Youth: `சந்தோஷமாக இருக்கு கென், ஆனா அதைவிட அம்மாவுக்கு ரொம்ப பயமா இருக்கு!'- கலங்கிய கிரேஸ் கருணாஸ்

கென் கருணாஸ் இயக்கத்தில் 'யூத்' படம் வெளியாக இருக்கிறது. இந்நிலையில் இப்படத்தின் ப்ரி- ரிலீஸ் ஈவென்ட் இன்று ( மார்ச். 13) நடைபெற்றது.

இதில் கலந்துகொண்டு பேசிய கிரேஸ் கருணாஸ், "என் பையனுக்கு 'அசுரன்' படத்தில் நடிக்க வாய்ப்பு வந்தபோது வெற்றிமாறன் என்னிடம் ஒரு விஷயம் கேட்டார்.

'இந்தப் படத்தில் அவர் நடித்தால் +2 தேர்வு எழுத முடியாமல் போகலாம். அதற்கு நீங்கள் ஒத்துக்கொண்டால் சொல்லுங்கள். ஆனால் இந்த படத்தில் நடித்தால் அவருக்கு ஒரு பெரிய எதிர்காலம் இருக்கும்' என்று சொன்னார்.

நானும் சிறிது நேரம் யோசித்துப் பார்த்து ஓகே சொல்லிவிட்டேன். பிறகு நான் வெற்றிமாறனிடம் என் பையன் எப்படி நடிக்கிறார் என்று கேட்டேன்.

அதற்கு அவர் ஒரு விஷயம் சொன்னார். 'எல்லாரும் நல்லா நடிக்கிறான் என்று சொல்லி அவனை ஏத்தி விடுறாங்க. ஆனால் தனுஷ் அவனை மகனாக பார்க்க ஆரம்பிச்சிட்டார்.

இவன் அவரை அப்பாவாக பார்க்க ஆரம்பிச்சிட்டான் என்றால் நல்ல விஷயம். தனுஷ் ஒரு பல்கலைக்கழகம் மாதிரி. அவரிடம் எல்லா விஷயமும் கத்துக்கலாம். அவருடன் இருந்தால் நடிப்பு மட்டும் இல்லாமல் சினிமா பற்றி நிறைய கத்துக்குவான்' என்று சொன்னார்.

நான் இன்று இந்த மேடையில் வந்து இப்படி பேசுவேன் என்று ஒருபோதும் நினைத்ததே இல்லை. என் மகன் இன்று இந்த அளவிற்கு வளர்ந்திருக்கிறான் என்றால் அதற்கு முக்கிய காரணம் வெற்றிமாறனும் தனுஷும் தான்.

கென் எனக்கு ரொம்ப சந்தோஷமாக இருக்கிறது. ஆனால் அதைவிட அம்மாவுக்கு ரொம்ப பயமாக இருக்கிறது. இந்தப் படம் நன்றாக வரும் என நம்புகிறேன். எல்லோரும் இந்தப் படத்தை தியேட்டருக்கு போய் பார்த்து ஆதரவு கொடுங்கள்" என்று கண்கலங்கி பேசியிருக்கிறார்.