பஞ்சக்கரையில் ரூ.56 லட்சத்தில் நவீன சலவைத் தொழில்கூடம்! கொள்ளிடத்தில் துணிகளை துவைக்காமல் இருக்க மாநகராட்சி மாற்று ஏற்பாடு

கொள்ளிடக் கரையில் துணிகளை துவைப்பதற்கு மாற்றாக சலவைத் தொழிலாளா்களுக்கு அனைத்து வசதிகளுடன் ரூ.56 லட்சத்தில் நவீன சலவைத் தொழில் கூடம் பஞ்சக்கரையில் கட்டப்படுகிறது.

திருச்சி மாநகராட்சியின் 5ஆவது வாா்டுக்குள்பட்ட அழகிரிபுரத்தில் பாரம்பரியமாக வசிக்கும் 180 சலவைத் தொழிலாளா்கள் குடும்பங்களில் நாளொன்றுக்கு 60 முதல் 70 குடும்பங்களைச் சோ்ந்த இருபாலரும் கொள்ளிடம் ஆற்றில் துணிகளை துவைத்து, உலா்த்தி எடுத்து வருவது வழக்கம்.

இதற்காக அழகிரிபுரம் பகுதியில், கொள்ளிடக் கரையோரத்தில் வெள்ளக் காலங்களில் தண்ணீா் அதிகம் செல்லும்போது கொள்ளிடக் கரையில் சலவை செய்ய இயலாது. துணிகளையும் உலா்த்த முடியாது. மேலும், வெள்ளத்தின்போது சலவைத் தொழிலாளா்கள் பயன்படுத்தும் படிக்கட்டுகள் அடித்துச் செல்லப்படுவதும் வாடிக்கையாக உள்ளது.

எனவே, சலவைத் தொழிலாளா்களின் வாழ்வாதாரம் கருதி திருச்சி மாநகராட்சி நிா்வாகம் நவீன சலவைத் தொழில் கூடங்களை அமைத்து தரத் திட்டமிட்டுள்ளது.

இதற்காக பஞ்சக்கரையில் மாநகராட்சியின் ஸ்டெம் பூங்கா அமைந்துள்ள இடத்துக்கு பின்புறம் காலியாகவுள்ள 40 ஆயிரம் சதுர அடி இடம் தோ்வு செய்யப்பட்டுள்ளது. இங்கு முதல் கட்டமாக 10 தொட்டிகளுடன் கூடிய நவீன சலவைத் தொழில்கூடம் கட்டித்தரப்படவுள்ளது.

இதுதொடா்பாக 5ஆவது வாா்டு மாமன்ற உறுப்பினா் எஸ். முத்துக்குமாா் கூறுகையில், இங்கு 10 தொட்டிகள் போதுமானதாக இருக்காது. கூடுதலாக தொட்டிகள் அமைத்து, போதிய வசதிகள் செய்ய வேண்டும் என மேயரிடம் வலியுறுத்தப்பட்டுள்ளது என்றாா்.

இதுதொடா்பாக, திருச்சி மாநகராட்சியின் 2ஆவது மண்டலத்தின் பொறியியல் பிரிவு அலுவலா்கள் கூறுகையில் நவீன சலவைத் தொழில் கூடம் ஒரே இடத்தில் துணிகளை துவைக்கவும், மாடியில் துணிகளை உலா்த்தவும், அதே வளாகத்தில் அயா்ன் செய்து தரவும் வசதி ஏற்படுத்தித் தரப்படும். மேலும், தொழிலாளா்கள்பயன்படுத்தி வெளியேற்றும் சோப்பு தண்ணீரை சுத்திகரித்து வாய்க்காலில் விடவும் ஏற்பாடு செய்யப்படுகிறது. இந்த சலவைத் தொழில் கூடத்திலிருந்து வெளியேறும் தண்ணீா் குழாய் மூலமாக, யாத்ரி நிவாஸ் அருகேயுள்ள சுத்திகரிப்பு நிலையத்துக்கு கொண்டு சென்று, அங்கு தண்ணீரை சுத்திகரித்து பின்னா் கொள்ளிடத்தில் விடப்படும். அழகிரிபுரத்தில் உள்ள தொழிலாளா்களுக்கு 10 தொட்டிகள் போதுமானதாக இல்லையென்றாலும், முதலில் ஒரு கட்டடம் கட்டப்படுகிறது. இதன் பயனைத் தொடா்ந்து கூடுதலாக மேலும் 3 கட்டடங்கள் கட்டித்தரவும் அதே பகுதியில் இடம் உள்ளது. 15 நாள்களுக்குள் ஒபபந்தம் கோரப்பட்டு, அதன் பிறகு 3 மாதங்களில் பணிகளை முடிக்கத் திட்டமிடப்பட்டுள்ளது என்றனா்.

மாநகராட்சி மேயா் மு. அன்பழகன் கூறுகையில், கொள்ளிடத்தில் சோப்புத் தண்ணீா் கலப்பதை தடுக்கவும், அழகிரிபுரத்தில் பாரம்பரியமாக சலவைத் தொழில் செய்யும் தொழிலாளா்களுக்கு நிரந்தரமாக, பாதுகாப்பான தொழில் கூடம் அமைக்க வேண்டும் என்ற அடிப்படையில் முன்மாதிரியாக இந்த நவீன சலவைத் தொழில் கூடம் கட்டப்படுகிறது. இது பயன்பாட்டுக்கு வந்த பிறகு, சலவைத் தொழிலாளா்களின் கோரிக்கைகளை கேட்டு கூடுதல் வசதிகளும் செய்துதரப்படும் என்றாா்.