கும்பகோணம்: தொடர் மழையால் வீடு இடிந்து விழுந்து இளம் பெண் பலி; பெற்றோர் உட்பட மூவர் காயம்

தஞ்சாவூர் மாவட்டம் கும்பகோணம் அருகே உள்ள ஆலமன்குறிச்சி உடையார் தெருவைச் சேர்ந்தவர் முத்துவேல்(56). கூலி தொழிலாளர். இவரது மனைவி சீதா (45). இவர்களின் மகள்கள் கனிமொழி (21) பி.பி.ஏ., பட்டதாரி.

ரேணுகா (20) டிப்ளமோ அக்ரி படித்துள்ளார். ஏழ்மையான குடும்பமான இவர்களுக்குச் சொந்தமான பழைய ஓட்டு வீடு ஒன்றும், அதன் அருகில் ஆஸ்பெட்டாஸ் கூரைப் போடப்பட்ட வீடும் உள்ளன.

இந்நிலையில், ஓட்டு வீடு மிகவும் மோசமான நிலையில் இருந்துள்ளது. கடந்த சில தினங்களாகத் தொடர்ந்து மழை பெய்து வருகிறது. வீடும் மோசமாக உள்ளது என்பதால் முத்துவேல், சீதா, கனிமொழி, ரேணுகா ஆகியோர் நேற்று இரவு ஆஸ்பெஸ்டாஸ் வீட்டில் தூங்கியுள்ளனர்.

இதையடுத்து தொடர்ந்து பெய்த கனமழையில் நேற்று இரவு சுமார் 11:30 மணியளவில் பழைய ஓட்டு வீட்டின் சுவர் இடிந்து, ஆஸ்பெட்டாஸ் வீட்டின் மேல் விழுந்தது. இதில், முத்துவேல், சீதா, கனிமொழி, ரேணுகா ஆகிய நான்கு பேரும் படுகாயமடைந்தனர்.

இவர்களின் அலறல் சத்தம் கேட்டு அக்கம் பக்கத்தினர் ஓடி வந்தனர். இடிபாடுகளுக்குள் காயமடைந்து கிடந்தவர்களை மீட்டு, கும்பகோணம் அரசு மாவட்ட தலைமை மருத்துவமனையில் அனுமதிக்கப்பட்டு சிகிச்சை பெற்று வருகின்றனர்.

இதில் முத்துவேலின் இரண்டாவது மகள் ரேணுகா, மேல் சிகிச்சைக்காக, தஞ்சாவூர் மருத்துவக் கல்லுாரி மருத்துவமனையில் அனுமதிக்கப்பட்ட நிலையில் நள்ளிரவு சிகிச்சை பலனின்றி இறந்தார்.

இது குறித்து வருவாய்துறை மற்றும் கும்பகோணம் தாலுக்கா போலீஸார் விசாரணை நடத்தி வருகின்றனர். பாதுகாப்பாக இருப்பதற்கு அருகில் இருந்த வீட்டுக்குச் சென்றனர். அந்த வீட்டின் மேல் ஓட்டு வீட்டின் சுவர் இடிந்து விழுந்து இப்படி ஒரு துயர நிலை நடந்துள்ளது.

இதை ரேணுகாவின் பெற்றோர் மற்றும் சகோதரி எப்படித் தாங்கப்போகிறார்கள் எனத் தெரியவில்லை என உறவினர்கள் சோகத்துடன் தெரிவித்தனர்.