`நம் கண்ணுக்கு தெரியாமல் அரூபமாக வாழும் மனிதர்களின் கதை' - எழுத்தாளர் ஜெயராணியின் பரிந்துரைகள்!

சென்னையில் நடைபெற்று வரும் 49-வது புத்தகத் திருவிழாவில், வார இறுதிநாள் என்பதால் வாசகர்கள் கூட்டம் களைகட்டியது.

அங்கு வாசகர்களால் சூழப்பட்டிருந்த, விளிம்புநிலை மக்களின் வாழ்வியலை தனது எழுத்துகளில் தொடர்ந்து பதிவு செய்து வரும் எழுத்தாளர் ஜெயராணியை சால்ட் பதிப்பக அரங்கில் சந்தித்து உரையாடினோம்.

இந்த ஆண்டு புத்தகக் கண்காட்சியில் மிஸ் செய்யக் கூடாத முக்கிய புத்தகங்கள் எவை எவை குறித்து பேசிய அவர், “எழுத்தாளர் நரனின் சமீபத்திய ‘குமாரத்தி’ நாவல் சால்ட் பதிப்பகத்தில் வெளிவந்துள்ளது.

இது கடந்த மூன்று நான்கு ஆண்டுகளாகவே வெளிவரும் என்று அவரது வாசகர்கள் பெரிதும் எதிர்பார்த்த நாவல். புனைவு வாசிப்பவர்களுக்கு இது மிகவும் பிடிக்கும்.

பெண்களை மையப்படுத்தி, குறிப்பாக குடும்ப சாதிய அமைப்புமுறையில் கௌரவத்துக்காக பெண்கள் சந்திக்கும் வன்முறைகளை மையமாகக் கொண்டு எழுதியுள்ளார்.

சமூகத்தில் நம் கண்ணுக்குத் தெரியாமல் அரூபமாக வாழும் மனிதர்களான கன்னியாஸ்திரி, திருடர், பாலியல் தொழிலாளி, தூக்கு தண்டனை கைதி போன்றவர்களின் வாழ்வை ஒன்றோடொன்று தொடர்புபடுத்தி இந்தக் கதை உருவாக்கப்பட்டுள்ளது. இது ஆணவக் கொலைகளை பற்றியும் பேசுகிறது. கண்டிப்பாக வாசிக்கப்பட வேண்டிய ஒரு புத்தகம்.

அடுத்த பரிந்துரை, எழுத்தாளர் அதிஷா எழுதிய ‘மௌனம்சரணம்’. இது விபாசனா எனும் தியான முறைக்கும் புத்தரின் போதனைகளுக்கும் ஒரு அறிமுகமாக இருக்கும். பத்து நாட்கள் தொலைக்காட்சி, மொபைல் இல்லாமல் இருந்தால் நாம் வெறுத்து விடுவோம். ஆனால் அந்த பத்து நாட்களையும் இவர் மிகவும் ஜாலியான அனுபவமாக எழுதியுள்ளார். இது ஒரு சிறந்த வாசிப்பு அனுபவமாக இருக்கும்.

மூன்றாவது பரிந்துரை, கவிஞர் முத்துராசாவின் ‘கருநாக்கு’. கவிஞர் முத்துராசா சமகாலத்தில் குறிப்பிடத்தக்க இளைய தலைமுறை எழுத்தாளர். கடந்த ஆண்டு அவரது ‘கங்கு’ நாவல் வெளிவந்து பெரிதும் பேசப்பட்டது. அவரின் அனைத்து படைப்புகளுமே முக்கியமானவையே. பெரும்பாலும் விளிம்புநிலை மக்கள், ஒடுக்கப்பட்ட மக்கள் சார்ந்தே அவரது எழுத்துகள் இருக்கும். ‘கருநாக்கு’ கவிதைத் தொகுப்பை நாட்டார் வழக்கு முறையில் அவர் எழுதியுள்ளார். இதில் சாதியத்தை மையப்படுத்திய பல கவிதைகள் இடம்பெற்றுள்ளன." என்றார்.