.

சீனா 538 புள்ளிகளுடன் தங்கத்தையும், இந்தியா 546 புள்ளிகளுடன் வெள்ளியையும், சீன தைபே 560 புள்ளிகளுடன் வெண்கலத்தையும் பெற்றன. இதன் மூலம், ஆசிய விளையாட்டுப் போட்டிகளில் இந்திய மகளிர் கோல்ஃப் அணியின் சிறந்த செயல்பாடுகளில் ஒன்றாக இந்தப் போட்டி மாறியது.

பிரணவியின் வெற்றி சொல்லும் பாடம்

பிரணவியின் வெற்றியில் மிகவும் முக்கியமானது அவர் அடித்த பேர்டிகளோ, பதிவு செய்த 265 ஸ்ட்ரோக்குகளோ மட்டுமல்ல. அவர் தவறிய பிறகு எப்படி மீண்டும் எழுந்தார் என்பதுதான். மூன்றாவது ஹோலில் ஒரு தவறு, கையில் இருந்த முன்னிலை பறிபோனதும் பதற்றம் அதிகரித்தது. தூக்கமில்லாத இரவின் சோர்வு உடலில் இருந்தது.. ஆனால், அவர் மனதை மட்டும் சோர விடவில்லை.

தனக்குப் பிடித்த கோல்ஃப் வீரர்களான ரோரி மெக்ல்ராய், நெல்லி கோர்டா போன்றோரின் கடினமான சூழ்நிலைகளிலிருந்து மீண்டு வந்த ஆட்டங்களை நினைத்துக்கொண்டு, தன்னுடைய கவனத்தை மீண்டும் போட்டிக்குள் கொண்டு வந்தார். அதுதான் இறுதியில் அவரை சாம்பியனாக்கியது.

“முதலில் இருப்பவர்கள் எப்போதும் முதலில்தான் இருப்பார்கள்!”

வெற்றிக்குப் பிறகு பிரணவி கூறிய ஒரு வரி, அவரது மனநிலையை அழகாக வெளிப்படுத்துகிறது. “எதையும் முதலில் செய்வதை நான் விரும்புகிறேன். பலர் வந்து இன்னும் பலவற்றைச் செய்வார்கள். ஆனால் முதலில் இருப்பவர்கள் எப்போதும் முதலில்தான் இருப்பார்கள்.” அந்த வார்த்தைகள் வெறும் வெற்றிக் கொண்டாட்டத்தின் வார்த்தைகள் அல்ல. ஒரு புதிய தலைமுறைக்கு வழி திறந்த வீராங்கனையின் நம்பிக்கைக் குரல்.

முன்னாள் ஆசிய விளையாட்டுப் போட்டியில் அதிதி அசோக் இந்தியாவுக்காக மகளிர் தனிநபர் கோல்ஃப் வெள்ளியை வென்று வரலாறு படைத்திருந்தார். இந்த முறை அந்தப் பாதையில் இன்னும் ஒரு படி முன்னேறியிருக்கிறார் பிரணவி.

வெள்ளியிலிருந்து தங்கம்..பதக்கத்திலிருந்து வரலாறு...

ஒரு போட்டியிலிருந்து புதிய தலைமுறைக்கான நம்பிக்கையை விதை போட்டு உள்ளார். தூக்கம் தொலைந்த அந்த இரவுக்குப் பிறகு, இந்தியாவுக்கு ஒரு பொற்காலையைப் பரிசாகக் கொடுத்திருக்கிறார் பிரணவி உர்ஸ். அவர் வென்றது ஒரு தங்கப் பதக்கம் மட்டுமல்ல. “ஒரு தவறு வெற்றியின் முடிவு அல்ல; அதற்குப் பிறகு நாம் எப்படி திரும்பி வருகிறோம் என்பதுதான் வரலாற்றை எழுதுகிறது” என்பதை நிரூபித்திருக்கிறார் இந்த 23 வயது வீராங்கனை பிரணவி உர்ஸ் .