பட்டினிச் சாவு இல்லாத மாநிலம் தமிழ்நாடு: முதல்வர் ஸ்டாலின் பெருமிதம்

சென்னை: பட்டினிச் சாவு இல்லாத மாநிலங்களின் பட்டியலில் தமிழ்நாடு இடம் பெற்றுள்ளது என தெரிவித்த முதல்வர் மு.க.ஸ்டாலின், தமிழ்நாடு நாட்டின் இரண்டாவது வளர்ந்த பொருளாதார மாநிலமாக இருக்கிறது என கூறினார்.

தமிழக சட்டப்பேரவையின் ஆண்டு முதல் கூட்டம் ஜனவரி 6 ஆம் தேதி தொடங்கி ஆளுநர் உரைக்கு நன்றி தெரிவிக்கும் தீர்மானத்தின் மீதான விவாதம் வெள்ளிக்கிழமை நடைபெற்றது. இறுதி நாளான சனிக்கிழமை(ஜன.11) ஆளுநர் உரைக்கு நன்றி தெரிவிக்கும் தீர்மானம் மீதான விவாதத்தில் முதல்வர் மு.க.ஸ்டாலின் பதிலளித்தார்.

பட்டினிச் சாவு இல்லாத மாநிலம் தமிழ்நாடு

அப்போது முதல்வர் ஸ்டாலின் பேசுகையில், பட்டினிச் சாவு இல்லாத மாநிலங்களின் பட்டியலில் தமிழ்நாடு இடம் பெற்றுள்ளது.

தேசிய மொத்த உள்நாட்டு உற்பத்தியில் 5.4 சதவிகிதமாக இருந்த தமிழ்நாட்டின் பங்கு, கடந்த நான்கு ஆண்டுகளில் 9.21 சதவிகிதமாக உயர்ந்திருக்கிறது. பொருளாதார குறியீடுகள் அனைத்திலும் தமிழ்நாடு வளர்ச்சியை எட்டியிருக்கிறது.

வறுமைக் குறியீடுகளில் நாட்டின் சராசரி சதவிகிதம் என்பது 14.96-ஆக இருக்கும்போது தமிழ்நாட்டின் சராசரி 2.2 சதவிகிதமாக இருக்கிறது.

41 சதவிகித பெண் தொழில் பணியாளர்கள்

நாட்டின் மொத்த பெண் தொழில் பணியாளர்களில் 41 சதவிகிதம் பெண்கள் தமிழ்நாட்டில் உள்ளனர். கடந்த மூன்று ஆண்டுகளில் ரூ.10 லட்சம் கோடிக்கு மேலான தனியார் முதலீட்டுத் திட்டங்கள் வருவது உறுதி செய்யப்பட்டடுள்ளது. நாட்டிலேயே தொழில் நிறுவனங்கள் பெருகியதில் தமிழ்நாடு முதலிடம் பெற்றிருக்கிறது.

மத்திய அரசு முதல் பரிசு வழங்கிப் பாராட்டு

தில்லியில் இருக்கின்ற தேசிய கிடங்கு மேம்பாட்டு ஒழுங்குமுறை ஆணையத்தின்கீழ் அதிக எண்ணிக்கையிலான சேமிப்புக் கிடங்குகளைப் பதிவு செய்ததற்காகத் தமிழ்நாடு சேமிப்புக் கிடங்கு நிறுவனத்துக்கு மத்திய அரசு முதல் பரிசு வழங்கிப் பாராட்டியிருக்கிறது.

இதையும் படிக்க |திட்டமிட்டு ஆளுநர் விதிமீறலில் ஈடுபட்டார்: முதல்வர் ஸ்டாலின் குற்றச்சாட்டு

தமிழ்நாட்டு பணவீக்கம் குறைந்திருக்கிறது

நாடு முழுவதுமான பணவீக்கம் அதிகமாகியிருக்கிறது. தமிழ்நாட்டுக்கு மட்டுமான பணவீக்கம் குறைந்திருக்கிறது. இதுதான் ‘திராவிட மாடலின்’ சாதனை. "தொழில்கள் வளர்கின்றன; புதிய தொழில் நிறுவனங்கள் உருவாகின்றன, இதனால் தொழிலாளர்களுக்கு என்ன பயன்?" என்று சிலர் கேட்கலாம். புதிய தொழில் நிறுவனங்கள் வருகின்றதென்று சொன்னால், ஏதோ தனியார் முதலாளிகள் மட்டும் வளமடைகிறார்கள் என்று பொருளில்லை. அந்த நிறுவனங்கள் மூலமாக மாநிலம் வளர்கிறது, கிடைக்கும் வேலைவாய்ப்புகளின் மூலமாக லட்சக்கணக்கான குடும்பங்களும் வளர்கின்றன, வாழ்கின்றன, இதை மனதில்கொள்ளவேண்டும்.

39 ஆயிரத்து 666 தொழிற்சாலைகள்

தமிழ்நாட்டில் 39 ஆயிரத்து 666 தொழிற்சாலைகள் இருக்கின்றன. குஜராத்தில் 31 ஆயிரத்து 31 தொழிற்சாலைகளும், மகாராஷ்டிராவில் 26 ஆயிரத்து

446 தொழிற்சாலைகளும் இருக்கின்றன. மனித வளத்தை வளர்ப்பதில் மகாராஷ்டிரம், குஜராத்தைவிட தமிழ்நாடு சாதனை படைத்திருக்கிறது. அதுமட்டுமல்ல, தமிழ்நாட்டில் 39 ஆயிரத்து 699 சிறு, குறு தொழில்கள் இருக்கின்றன. இதன் மூலம் 4 லட்சத்து 81 ஆயிரத்து 807 தொழிலாளர்களுக்கு வேலை வாய்ப்புகள் உறுதி செய்யப்பட்டிருக்கின்றன.

வேலை வாய்ப்புகளை வழங்குவதில் முதலிடம்

கரோனா தொற்றுக் காலத்தில் வேலை வாய்ப்புகள் குறைந்தது உங்கள் அனைவருக்கும் தெரியும். அதனை சீர்படுத்தியிருக்கின்றோம். இந்திய ரிசர்வ் வங்கி வெளியிட்ட புள்ளிவிவரங்களின்படி 8 லட்சத்து 42 ஆயிரத்து 720 மனித உழைப்பு நாள்களுடன் தொழிலாளர்களுக்கு அதிக வேலை வாய்ப்புகளை வழங்குவதில் நாட்டிலேயே தமிழ்நாடு முதலிடம் பெற்றிருக்கிறது என கூறினார்.