உபி: பண்ணை வீட்டில் ஓய்வெடுத்த பாஜக தலைவரை கட்டிப்போட்டு ரூ.50 லட்சத்தை கொள்ளையடித்த கும்பல்!

உத்தரப்பிரதேச மாநிலம், கான்பூரை சேர்ந்த ரமேஷ் யாதவ் என்பவர் சமீபத்தில் பாஜகவின் பிற்படுத்தப்பட்டோர் பிரிவின் மாநில செயலாளராக நியமிக்கப்பட்டார். பதவி கிடைத்தவுடன் ரமேஷ் கட்சி அலுவலகத்திற்கு சென்று புதிய பொறுப்பை ஏற்றுக்கொண்டார். அன்று முழுவதும் பதவி கிடைத்ததை கட்சி அலுவலகத்தில் கொண்டாடினார். இரவில் கொண்டாட்டம் முடிந்த பிறகு நகரில் இருந்து 15 கிலோமீட்டர் தொலையில் உள்ள தனது பண்ணை வீட்டில் சென்று ஓய்வு எடுத்துக்கொண்டிருந்தார். நள்ளிரவில் முகமூடிக் கொள்ளையர்கள் வீட்டிற்குள் நுழைந்தனர். அவர்கள் முழு அளவில் தயார் நிலையில் வந்திருந்தனர். முதலில் ரமேஷ் யாதவை கை, கால்களை கட்டிப்போட்டனர்.

பின்னர் வீட்டை சூறையாடி அங்கு இருந்த நகை மற்றும் பணத்தை கொள்ளையடித்தனர். அவற்றின் மதிப்பு ரூ.50 லட்சம் இருக்கும். ஆளும் கட்சியைச் சேர்ந்த முக்கியத் தலைவர் ஒருவரின் வீட்டில் நடந்த கொள்ளைச் சம்பவம் குறித்த செய்தி பரபரப்பை ஏற்படுத்தியது.

மூத்த போலீஸ் அதிகாரிகள் உடனடியாக சம்பவ இடத்திற்கு விரைந்தனர். இணை போலீஸ் கமிஷனர் டாக்டர் விபின் டாடா, போலீஸ் உதவி கமிஷனர் (தெற்கு) தீபேந்திர நாத் சௌத்ரி மற்றும் பெருமளவிலான போலீஸார் சம்பவ இடத்திற்கு வந்து விசாரணையைத் தொடங்கினர்.

முகமூடி அணிந்த குற்றவாளிகளை அடையாளம் காணும் முயற்சியில், பண்ணை வீடு மற்றும் அதனைச் சுற்றியுள்ள பகுதிகளிலிருந்து பெறப்பட்ட சிசிடிவி (CCTV) காட்சிகளைப் போலீசார் தற்போது ஆய்வு செய்து வருகின்றனர். நான்கு பாதுகாவலர்கள், நான்கு துப்பாக்கி ஏந்தியவர்கள் மற்றும் ஒரு ஓட்டுநர் உட்பட சுமார் 14 ஊழியர்கள் விசாரணைக்காகப் பிடித்து செல்லப்பட்டுள்ளனர். கொள்ளையர்களைப் போலீசாரால் இதுவரை அடையாளம் காண முடியவில்லை. ரமேஷ் யாதவ் ஒரு சாதாரண உள்ளூர் தலைவர் கிடையாது. அவர் மூன்று முறை கட்சியில் பிளாக் பொறுப்பாளராக பணியாற்றி இருக்கிறார்.

அவரது மனைவி சஷியும் அதே பதவியை வகித்துள்ளார். மேலும், 2022-ஆம் ஆண்டு நடைபெற்ற சட்டமன்றத் தேர்தலில் பித்தூர் தொகுதியிலிருந்து பகுஜன் சமாஜ் கட்சியின் (BSP) சார்பில் அவர் போட்டியிட்டார். அண்மையில் பாஜகவில் இணைந்த அவருக்கு, மாநிலச் செயலாளர் என்ற முக்கியப் பொறுப்பு வழங்கப்பட்டுள்ளது.