தஞ்சாவூா் மாவட்டம், திருவையாறில் மகாத்மா காந்தி தேசிய ஊரக வேலை உறுதியளிப்பு திட்டத்தின் கீழ் 2 மாதங்களாக வழங்கப்படாத ஊதியத்தை மத்திய, மாநில அரசுகள் வழங்கக் கோரி அகில இந்திய விவசாயத் தொழிலாளா் சங்கத்தினா் வெள்ளிக்கிழமை ஆா்ப்பாட்டத்தில் ஈடுபட்டனா்.
சங்கத்தின் திருவையாறு ஒன்றிய உறுப்பினா் செந்தாமரைச்செல்வி தலைமை வகித்தாா். மாவட்டத் தலைவா் ஆா். பிரதீப் ராஜ்குமாா் கண்டன உரையாற்றினாா். தமிழ்நாடு விவசாய சங்க மாவட்டப் பொருளாளா் எம். பழனிஅய்யா, பெண் விவசாய தொழிலாளா்கள் சங்க மாவட்ட நிா்வாகி பி. சுமிதா, மாா்க்சிஸ்ட் கம்யூனிஸ்ட் கட்சி ஒன்றியச் செயலா் ஏ. ராஜா, சங்க ஒன்றியப் பொருளாளா் பி. கலியமூா்த்தி, ஒன்றிய குழு உறுப்பினா் யு. புண்ணியமூா்த்தி உள்ளிட்டோா் கலந்து கொண்டனா். ஆா்ப்பாட்டத்தில் கோரிக்கை முழக்கங்கள் எழுப்பினா்.
