``தமிழ்நாடு அரசை சீராக நடத்திடும் முதல்வர் ஸ்டாலினுக்கு நன்றி'' - நடிகர் நாசர் வெளியிட்ட வீடியோ

தமிழ் சினிமாவில் நடிகரும் சிறந்த ஓவியருமான சிவக்குமார், பல வெற்றிப்படங்களை கொடுத்துள்ளார். தமிழ் சினிமாவில் 1965-ம் ஆண்டு வெளியான 'காக்கும் கரங்கள்’ என்ற படத்தின் மூலம் அறிமுகமானவர் நடிகர் சிவக்குமார்.

இவர் கடைசியாக 2001-ல் வெளியான அஜித், ஜோதிகாவின் ’பூவெல்லாம் உன் வாசம்’ படத்தில் நடித்திருந்தார். சில சீரியல்களிலும் நடித்திருக்கிறார். தற்போது நடிப்பை நிறுத்திவிட்டு, பல கல்லூரி நிகழ்ச்சிகளில் கலந்து கொண்டு சொற்பொழிவாற்றி வருகிறார்.

இந்நிலையில், தமிழ்நாடு இசை மற்றும் கவின் பல்கலைக் கழகம் சார்பில் நடிகர் சிவகுமார், ஓவியர் சந்துரு ஆகியோருக்கு மதிப்புமிக்க டாக்டர் பட்டம் வழங்கப்பட்டுள்ளது. சென்னை கலைவாணர் அரங்கில் நடைபெற்ற பட்டமளிப்பு விழாவில் முதல்வர் ஸ்டாலின் கலந்துகொண்டு இந்த பட்டத்தை வழங்கினார்.

அதைத் தொடர்ந்து பலரும் நடிகர் சிவக்குமாருக்கு வாழ்த்துகளைத் தெரிவித்துவருகின்றனர்.

அதன் தொடர்ச்சியாக தென்னந்திய நடிகர் சங்கத் தலைவரும், நடிகருமான நாசர் சமூக ஊடகப் பக்கத்தில் வீடியோ ஒன்றை வெளியிட்டிருக்கிறார். அதில், ``அன்பும், அரணும், அனுபவமும், அறிவும், சொல்லும் செயலும், கனிவும் கற்பித்தலுமாய் திகழும் எங்கள் அண்ணன் வழிகாட்டி பாசமிகு திரு சிவகுமார் அவர்கள் இன்று மதிப்புறு முனைவர் பட்டம் பெற்றமைக்கு தென்னிந்திய நடிகர் சங்கம் மட்டுமல்ல, ஒட்டுமொத்த தமிழ் சமுதாயமே வாநிறை வாழ்த்துகளை தெரிவிக்கிறது.

இப்பெருமையை சூட்டியதற்கு தமிழ்நாடு ஜெ.ஜெயலலிதா இசை மற்றும் கவின்கலை பல்கலை கழகத்திற்கும், தன் பொற்கரங்களால் வழங்கிய தமிழ்நாடு அரசை சீராக நடத்திடும் மாண்புமிகு முதல்வர் ஸ்டாலின் அவர்களுக்கும் தென்னிந்திய நடிகர் சங்கம் தங்கள் பன்னூறு நன்றிகளை தெரிவித்துக் கொள்கிறது." எனக் குறிப்பிட்டிருக்கிறார்.