பாஜகவிலிருந்து தன்னுடன் வெளியேறியவர்களுக்கு முக்கியத்துவம்; வேகமெடுக்கும் அண்ணாமலை-ன் We The Leaders

அண்ணாமலை தொடங்கியுள்ள We The Leaders அமைப்பில் அடுத்தகட்டமாக மாநில மற்றும் மாவட்ட அளவில் நிர்வாகிகளை நியமிக்க முடிவு செய்யப்பட்டுள்ளதாக தகவல் வெளியாகியுள்ளது. அமைப்பை விரிவுபடுத்தும் நடவடிக்கைகளின் ஒரு பகுதியாக, பல்வேறு மாவட்டங்களில் ஒருங்கிணைப்புப் பணிகளை மேற்கொள்வதற்கும், உறுப்பினர்களை ஒருங்கிணைப்பதற்கும் பொறுப்பாளர்களை நியமிப்பது குறித்து அண்ணாமலை ஆலோசித்து வருவதாகக் கூறப்படுகிறது.

குறிப்பாக, பாஜகவில் இருந்து அண்ணாமலை வெளியேறியபோது அவருடன் இணைந்து கட்சியில் இருந்து வெளியேறியவர்களுக்கு புதிய அமைப்பில் முக்கியத்துவம் அளிக்க முடிவு செய்யப்பட்டுள்ளதாகத் தகவல்கள் தெரிவிக்கின்றன. அந்த வகையில் கரு நாகராஜன், பாலாஜி உத்தமராமசாமி, வசந்தராஜன், சுமதி வெங்கடேசன், பழநி கனகராஜ் உள்ளிட்டோரின் பெயர்கள் முக்கியமாகப் பரிசீலிக்கப்படுவதாகக் கூறப்படுகிறது. இவர்களில் சிலருக்கு மாநில அளவிலான பொறுப்புகளும், மற்றவர்களுக்கு மாவட்டம் சார்ந்த பொறுப்புகளும் வழங்கப்படலாம் என எதிர்பார்க்கப்படுகிறது.

அண்ணாமலை ஆலோசனை

புதிய நிர்வாகிகளைத் தேர்வு செய்வது தொடர்பாக அண்ணாமலை நேரடியாக ஆலோசித்து வருவதாகவும், அமைப்பின் எதிர்கால செயல்பாடுகளுக்கு ஏற்ற வகையில் நிர்வாகக் கட்டமைப்பை உருவாக்குவது குறித்து முடிவுகள் எடுக்கப்பட்டுள்ளதாகவும் தகவல்கள் தெரிவிக்கின்றன. ஏற்கெனவே We The Leaders அமைப்பில் இணைந்துள்ளவர்களை ஒருங்கிணைத்து, அவர்களை களப்பணிகளில் ஈடுபடுத்தும் வகையில் மாவட்ட வாரியாக பொறுப்பாளர்களை நியமிக்கத் திட்டமிடப்பட்டுள்ளதாகக் கூறப்படுகிறது. இதன் மூலம் அமைப்பின் செயல்பாடுகளை சென்னையை மட்டுமின்றி தமிழ்நாடு முழுவதும் விரிவுபடுத்தவும், மாவட்ட அளவில் வலுவான கட்டமைப்பை உருவாக்கவும் அண்ணாமலை தரப்பு திட்டமிட்டுள்ளதாகத் தெரிகிறது.

விரைவில் அறிவிப்பு

பொறுப்புகளுக்கான பெயர்கள் குறித்த ஆலோசனை இறுதிக்கட்டத்தை எட்டியுள்ளதாகவும், விரைவில் மாநில மற்றும் மாவட்ட அளவிலான நிர்வாகிகள் குறித்த அதிகாரபூர்வ அறிவிப்பு வெளியாகும் என்றும் எதிர்பார்க்கப்படுகிறது.

பாஜகவில் இருந்து தன்னுடன் வெளியேறியவர்களுக்கு முக்கியப் பொறுப்புகளை வழங்குவதன் மூலம், அண்ணாமலை தனது அடுத்தகட்ட அரசியல் பயணத்தில் ஏற்கெனவே தன்னுடன் இருந்த நம்பிக்கைக்குரிய நிர்வாகிகளை ஒருங்கிணைக்கும் முயற்சியில் இறங்கியுள்ளதாகவும் சொல்லப்படுகிறது

இதனால், We The Leaders அமைப்பின் அடுத்தகட்ட அரசியல் நகர்வு எப்படி இருக்கும் என்பதற்கு இந்த நிர்வாக நியமனங்கள் முக்கியமானதாக அமையக்கூடும்.