"அப்பாபோல் அரசியலுக்கு வரமாட்டேன்; இயக்குநர் ஆகணுங்கிற ஆசை எனக்கு இருந்ததில்லை..!” - கென் கருணாஸ்

கென் கருணாஸ் 'அசுரன்', 'விடுதலை 2', 'வாத்தி' போன்ற படங்களில் நடித்து மக்கள் மத்தியில் கவனத்தை ஈர்த்திருந்தார்.

இதனிடையே தனுஷின் சில படங்களில் உதவி இயக்குநராக பணியாற்றினார்.

தற்போது 'யூத்' படத்தை இயக்கி இயக்குநராக தமிழ் சினிமாவில் அறிமுகமாகி இருக்கிறார்.

மார்ச் 19 ஆம் தேதி திரையரங்குகளில் 'யூத்' படம் வெளியானது. இந்நிலையில் செய்தியாளர்களைச் சந்தித்த கென்னிடம் இயக்குநர் ஆனது குறித்து கேள்வி எழுப்பப்பட்டிருக்கிறது.

அதற்கு பதிலளித்த அவர், " எனக்கு இயக்குநராக வேண்டும் என்ற ஆசை இருந்ததில்லை. நான் இயக்குநர் ஆனது இன்றைக்கு ரொம்ப சந்தோஷமாக இருக்கிறது.

ஆனால் முதலில் எனக்கு ஒரு நல்ல நடிகனாக வேண்டும். ஹீரோவாக வேண்டும் என்ற ஆசைதான் இருந்தது.

'அசுரன்', 'விடுதலை', 'வாத்தி' படங்களில் சீரியஸ் ஆன கதாபாத்திரங்களில் நடித்ததால் எனக்கு சீரியஸ் ஆன கதாபாத்திரங்களில் நடிக்க மட்டுமே வாய்ப்பு வந்தது.

இதே மாதிரியான படங்களில் நடித்துக்கொண்டிருக்க முடியாது. ஒரு ஜாலியான என்டர்டெயின்ட்மன்ட் பண்ணுகின்ற மாதிரியானப் படங்களில் நடிக்க வேண்டும் என்ற ஆசை இருந்தது.

ஆனால் எந்த இயக்குநர்களும் இந்த மாதிரியான கதைகளில் நடிக்க அழைக்கவில்லை. அதனால் தான் நாமே படம் எடுப்போம் என்ற முடிவை எடுத்தேன்" என்று கூறியிருக்கிறார்.

தொடர்ந்து அப்பா மாதிரி அரசியலுக்கு வருவீர்களா? என்ற கேள்விக்கு, " நான் அரசியலுக்கு வர மாட்டேன், எனக்கும் அதற்கும் சம்பந்தமில்லை. என்னுடைய அப்பாவின் வாழ்க்கை வேறு, என்னுடைய வாழ்க்கை வேறு" என்று பதிலளித்திருக்கிறார்.