Rage Bait: 2025-ம் ஆண்டின் சிறந்த வார்த்தை; `இது வெறும் சொல் அல்ல' - எச்சரிக்கும் ஆக்ஸ்போர்ட்!

ஒவ்வொரு ஆண்டும் ஆக்ஸ்போர்ட் அகராதி ஒரு சொல்லைத் தேர்வு செய்து அதை அந்த ஆண்டின் சிறந்த வார்த்தையாக அறிவிக்கும். அதன் அடிப்படையில் இந்த ஆண்டு "ரேஜ் பெய்ட்" (Rage Bait) என்ற வார்த்தையைத் தேர்வு செய்திருக்கிறது.

ஆன்லைனில் எதையாவது படிக்கும்போது அல்லது பார்க்கும்போது, அது வேண்டுமென்றே நம்மைக் கோபப்படுத்துவதற்காக உருவாக்கப்பட்டதுபோல் தோன்றியிருக்கிறதா?

உதாரணமாக ஒரு உறவினரை, அல்லது செல்லப்பிராணியை, நண்பரை எரிச்சலூட்டுவதுபோன்ற காணொளியைப் பார்த்துக் கோபப்பட்டிருக்கிறீர்களா? அதைத்தான் "ரேஜ் பெய்ட்" (Rage Bait) என்கிறார்கள். வேண்டுமென்றே மக்களைக் கோபப்படுத்தி, அதன் மூலம் அதிக லைக், கமெண்ட், ஷேர் வாங்குவதற்காக வடிவமைக்கப்பட்ட கண்டென்ட்.

சமூக வலைதள அல்காரிதம்கள் கோபத்தை உருவாக்கும் கண்டென்ட்களை அதிகம் காட்டுகின்றன. அதனால், மக்கள் கோபத்தைத் தூண்டும் பதிவுகளை அதிகம் பார்த்து, தங்கள் கருத்துகளைப் பதிவிடுகிறார்கள். இந்தச் செயல்முறைகளால், இந்த ஆண்டு "Rage Bait" என்ற வார்த்தையின் பயன்பாடு மூன்று மடங்கு அதிகரித்திருக்கிறது.

சில இடங்களில் அரசியல் விவாதங்களில் வேண்டுமென்றே பரப்பப்படும் பொய்த் தகவல்கள், மக்களிடம் பிரிவினையைத் தூண்டும் கருத்துகள் போன்றவையும் இதில் அடங்கும்.

2024-ல் ஆக்ஸ்போர்ட் அகராதி முடிவில்லாமல் ஸ்க்ரோல் செய்வதால் ஏற்படும் மனச்சோர்வைக் குறிக்கும் "பிரெயின் ரோட்" (Brain Rot) அதாவது மூளை அழுகல் என்ற வார்த்தையைத் தேர்வு செய்திருந்தது.

இந்த Brain Rot, Rage Bait ஆகிய இரண்டு வார்த்தைகள் குறித்து ஆக்ஸ்போர்ட் அகராதியின் தலைவர் காஸ்பர் கிராத்வோல், "ஒருவர் அதிகம் ஸ்க்ரோல் செய்கிறார் என்றால் அவருக்குக் கோபப்படும்படியான கண்டென்ட்கள் அதிகம் காண்பிக்கப்படும். அதனால் அதிக ஈடுபாட்டுடன், கோபப்பட்டு கமெண்ட், லைக் எனக் கொடுத்துக்கொண்டிருப்பார்.

அதை அல்காரிதம் மேலும் அதிகரிக்கும். அதனால் அவர் தொடர்ச்சியாக ஸ்க்ரோல் செய்துகொண்டிருப்பார். அதன் காரணமாக மனம் சோர்வடையும். இந்த இரண்டு வார்த்தைகளும் ஒருவரின் சமூக ஊடகப் பயன்பாட்டின் மாபெரும் சுழற்சியைக் குறிக்கும் வார்த்தைகள். இந்த வார்த்தைகள் வெறும் டிரெண்ட் மட்டுமல்ல - டிஜிட்டல் தளங்கள் நம் சிந்தனையையும் நடத்தையையும் எப்படி மாற்றுகின்றன என்பதைக் காட்டுகின்றன" என்கிறார்.

ஆக்ஸ்போர்ட் அகராதி இந்த ஆண்டுக்கான சிறந்த வார்த்தையாக Rage Bait என்ற வார்த்தையைத் தேர்வு செய்ததுபோல, காலின்ஸ் அகராதி AI உதவியுடன் கம்ப்யூட்டர் கோட் எழுதும் "வைப் கோடிங்" (Vibe Coding) என்ற வார்த்தையையும், கேம்பிரிட்ஜ் அகராதி தெரியாத பிரபலங்களுடன் ஆன்லைனில் ஒருதலைப்பட்ச நட்பு வைத்துக்கொள்ளும் "பாராசோஷியல்" (Parasocial) என்ற வார்த்தையையும் தேர்வு செய்திருக்கின்றன.