வடகொரியா: அதிகாரத்தின் அடுத்த வாரிசு; தலைமைப் பொறுப்புக்கு மகளை முன்னிறுத்தும் கிம் ஜாங் உன்!

வடகொரியாவின் உச்சபட்ச அதிகார மையமாகத் திகழும் கிம் ஜாங் உன், கடந்த பத்தாண்டுகளுக்கு மேலாக அந்த நாட்டைத் தனது வலுவான தலைமையின் கீழ் வழிநடத்தி வருகிறார் . தனது தந்தை கிம் ஜாங் இல்லின் மறைவுக்குப் பிறகு, சுமார் 27 வயதிலேயே பொறுப்பேற்ற அவர், அணு ஆயுத பலம் மற்றும் ராணுவக் கட்டமைப்பில் வடகொரியாவை உலக நாடுகளுக்குச் சவாலாக மாற்றினார்.

அவரது உடல்நிலை மற்றும் ஆட்சி நீட்டிப்பு குறித்து அவ்வப்போது உலக அரங்கில் பல்வேறு யூகங்கள் எழுந்து வந்த நிலையில், தற்போது தனது வாரிசு குறித்த ரகசியத்தை அவர் உடைக்கத் தொடங்கியுள்ளார்.

தற்போதைய அதிபர் கிம் ஜாங் உன், தனது இளம் வயது மகளான 'கிம் ஜு-ஏ'வை தனது அதிகாரப்பூர்வ வாரிசாகத் தேர்ந்தெடுத்துள்ளதாகத் தென் கொரிய உளவு அமைப்புகள் அதிரடியான தகவலை வெளியிட்டுள்ளன. மிகச் சிறிய வயதிலேயே நாட்டின் முக்கிய நிகழ்வுகளில் அவர் முன்னிலைப்படுத்தப்படுவது, ஒரு புதிய அரசியல் சகாப்தத்தின் தொடக்கமாகப் பார்க்கப்படுகிறது.

கடந்த சில மாதங்களாகவே, கிம் ஜாங் உன் தனது மகளை ராணுவ அணிவகுப்புகள், ஏவுகணை சோதனைகள் மற்றும் முக்கிய அரசு விழாக்களுக்குத் தொடர்ந்து அழைத்துச் செல்கிறார். ஆரம்பத்தில் ஒரு தந்தையின் பாசமாகப் பார்க்கப்பட்ட இந்த விஷயம், தற்போது வடகொரியாவின் அதிகார மாற்றத்திற்கான அறிகுறியாக மாறியுள்ளது.

தென் கொரியாவின் தேசிய உளவு அமைப்பு, வடகொரியாவில் கிம் ஜு-ஏ-வுக்கு அளிக்கப்படும் மரியாதை மற்றும் அவர் பொதுவெளியில் தோன்றும் விதம் ஆகியவை, அவரே அடுத்த தலைவர் என்பதை உறுதிப்படுத்துவதாகத் தெரிவித்துள்ளனர். குறிப்பாக, அரசு ஊடகங்கள் அவரை "வழிகாட்டும் நபர்" (Great Person of Guidance) என்று அழைக்கத் தொடங்கியுள்ளன. இது அந்த நாட்டின் உச்சகட்ட தலைவர்களுக்கு மட்டுமே வழங்கப்படும் மிக உயரிய அடைமொழியாகும்.

வடகொரிய வரலாற்றிலேயே ஒரு பெண் தலைவராக உருவெடுப்பது என்பது மிகப்பெரிய மாற்றமாகும். இதுவரை கிம் குடும்பத்தின் ஆண்கள் மட்டுமே நாட்டைத் தலைமை தாங்கி வந்துள்ளனர். இந்தச் சூழலில், தனது மகளுக்குச் சிறு வயதிலேயே ராணுவப் பயிற்சி மற்றும் அரசியல் விழிப்புணர்வை கிம் ஜாங் உன் வழங்கி வருவதாகத் தெரிகிறது. இது அந்த நாட்டு மக்களிடையேயும், சர்வதேச அரசியலிலும் ஒருவிதமான ஆச்சரியத்தையும் எதிர்பார்ப்பையும் ஏற்படுத்தியுள்ளது.

இருப்பினும், இந்த அதிகார மாற்றம் அவ்வளவு எளிதாக நடந்துவிடுமா என்ற கேள்வியும் எழுகிறது. கிம் ஜாங் உன்னின் சகோதரி கிம் யோ-ஜோங் ஏற்கனவே அந்த நாட்டு அரசியலில் செல்வாக்கு மிக்கவராக இருக்கிறார்.

இந்நிலையில், மகளை வாரிசாக முன்னிறுத்துவது குடும்பத்திற்குள் அல்லது ராணுவத்திற்குள் எந்த மாதிரியான தாக்கத்தை ஏற்படுத்தும் என்பதை உலகம் உற்று நோக்கிக் கொண்டிருக்கிறது. எது எப்படியோ, வடகொரியாவின் 'அடுத்த முகம்' ஒரு இளம்பெண்ணாக இருக்கப்போவது மட்டும் இப்போதைக்கு உறுதியாகத் தெரிகிறது. இந்த நகர்வுகள் அனைத்தும் கிம் ஜாங் உன் தனது குடும்பத்தின் அதிகாரத்தை நான்காவது தலைமுறைக்கும் கொண்டு செல்ல எடுக்கும் மிகத்தெளிவான திட்டமிடலாகவே பார்க்கப்படுகிறது.