Junior Hockey WC: ஹாக்கி உலகக் கோப்பையில் ரோஹித் தலைமையில் இந்திய அணி அபாரம்; பந்தாடப்பட்ட சிலி அணி!

ஆடவர் ஜூனியர் ஹாக்கி உலகக் கோப்பை நேற்று தமிழகத்தில் தொடங்கியது.

நவம்பர் 28 முதல் டிசம்பர் 10 வரையில் நடைபெறும் இத்தொடரில் மொத்தமாக 24 அணிகள் பங்கேற்றிருக்கின்றன. அவை 6 குழுக்களாகப் பிரிக்கப்பட்டிருக்கின்றன.

லீக் சுற்றில் ஒவ்வொரு அணியும் தங்கள் குழுவில் மற்ற அணிகளுடன் தலா ஒரு போட்டி என மொத்தம் 3 லீக் போட்டிகளில் ஆடும்.

குரூப் A - கனடா, ஜெர்மனி, அயர்லாந்து, தென்னாப்பிரிக்க

குரூப் B - சிலி, இந்தியா, ஓமன், ஸ்விட்சர்லாந்து

குரூப் C - அர்ஜென்டினா, சீனா, நியூசிலாந்து, ஜப்பான்

குரூப் D - பெல்ஜியம், எகிப்து, ஸ்பெயின், நமீபியா

குரூப் E - ஆஸ்திரியா, இங்கிலாந்து, மலேசியா, நெதர்லாந்து

குருப் F - ஆஸ்திரேலியா, வங்காளதேசம், கொரியா, பிரான்ஸ்

அனைத்து போட்டிகளும் மதுரை சர்வதேச ஹாக்கி ஸ்டேடியம் மற்றும் சென்னை மேயர் ராதாகிருஷ்ணன் ஹாக்கி ஸ்டேடியம் ஆகிய இரண்டு மைதானங்களில் நடைபெறும்.

முதல் நாளான நேற்று மதுரையில் நடைபெற்ற தொடக்கப் போட்டியில் நடப்பு சாம்பியன் ஜெர்மனி 4 - 0 என தென்னாப்பிரிக்க அணியை வீழ்த்தியது.

அடுத்தடுத்து நடைபெற்ற போட்டிகளில் கனடாவை 3 - 4 என அயர்லாந்தும், ஜப்பானை 1 - 4 என அர்ஜென்டினாவும், எகிப்தை 0 - 8 என ஸ்பெயினும், சீனாவை 3 - 5 என நியூசிலாந்தும், நமீபியாவை 1 - 12 என பெல்ஜியமும், ஸ்விட்சர்லாந்தை 0 - 4 என ஓமனும் வீழ்த்தின.

நேற்று கடைசிப் போட்டியாக சென்னையில் இந்திய அணியும் சிலி அணியும் மோதின.

இப்போட்டியில் இந்திய வீரர்கள் எதிரணியை ஒரு கோல் கூட அடிக்க விடாமல் 7 - 0 என மிகப்பெரிய வெற்றியைப் பதிவு செய்தனர்.

இந்திய அணியில் ரோஷன் குஜுர், தில்ராஜ் சிங் ஆகியோர் தலா 2 கோல்களும், அஜீத் யாதவ், அனுமோல் எக்கா, கேப்டன் ரோஹித் ஆகியோர் தலா ஒரு கோலும் போட்டனர்.

இந்திய அணி இன்னும் தனக்கிருக்கும் இரண்டு லீக் போட்டிகளில் இன்று ஓமன் அணியையும், டிசம்பர் 2-ம் தேதி ஸ்விட்சர்லாந்து அணியையும் எதிர்கொள்ளவிருக்கிறது.

இந்திய அணி 2001 மற்றும் 2016 என இரண்டு முறை ஜூனியர் ஹாக்கி உலகக் கோப்பையை வென்றிருக்கிறது என்பது குறிப்பிடத்தக்கது.