அச்சுறுத்தும் Claude Mythos: சைபர் பாதுகாப்பை உறுதிசெய்ய நிர்மலா சீதாராமன் ஆலோசனை

செயற்கை நுண்ணறிவு எனப்படும் ஏ.ஐ. தொழில் நுட்பம் மிகப்பெரிய அளவில் தொழில் துறையில் புரட்சியை ஏற்படுத்திக்கொண்டிருக்கிறது. செயற்கை நுண்ணறிவு தொழில்நுட்பம் வந்த பிறகு மனிதர்கள் செய்யவேண்டிய வேலையின் அளவு வெகுவாக குறைந்துவிட்டது. இதனால் வேலை வாய்ப்புகளும் குறைந்து வருகிறது. புதிதாக ஆந்த்ரோபிக் என்ற நிறுவனம் மிகவும் சக்திவாய்ந்த Claude Mythos என்ற ஏ.ஐ மாடல் ஒன்றை அறிமுகம் செய்து இருக்கிறது. இது சைபர் பாதுகாப்பில் மிகச்சிறந்த அம்சங்களை கொண்டுள்ளது. மனிதர்களால் கண்டறிய முடியாத ஆயிரக்கணக்கான சைபர் பாதுகாப்பு குறைபாடுகளை Mythos கண்டறிந்து வருகிறது.

மனிதர்களால் பல ஆண்டுகளாக கண்டுபிடிக்க முடியாத மென்பொருள் பிழைகளை இது கண்டறிந்துவிடுகிறது. அதோடு மனிதர்கள் பல நாட்கள் செய்ய வேண்டிய வேலையை, இந்த மாடல் சில நிமிடங்களில் முடித்துவிடுகிறது. இதில் பல பாதுகாப்பு குறைபாடுகளும் இருக்கிறது.

இந்த சாப்ட்வேரை பயன்படுத்தி ஹேக்கிங் செய்துவிட முடியும் என்ற ஆபத்து இருக்கிறது. எனவேதான் இதன் ஆபத்து கருதி, ஆந்த்ரோபிக் நிறுவனம் இதனைப் பொதுமக்களுக்கு வெளியிடாமல், ஆப்பிள், மைக்ரோசாப்ட் போன்ற ஒரு சில முன்னணி நிறுவனங்களுக்கு மட்டுமே சைபர் பாதுகாப்பு பணிகளுக்காக வழங்கியுள்ளது.

சைபர் பாதுகாப்பில் மிகவும் மேம்பட்ட திறன்களைக் கொண்டுள்ள Claude Mythos, வங்கிகளின் பழைய மென்பொருள் அமைப்புகளில் உள்ள குறைபாடுகளைக் கண்டறிந்து தாக்குதல் நடத்தக்கூடும் என்ற அச்சமும் எழுந்துள்ளது. இந்த ஏ.ஐ. மூலம் போதிய கணினி அறிவு இல்லாத ஒரு சாதாரண நபர் கூட, எந்த ஒரு கணினி அமைப்புகளையும் ஹேக்கிங் செய்ய முடியும். எனவே இது பொதுமக்களுக்கு கிடைத்தால் அவர்களால் எளிதில் எதையும் ஹேக்கிங் செய்ய முடியும்.

இந்த ஏ.ஐ இப்போது இந்திய நிதி நிறுவனங்கள் மற்றும் வங்கிகளுக்கு அச்சுறுத்தலாக அமைந்துள்ளது. இந்திய வங்கிகள் அனைத்தும் ஒன்றோடொன்று இணைக்கப்பட்டிருப்பதால் எதாவது ஒரு இடத்தில் ஹேக்கிங் செய்யப்பட்டால் அது ஒட்டுமொத்த நிதி அமைப்பையும் சீர்குலைக்க வாய்ப்புள்ளது.

இதையடுத்து மத்திய நிதியமைச்சர் நிர்மலா சீதாராமன் பொதுத்துறை வங்கிகள், நிதிநிறுவனங்களின் தலைவர்களை அழைத்து இது குறித்து முக்கிய ஆலோசனை நடத்தி இருக்கிறார். இக்கூட்டத்தில் மத்திய தகவல் தொழில் துறை அமைச்சரும் கலந்து கொண்டார்.இதில் வங்கிகள் தங்கள் பாதுகாப்பு அமைப்புகளை உடனடியாகத் தணிக்கை செய்ய வேண்டும் என்றும், தகவல் தொழில்நுட்பக் கண்காணிப்பை வலுப்படுத்த போதிய நிபுணர்களை நியமிக்க வேண்டும் என்றும், சைபர் அச்சுறுத்தல்கள் குறித்து உடனுக்குடன் தகவல்களைப் பகிர்ந்து கொள்ள வேண்டும் என்று கேட்டுக்கொள்ளப்பட்டது.

இந்த கூட்டத்தில் உலகெங்கிலும் உள்ள அரசாங்கங்கள் புதிதாக வந்துள்ள ஏ.ஐ மூலம் எதிர்கொள்ளும் சவால்கள் குறித்தும், அதன் தவறான பயன்பாட்டைத் தடுப்பது குறித்தும் விவாதிக்கப்பட்டது. Mythos போன்ற AI கருவிகள் மனிதர்களை விட வேகமாகப் சைபர் பாதுகாப்பு குறைபாடுகளை கண்டறிந்து அதன் சைபர் பாதுகாப்பை வலுப்படுத்த முடியும் என்றாலும், அவை தவறானவர்களின் கைகளில் கிடைத்தால் சைபர் தாக்குதல் நடத்தும் அபாயமும் இருக்கிறது.

ஏ.ஐ மூலம் சைபர் பாதுகாப்பு மட்டுமல்லாது, ஹேக்கிங் செய்வதற்கும் பயன்படுத்த முடியும் என்பதால் சைபர் பாதுகாப்பு நிபுணர்கள் மற்றும் நிதி நிறுவனங்கள் கவலை அடைந்துள்ளன. இதையடுத்து எஸ்பிஐ வங்கி தலைவர் சல்லா ஸ்ரீனிவாசுலு செட்டி தலைமையிலான இந்திய வங்கிகள் சங்கம் இத்தகைய அச்சுறுத்தல்களைச் சமாளிக்க ஒரு புதிய பாதுகாப்பு கட்டமைப்பை உருவாக்க திட்டமிட்டுள்ளன. அதோடு இந்திய ரிசர்வ் வங்கி மற்றும் பிற ஒழுங்குமுறை ஏஜென்சி அதிகாரிகள் இணைந்து புதிய ஏ.ஐ. நாட்டின் நிதி நிலை மற்றும் இணையப் பாதுகாப்பை எவ்வாறு பாதிக்கக்கூடும் என்பது குறித்து தனியாக ஆய்வு செய்து வருகின்றனர்.