Cannes 2026: இரண்டாவது முறையாக ஆலியா பட்; ஆனால், கண்டுகொள்ளாத போட்டோகிராபர்ஸ்! - வைரலாகும் வீடியோ

பிரான்ஸில், 79-வது கான் திரைப்பட விழா நேற்றைய தினம் தொடங்கியது. பாலிவுட் நடிகை ஆலியா பட் இரண்டாவது முறையாக, இந்தாண்டும் கான் திரைப்பட விழாவில் கலந்துகொண்டிருக்கிறார்.

அவர் பிராண்ட் அம்பாசிடராக ஒப்பந்தம் செய்திருக்கும் ஒரு பிராண்டின் விளம்பரத்திற்காகக் கடந்த ஆண்டு கான் திரைப்பட விழாவில் அவர் கலந்துகொண்டிருந்தார்.

அந்த ஒப்பந்தம் இந்த ஆண்டும் தொடர்வதால், இரண்டாவது முறையாகக் இப்போதும் கலந்துகொண்டிருக்கிறார்.

இந்த கான் திரைப்பட விழாவில் ஆலியா பட் அணிந்து சென்றிருந்த பிங்க் நிற ஆடை இணையத்தில் பயங்கர வைரலாகியிருக்கிறது.

அந்த உடை மட்டுமல்ல, ஆலியா பட் கான் திரைப்பட விழாவில் ரெட் கார்பெட்டில் நடந்து செல்லும் காணொளி ஒன்றும் இணையத்தில் வைரலாகப் பகிரப்பட்டு வருகிறது.

அந்த வீடியோவில் ஆலியா பட், ரெட் கார்ப்பெட்டில் நடந்து வந்துகொண்டிருக்கிறார். ரெட் கார்பெட்டில் அவர் புகைப்படக் கலைஞர்களுக்காகப் போஸ் கொடுத்திருக்கிறார்.

ஆனால், அங்கிருந்த புகைப்படக் கலைஞர்கள் ஆலியா பட்டை கவனிக்காமல், வேறு நபர்களைப் புகைப்படம் எடுப்பதில் மும்முரமாக இருந்திருக்கிறார்கள்.

இப்படியான ஒரு விஷயம் நிகழ்ந்தவுடன் அங்கிருந்த மொபைல் போன் புகைப்படக் கலைஞர்களுக்குப் போஸ் கொடுத்துவிட்டு கிளம்பியிருக்கிறார் ஆலியா பட்.

இந்நிலையில், இந்த வீடியோவைப் பகிர்ந்து நெட்டிசன்கள், "ஒரு சர்வதேச மேடையில் இவரை யாருக்கும் தெரியவில்லை என்பது மிகப்பெரிய அவமானம்." என்றும், "புகைப்படக் கலைஞர்கள் அவர்களுடைய சினிமாவைச் சேர்ந்த நட்சத்திரத்தைப் புகைப்படம் எடுப்பதில் சீரியஸாக இருந்திருக்கலாம்" என்றும் பதிவிடும் அவர்கள், "ஒரு சிறிய வீடியோவை வைத்துக்கொண்டு ஒருவர் அடைந்திருக்கும் புகழைக் கேலி செய்வது தவறு. அவர் அந்தச் சூழலை மிகவும் பக்குவமாகவும், தன்னம்பிக்கையுடனும் கையாண்டிருக்கிறார்" என ஆலியா பட்டிற்கு ஆதரவாகப் பதிவிட்டு வருகிறார்கள்.