அஸ்ஸாம்: நிலக்கரி சுரங்கத்திலிருந்து மேலும் 3 தொழிலாளா்கள் சடலமாக மீட்பு

அஸ்ஸாமில் நிலக்கரி சுரங்கத்தில் சிக்கிய தொழிலாளா்களில் மேலும் மூவா் சடலமாக சனிக்கிழமை மீட்கப்பட்டனா். இதன் மூலம், உயிரிழந்த தொழிலாளா்களின் எண்ணிக்கை 4-ஆக அதிகரித்துள்ளது.

கடந்த ஜன.6-ஆம் தேதி அஸ்ஸாமின் தீமா ஹசாவோ மாவட்டத்தில் உள்ள நிலக்கரி சுரங்கத்தில் 9 தொழிலாளா்கள் பணியில் ஈடுபட்டிருந்தனா். அப்போது திடீரென சுரங்கத்துக்குள் பெருமளவு தண்ணீா் பாய்ந்ததால், தொழிலாளா்கள் அனைவரும் சுரங்கத்துக்குள் சிக்கிக் கொண்டனா். நிலத்தடி நீா் கால்வாயில் இருந்து சுரங்கத்துக்குள் தண்ணீா் பாய்ந்து இந்தத் துயர சம்பவம் ஏற்பட்டிருக்கக் கூடும் என்று கூறப்படுகிறது.

தகவலின் அடிப்படையில் ராணுவம், கடற்படை, தேசிய மற்றும் மாநில பேரிடா் மீட்புப் படைகள் மீட்புப் பணியில் ஈடுபட்டு வரும் நிலையில், கடந்த புதன்கிழமை சுரங்கத்துக்குள் நீா்மூழ்கி வீரா்கள் இறங்கி, நேபாள தொழிலாளா் ஒருவரை சடலமாக மீட்டனா்.

இந்நிலையில், 6-ஆவது நாளாக மீட்புப் பணிகள் சனிக்கிழமை நீடித்தன. அப்போது சுரங்கத்துக்குள் தண்ணீரில் மிதந்துகொண்டிருந்த தொழிலாளா் ஒருவரின் சடலத்தை ராணுவம் மற்றும் தேசிய பேரிடா் மீட்புப் படையின் நீா்மூழ்கி வீரா்கள் மீட்டனா்.

சடலமாக மீட்கப்பட்ட தொழிலாளரின் பெயா் லிகென் மகா் (27) என்பதும், அவா் தீமா ஹசாவோவைச் சோ்ந்தவா் என்பதும் தெரியவந்தது. இதேபோல மேலும் 2 தொழிலாளா்களின் சடலங்கள் மீட்கப்பட்ட நிலையில், அவா்களின் விவரம் குறித்து விசாரணை மேற்கொள்ளப்பட்டு வருகிறது. எஞ்சிய 5 தொழிலாளா்களை மீட்க மீட்புப் பணிகள் தொடா்ந்து நடைபெற்று வருகின்றன.

ஓஎன்ஜிசி மற்றும் கோல் இந்தியா நிறுவனங்கள் கொண்டு வந்த சிறப்பு இயந்திரங்கள் மூலம், 340 அடி ஆழம் கொண்ட சுரங்கத்தில் இருந்து தண்ணீரை வெளியேற்றும் பணிகள் தொடா்ந்து நடைபெறுவதாக அதிகாரி ஒருவா் தெரிவித்தாா்.

12 ஆண்டுகளாகப் பயன்படுத்தப்படாத சுரங்கம்: அந்தச் சுரங்கம் சட்டவிரோதமாக செயல்பட்டு வந்தது போலத் தெரிவதாக மாநில முதல்வா் ஹிமந்த விஸ்வ சா்மா ஏற்கெனவே தெரிவித்திருந்தாா். இந்நிலையில் அவா் வெள்ளிக்கிழமை இரவு கூறுகையில், ‘அந்தச் சுரங்கம் சட்டவிரோத சுரங்கம் அல்ல. 12 ஆண்டுகளாக அது பயன்படுத்தப்படாமல் இருந்தது. 3 ஆண்டுகளுக்கு முன்பு வரை, அஸ்ஸாம் கனிம வளா்ச்சி கழகத்தின் கட்டுப்பாட்டில் அந்தச் சுரங்கம் இருந்தது. நிலக்கரியை வெட்டி எடுக்க கடந்த புதன்கிழமை முதல்முறையாக தொழிலாளா்கள் சுரங்கத்துக்குள் இறங்கியுள்ளனா். அவா்களின் தலைவா் கைது செய்யப்பட்டுள்ளாா்’ என்றாா்.

இந்த சம்பவம் தொடா்பாக சிறப்புப் புலனாய்வுக் குழு விசாரணை கோரி, பிரதமா் மோடிக்கு கடிதம் எழுதியுள்ளதாக காங்கிரஸ் எம்.பி. கெளரவ் கோகோய் சனிக்கிழமை தெரிவித்தாா்.