``என் அல்வாவுக்கு இங்க தனி ரசிகர்களே இருக்காங்க'' - ஆண்டிபட்டி கோவிந்தராஜ்

ஆண்டிபட்டியில் அல்வா என்றாலே நினைவுக்கு வருவது இவர்தான். இங்கு இவர் சத்தம் ஒலிக்காத திசையும் இல்லை, இவரது சைக்கிள் நுழையாத தெருக்களும் இல்லை.

ஆண்டிபட்டி, சக்கம்பட்டியில் வசிக்கும் கோவிந்தராஜ் பல வருடங்களாக அல்வா விற்று வருகிறார், தன் சுவையால் அனைத்து மக்களையும் ஈர்த்தவர். தெருவில் இவர் சத்தம் கேட்டாலே சிறியோர் முதல் பெரியோர் வரை ஓடிவந்து இவரது அல்வாவை வாங்கி ருசிப்பர்.

அவரை நேரில் சந்தித்து பேசினோம். "நான் 35 வருடமா இந்த ஊரில் தான் அல்வா விற்கிறேன். என் அல்வாவுக்கு இங்க தனி ரசிகர்கள் இருக்காங்க அதுக்கு காரணம், தரமான முறையில் நான் தயாரிக்கும் அல்வா, பால்கோவாவின் ருசிதான்." என்றவரிடம்

இந்த தொழிலுக்கு வந்தது எப்படி? என்று கேட்ட போது,

"நான் இந்த தொழிலுக்கு வருவதற்கு முன்னால ஆனந்த பவன், அம்மன் போன்ற ஹோட்டலில் தான் வேலை பார்த்தேன். பின்னர் சொந்த ஊருக்கு வந்து பெரிய ஆஸ்பத்திரி முன்னால ஒரு தள்ளுவண்டி கடைவச்சேன்.

அங்க இட்லி, தோசை, சூப் இது மாதிரி வச்சு வித்துட்டு இருந்தேன். அதற்கு அப்புறம் தான் அதையெல்லாம் விட்டுட்டு இந்த அல்வா விக்கிற தொழிலுக்கு வந்தேன்.

ஹோட்டலில் வேலை பார்த்ததால் இந்த சமையல் சம்மந்தமான வேலை கொஞ்சம் சுலபமா இருந்துச்சு, ஆரம்ப காலத்துல இருந்து இப்போ வரை சைக்கிள்ள தான் வித்துட்டு இருக்கேன். அப்போ ஒரு ரூபாய், ஐம்பது பைசா போன்ற விலைகளில் விற்க ஆரம்பித்தேன். அதன் பின் அல்வா, பால்கோவா, சிப்ஸ், குலாப்ஜாமுன் என பலக்காரங்களையும் விற்கத் தொடங்கினேன்.

ஆண்டிபட்டி முழுவதையும் சுற்றி விடுவேன், ஒரு நாள் ஒரு பகுதி என பிரித்து திங்கள் அன்று பாப்பாம்மாள்புரம், செவ்வாய் அன்று சக்கம்பட்டி கிழக்கு, புதன் அன்று சக்கம்பட்டி வடக்கு, வியாழன் அன்று சத்யாநகர் என வாரம் முழுவதும் விற்க செல்வேன்.

முறுக்கு, அல்வா, சிப்ஸ் எல்லாம் 1 ரூபாயில இருந்து விற்க ஆரம்பிச்சு இப்ப ஒரு கப் அல்வா, பால்கோவா 10 ரூபாய், ஒரு பாக்கெட் சிப்ஸ், முறுக்கு 10 ரூபாய் என விற்கிறேன்.

இந்த தொழிலுக்கு வந்ததுக்கு அப்புறம் என் முழு நேர தொழிலே இதுதான். நான் விக்கிற எல்லா பொருளையும் சொந்தமா நானே தயாரிப்பேன், என் மனைவியும் எனக்கு ஓத்தாசையாக இருப்பார்.

எந்த ஒரு ராசாயன பொருளையும் உபயோகப்படுத்தாமல் ஆரோக்கியமான முறையில் தயாரிக்கிறேன். ஓமம், மிளகு, சீரகம், கோதுமை, பால் இது போன்ற சுத்தமான பொருள்களை உபயோகிப்பதால் அது ஆரோக்கியமாகவும் இருக்கும், அன்றன்றைக்கு செய்து அன்றே விற்று விடுவேன்.

அல்வா, பால்கோவா எல்லாம் விரும்பி சாப்பிட்டு பிடிச்சவங்க பெரிய ஆர்டர் எல்லாம் தருவாங்க. அதையும் நானும் என் மனைவியும் மட்டும் தான் சமைச்சு டெலிவரி பண்ணுவோம்.

எனக்கு 2 பொண்ணு 1 பையன், அவங்க எல்லாரையும் இந்த தொழில் செய்து தான் படிக்க வச்சு வளர்த்தேன், எல்லாரையும் நல்லா படிக்க வச்சேன்.

மூன்று பேரும் திருமணம் முடிந்து பேரன் பேத்தியோட இப்போ நல்ல நிலைமையில இருகாங்க. என் பையன் பெங்களூருல சொந்தமா ஒரு கம்பெனி வச்சிருக்கான், என் பொண்ணு அக்கவுண்டன்டா வேலை பாக்குறா. என்னை வேலையெல்லாம் பார்க்க வேணாம் எங்க கூட வந்து இருங்கன்னு தான் சொல்லுவாங்க, ஆனால் நான் என்னால முடியிற வரைக்கும் இந்த தொழில் பாத்துட்டு தான் இருப்பேன். என் அல்வாவை விரும்பி சாப்பிடுறவங்களுக்குகாக நான் அல்வா விற்பேன் என்றார்.

அல்வாவின் சுவையால், தரத்தால் ஆண்டிபட்டி மக்களை ஈர்த்த கோவிந்தராஜ், தன் 30 வயதில் தொடங்கிய தொழிலை 65 வயதிலும் தொடர்ந்து வருகிறார்.