மும்பையில் நள்ளிரவு டி.வி பார்ப்பதில் தகராறு: மனைவி, மகள், பேத்தியை கத்தியால் குத்திய முதியவர் கைது

மும்பை தானேயில் உள்ள ரபோடி கிராந்தி நகரில் வசிப்பவர் முகமது தாரிக் கான்(64). இவர் தனது மனைவி மற்றும் மகள், பேத்தியுடன் வசித்து வந்தார். சம்பத்தன்று முகமது தாரிக் கான்  பேத்திக்கு பிறந்தநாள் ஆகும். இதனால் நள்ளிரவு வரை கேக் வெட்டி பிறந்தநாள் கொண்டாடினார்கள். பிறந்தநாள் முடிந்த பிறகு முகமது தாரிக் கான் உறங்க முடிவு செய்தார். 

ஆனால் வீட்டில் இருந்த மனைவி, மகள் மற்றும் பேத்தி ஆகியோர் டிவி பார்க்க முடிவு செய்தனர். இதற்கு முகமது தாரிக் கான் எதிர்ப்பு தெரிவித்து, தான் உறங்கப்போவதாகவும், டிவி பார்க்ககூடாது என்று கூறி தனது மனைவியுடன் வாக்குவாதத்தில் ஈடுபட்டார்.

வாக்குவாதம் முற்றிய நிலையில் சமையல் அறைக்கு சென்று அங்கு இருந்த கத்துயை எடுத்து வந்து தனது மனைவியை முகமது தாரிக் கான் குத்தினார். இதை அவர்களின் 39 வயது மகள் தடுக்க முயன்றார். இதில் அவருக்கும் கையில் காயம் ஏற்பட்டது. இவர்களின் சண்டையில் சிக்கிக்கொண்ட முகமது தாரிக் கான் பேத்திக்கும் காயம் ஏற்பட்டது. இதனால் அவர்கள் போட்ட சத்தத்தில் பக்கத்து வீட்டுக்காரர்கள் ஓடி வந்தனர். 

அவர்கள் வந்து முகமது தாரிக் கானை மடக்கி அவரிடம் இருந்த கத்தியை பிடுங்கி அவரை போலீஸில் ஒப்படைத்தனர். காயம் அடைந்த மூன்று பேரும் மருத்துவமனையில் சேர்க்கப்பட்டு சிகிச்சை பெற்று வருகின்றனர். முகமது தாரிக் கான் மீது போலீஸார் வழக்கு பதிவு செய்து விசாரித்து வருகின்றனர்.