'என் மகன்/மகளுக்கு 18 வயசு; ஆனால்...' - கல்யாண செலவு நிதியைத் திட்டமிட வழிகாட்டி | பணம் வளர்ப்போம்

குழந்தைகளின் திருமணம் என்பது அனைத்து பெற்றோர்களின் ஆசை. 'அப்படி செய்யணும்... இப்படி செய்யணும்' என்று ஏகப்பட்ட கனவுகள் வேறு இருக்கும்.

ஆனால், பெரும்பாலான திருமணங்கள் கடன் வாங்கித்தான் செய்யப்படுகின்றன.

இதைத் தடுக்க முன்னரே பிளான் செய்யுங்கள் என்று கூறுகிறார் நிதி ஆலோசகர் முனைவர் A.V செந்தில்.

"தனித்தனியாக முதலீடு செய்ய முடியாது என்று நினைப்பவர்கள், செல்வ மகள் அல்லது செல்வ மகன் திட்டத்திலேயே பணம் கொஞ்சம் கூட சேர்த்து முதலீடு செய்து வாருங்கள்.

படிப்பிற்காக பாதி பணத்தை எடுத்து, திருமணத்திற்காக பாதி பணத்தை வைத்துக்கொள்ளுங்கள்.

சிம்பிளாக திருமணம் செய்ய நினைப்பவர்களுக்கு அவ்வளவு செலவு ஆகாது. இன்றைய காலகட்டத்தில் பலரும் ஆடம்பர திருமணத்தையே விரும்புகிறார்கள்.

ஆனால், அந்த ஆடம்பரம் பெரும் பணக்காரருடைய ஆடம்பரமாக இல்லாமல், நம்முடைய அளவிற்கு ஆடம்பரமாக இருந்தால் நல்லது.

இல்லை... ஆடம்பரமே வேண்டாம் என்று நினைத்தால், அது சூப்பரோ சூப்பர்.

என் மகள் அல்லது மகனுக்கு 18 வயதாகிவிட்டது. இப்போது எப்படி நிதி திட்டமிடலாம் என்று கேட்பவர்களுக்கான பதில்...

ரிஸ்க் எடுக்க முடியாதவர்கள்... ரிஸ்க் எடுக்க விருப்பமில்லாதவர்கள், 18 வயதில் இருந்து கல்யாணத்திற்கு ஆகக்கூடிய செலவு என்பதை தோராயமாகக் கணக்கிட்டு, அதற்கான சின்ன தொகையை மாதா மாதம் ஆர்.டியில் சேர்த்து வரலாம்.

இல்லையென்றால், மல்டி அசட் ஃபண்டில் முதலீடு செய்து வரலாம். இது மூலம் 8 - 10 சதவிகிதம் வட்டி கிடைக்கும்.

அதிக ரிஸ்க் எடுக்கலாம் என்பவர்கள் இக்விட்டி ஃபண்டில் முதலீடு செய்தால், ஒருவேளை, இரட்டிப்பு லாபம் கூட கிடைக்கலாம்.

அசாதாரண சூழல்களில் சந்தை இறங்கினால், வேல்யூயேஷன் குறைந்தால், அந்தச் சமயத்தைப் பயன்படுத்தி, பல்க் தொகை இருந்தாலோ அல்லது கொஞ்ச தொகை இருந்தால் கூட அப்போது முதலீடு செய்யலாம்.

ஆனால், இக்விட்டி ஃபண்டில் முதலீடு செய்திருப்பவர்கள், கல்யாணம் ஆவதற்கு ஓரிரண்டு ஆண்டுகளுக்கு முன்பு டெப்ட் ஃபண்டிற்கு மாற்றி விடுவது நல்லது. இது ரிஸ்க்கைக் குறைக்கும்.

மேலே சொன்ன கணக்கெல்லாம் 18 வயது குழந்தைகளுக்கு, அவர்களுக்கு 5 - 7 ஆண்டுகள் கழித்து திருமணமானால் என்பதற்கான கணக்கு.

தங்க நகைகள் முன்னரே வாங்கி வைத்தால், கல்யாணத்தின் போது பழைய டிரெண்ட் ஆகிவிடும். அதனால், தங்க நகைகளில் முதலீடு செய்வதை விட, கோல்டு இ.டி.எஃப்பில் முதலீடு செய்துவரலாம்.

கோல்டு இ.டி.எஃப்பில் ரூ.100-க்கு கூட முதலீடு செய்யலாம் என்பது ப்ளஸ். அதனால், வாரத்திற்கு ஒரு ரூ.100-ஐ கோல்டு இ.டி.எஃப்பில் முதலீடு செய்து வந்தாலும், நல்ல லாபத்திற்கான வாய்ப்புகள் உண்டு.

செய்கூலி, சேதாரம் இல்லாமல் நகை வாங்க வேண்டுமானால், கல்யாணத்திற்கு 2 - 3 ஆண்டுகளுக்கு முன்பிலிருந்து நம்பகமான நகைக்கடைகளில் நகை சீட்டுகள் கூட போடலாம் ".