`எம்.ஜி.ஆர் வேஷம் போட்டுட்டு பிரசாரத்துக்கு காசு கேட்டா தப்பு!' - கத்தார் தொழிலத...
உலகின் நம்பர் 1 குத்துச்சண்டை வீரரை வீழ்த்திய 21 வயது தமிழ் இளைஞர் - யார் இந்த விஸ்வநாத் சுரேஷ்?
மங்கோலியாவின் உலன்பாதர் நகரில் நடைபெற்று வரும் 2026 ஆசிய குத்துச்சண்டை சாம்பியன்ஷிப் போட்டியில், இந்திய விளையாட்டு உலகையே அதிரவைக்கும் ஒரு சம்பவம் நிகழ்ந்துள்ளது. யாராலும் அசைக்க முடியாத "உலக நம்பர் 1" என்ற மகுடம், அசாத்தியமான வேகம், அனுபவம் என மலைபோல நின்ற கஜகஸ்தான் வீரர் சஞ்சார் தாஷ்கென்பேவை, ஒரு 21 வயது தமிழ் இளைஞன் வீழ்த்துவான் என்று யாரும் கணிக்கவில்லை.

யார் இந்த விஸ்வநாத் சுரேஷ்?
சென்னையின் பெரம்பூர் பகுதியைச் சேர்ந்த விஸ்வநாத் சுரேஷின் இந்த வெற்றிப் பயணம் அத்தனை எளிதானதாக இருக்கவில்லை. ஒரு தையல் கலைஞரான இவரது தந்தை சுரேஷ் பாபு, தானும் ஒரு குத்துச்சண்டை வீரராக வேண்டும் என்ற தனது கனவு நிறைவேறாத நிலையில், தனது மகனை ஒரு சிறந்த வீரராக மாற்ற வேண்டும் என்பதில் உறுதியாக இருந்தார். ஆரம்பகாலத்தில் சரியான பயிற்சி உபகரணங்கள் வாங்கக் கூட வசதியில்லாத சூழலில், பொது மைதானங்களில் தனது தந்தையிடமே விஸ்வநாத் அடிப்படைப் பயிற்சிகளைப் பெற்றார். பலமுறை உயரம் குறைவாக இருப்பதாகக் கூறி நிராகரிக்கப்பட்டாலும், விடாமுயற்சியால் புனேவில் உள்ள ராணுவ விளையாட்டு நிறுவனத்தில் இடம்பிடித்தார்.

2022-ல் நடந்த ஐபிஏ (IBA) உலக இளையோர் சாம்பியன்ஷிப் மற்றும் ஆசிய இளையோர் சாம்பியன்ஷிப் ஆகிய இரண்டிலும் தங்கம் வென்று அசத்தினார். அதன் தொடர்ச்சியாக நடந்த தேசிய அளவிலான போட்டிகளிலும் தங்கம் வென்று இந்தியாவின் நம்பர் 1 வீரராக உருவெடுத்தார். தற்போது சீனியர் 50 kg பிரிவிலும் உலக சாம்பியனை 5-0 என்ற கணக்கில் வீழ்த்தியதன் மூலம், சர்வதேச அரங்கில் இந்தியாவுக்குப் பதக்கம் பெற்றுத் தரக்கூடிய ஒரு முக்கிய வீரராக அவர் தன்னை நிலைநிறுத்திக் கொண்டுள்ளார்.
விஸ்வநாத் சுரேஷின் இந்த வெற்றி வெறும் ஒரு தனிநபர் வெற்றி மட்டுமல்ல, வறுமையையும் தடைகளையும் தாண்டி சாதிக்கத் துடிக்கும் ஒவ்வொரு இந்திய இளைஞனுக்கும் ஒரு உந்துசக்தியாக அமைந்துள்ளது. வேகம், சமயோசித புத்தி மற்றும் எதிராளியின் பலவீனத்தை நொடியில் கணிக்கும் திறன் ஆகியவற்றைத் தனது ஆயுதமாகக் கொண்டுள்ள இவர், விரைவில் ஒலிம்பிக் போன்ற உலகப் புகழ்பெற்ற மேடைகளிலும் இந்தியாவின் மூவர்ணக் கொடியைப் பறக்கவிடுவார் என்று எதிர்பார்க்கப்படுகிறது.






















