ஏபிஎன் ஆம்ரோ ஓபன்: மெத்வதெவ், மினாா் வெற்றி

நெதா்லாந்தில் நடைபெறும் ஏபிஎன் ஆம்ரோ ஓபன் ஆடவா் டென்னிஸ் போட்டியில், ரஷியாவின் டேனியல் மெத்வதெவ், ஆஸ்திரேலியாவின் அலெக்ஸ் டி மினாா் ஆகியோா் 2-ஆவது சுற்றுக்கு செவ்வாய்க்கிழமை முன்னேறினா்.

முதல் சுற்றில், போட்டித்தரவரிசையில் 2-ஆம் இடத்திலிருக்கும் மெத்வதெவ் 6-7 (8/10), 6-4, 6-1 என்ற செட்களில், 3 முறை கிராண்ட்ஸ்லாம் சாம்பியனான சுவிட்ஸா்லாந்தின் ஸ்டான் வாவ்ரிங்காவை வீழ்த்தினாா். 3-ஆம் இடத்திலிருக்கும் அலெக்ஸ் டி மினாா் 6-2, 6-4 என்ற நோ் செட்களில், பெல்ஜியத்தின் டேவிட் காஃபினை தோற்கடித்தாா்.

6-ஆம் இடத்திலிருக்கும் கிரீஸின் ஸ்டெஃபனோஸ் சிட்சிபஸ் 6-1, 7-5 என்ற செட்களில் பிரான்ஸின் ஹரால்டு மேயட்டையும், 8-ஆம் இடத்திலிருக்கும் போலந்தின் ஹியூபா்ட் ஹா்காக்ஸ் 6-3, 6-2 என்ற கணக்கில் இத்தாலியின் ஃப்ளாவியோ கோபோலியையும் சாய்த்தனா். செக் குடியரசின் ஜேக்கப் மென்சிக் 6-4, 6-4 என கஜகஸ்தானின் அலெக்ஸாண்டா் பப்ளிக்கை வென்றாா்.

செக் குடியரசின் ஜிரி லெஹெக்கா 7-5, 6-2 என்ற கணக்கில் ஆஸ்திரேலியாவின் அலெக்ஸி பாபிரினையும், இத்தாலியின் மேட்டியா பெலுச்சி 6-3, 6-2 என நெதா்லாந்தின் மீஸ் ராட்கெரிங்கையும் வெளியேற்றினா். இதையடுத்து 2-ஆவது சுற்றில், மெத்வதெவ் - பெலுச்சியையும், லெஹெக்கா - ஹா்காக்ஸையும் சந்திக்கின்றனா்.

டல்லாஸ் ஓபன்: இதனிடையே, அமெரிக்காவின் டெக்ஸாஸில் நடைபெறும் டல்லாஸ் ஓபன் ஆடவா் டென்னிஸ் போட்டியில் போட்டித்தரவரிசையில் 5-ஆம் இடத்திலிருக்கும் உள்நாட்டு வீரா் ஃபிரான்சஸ் டியாஃபோ 6-1, 3-6, 6-4 என்ற செட்களில் ஜப்பானின் டேரோ டேனியலை வீழ்த்தி 2-ஆவது சுற்றுக்கு முன்னேறினாா்.

ஆஸ்திரேலியாவின் ரிங்கி ஹிஜிகடா 7-5, 6-3 என பிரான்ஸின் அட்ரியன் மன்னரினோவையும், 8-ஆம் இடத்திலிருக்கும் இத்தாலியின் மேட்டியோ அா்னால்டி 6-3, 6-4 என அமெரிக்காவின் கிறிஸ்டோபா் யூபேங்க்ஸையும் வென்று, அவா்களை வெளியேற்றினா்.

ஸ்பெயினின் அலெக்ஸாண்ட்ரோ டேவிடோவிச் 6-1, 7-5 என எளிதாக, அமெரிக்காவின் பிராண்டன் ஹோல்டை தோற்கடித்தாா்.

அபுதாபி ஓபன்: அனஸ்தாசியா, லெய்லா முன்னேற்றம்

ஐக்கிய அரபு அமீரகத்தில் நடைபெறும் அபுதாபி ஓபன் மகளிா் டென்னிஸ் போட்டியில், ரஷியாவின் அனஸ்தாசியா பாவ்லியுசென்கோவா, கனடாவின் லெய்லா ஃபொ்னாண்டஸ் ஆகியோா் 2-ஆவது சுற்றுக்கு முன்னேறினா்.

முதல் சுற்றில், போட்டித்தரவரிசையில் 6-ஆம் இடத்திலிருக்கும் அனஸ்தாசியா 6-3, 6-1 என்ற செட்களில் அமெரிக்காவின் சோஃபியா கெனினை சாய்த்தாா். 8-ஆம் இடத்திலிருக்கும் லெய்லா 7-6 (7/3), 7-6 (7/0) என்ற கணக்கில் ஜப்பானின் மொயுகா உசிஜிமாவை வென்றாா்.

சுவிட்ஸா்லாந்தின் பெலிண்டா பென்சிச் 6-2, 3-6, 6-1 என ஸ்லோவாகியாவின் ரெபெக்கா ஸ்ராம்கோவாவையும், செக் குடியரசின் லிண்டா நோஸ்கோவா 6-0, 6-3 என போலந்தின் மெக்தலினா ஃபிரெச்சையும், போலந்தின் மெக்தா லினெட் 6-4, 7-6 (8/6) என மெக்ஸிகோவின் ரெனடா ஜராஜுவாவையும் வீழ்த்தினா்.

5-ஆம் இடத்திலிருந்த ரஷியாவின் லுட்மிலா சாம்சோனோவா, 7-5, 1-6, 6-7 (5/7) என்ற செட்களில் சக ரஷியரான வெரோனிகா குதா்மிடோவாவிடம் அதிா்ச்சித் தோல்வி கண்டாா். இதையடுத்து 2-ஆவது சுற்றில், பென்சிச் - குதா்மிடோவாவையும், பாவ்லியுசென்கோவா - லினெட்டையும் சந்திக்கின்றனா்.